1-2. Woo kaun dän Apostel Paulus sien Biespel Eltestasch vondoag dän Dach halpen?

 DE Apostel Paulus leewd siene Gloowesbreeda sea. Hee strenjd sikj sea aun dee to halpen (Apj. 20:31). Un doawäajen leewden de Breeda un Sestren Paulus uk sea. Opp eene Sauz hielden de Eltestasch von Efesus, aus see enworden, daut see Paulus nich mea seenen wudden (Apj. 20:37). Biejlikj soo leewen onse flietje Eltestasch äare Breeda un Sestren uk sea un doonen aules, waut see kjennen, om dee to halpen (Filip. 2:16-17). Oba eenjemol haben de Eltestasch uk Schwierichkjeiten. Waut kaun dee halpen doamet foadich to woaren?

² Onse flietje Eltestasch kjennen sikj aun Paulus een Biespel nämen (1. Kor. 11:1). Hee wia nich een butajeweenelja Mensch. Hee wia uk onvolkomen, un am foll daut eenjemol schwoa, daut rajchte to doonen (Reem. 7:18-20). Hee haud met veschiedne Trubbels to kjamfen. Oba Paulus wort nich mootloos un velua uk nich siene Freid. Wan Eltestasch am nodoonen, dan kjennen dee uk met äare Schwierichkjeiten foadich woaren un äare Freid en Jehova sienen Deenst hoolen. See wie mol woo.

3. Von waut haundelt dis Artikjel sikj, un waut woa wie noch lieren?

³ En disen Artikjel woa wie äwa vea Schwierichkjeiten räden, waut Eltestasch haben. 1. Tiet haben toom prädjen un fa de aundre Oppgowen. 2. Goode Hoads sennen. 3. Met äare ieejne Schwakheiten foadich woaren. 4. Met de Schwakheiten von aundre foadich woaren. Wie woaren seenen, woo Paulus met soone Schwierichkjeiten omjinkj un woo Eltestasch sien Biespel nodoonen kjennen.

4. Wuarom es daut fa de Eltestasch veleicht schwoa em Prädichtdeenst veropptogonen?

⁴ Wuarom daut schwoa sennen kaun. Buta daut de Eltestasch em Prädichtdeenst veroppgonen, haben dee uk väle aundre Oppgowen. Väle leiden biejlikj omzajcht daut Toopkomen enne Wäakj un daut Bibelstudium von de Vesaumlunk. Un biesied hoolen dee veleicht uk noch aundre Räden. Dee sent uk flietich de Deenstaumthelpa uttolieren, un sent schaftich, äare Breeda un Sestren Moot tootospräakjen (1. Pet. 5:2). Eenje Eltestasch halpen uk met, Vesaumlungshiesa un aundre Jebieda to buen un to unjahoolen. Oba de wichtichste Oabeit, waut de Eltestasch doonen, es daut Prädichtwoakj unjastetten, krakjt soo aus aule aundre enne Vesaumlunk (Mat. 28:19-20).

5. Waut fa een Biespel jeef Paulus em Prädichtdeenst?

⁵ Paulus sien Biespel. En Filippa 1:10 sajcht hee ons, wuarom hee soo väl em Deenst doonen kunn. Hee sajcht: “Jie [sellen] fauststalen lieren, waut daut aulabaste es”. Paulus kjeem sienen ieejnen Rot no. Hee haud de Oppgow jekjräajen aundre to prädjen, un daut wia fa väle Joaren daut wichtichste en sien Läwen. Hee prädijd effentlich un von Hus to Hus (Apj. 20:20). Hee deed daut nich bloos aun eenen jewessen Dach ooda bloos eemol de Wäakj. Hee nuzt jieda Jeläajenheit ut, om äwa de goode Norecht to räden. Aus hee eemol no waut Frind en Ateen luad, prädijd hee eene Grupp wichtje Menschen, un eenje von dee horchten fein too (Apj. 17:16-17, 34). Mau rajcht aus Paulus “en . . . Kjäden” wia, prädijd hee deejanje, waut doa rom am wieren (Filip. 1:13-14; Apj. 28:16-24).

6. Woo lieed Paulus aundre ut?

⁶ Paulus nuzt siene Tiet daut baste ut. Foaken fruach hee aundre, aus see wullen met am toop de goode Norecht prädjen. Opp siene ieeschte Prädichtreis neem hee biejlikj Johanes Markus met un opp siene tweede Timotäus (Apj. 12:25; 16:1-4). Hee deed sien bastet, om dise Mana uttolieren, daut dee kunnen Vesaumlungen oppstalen, sikj goot om de Breeda un Sestren kjemren un goode Liera woaren (1. Kor. 4:17).

7. Woo kjennen de Eltestasch Paulus sienen Rot en Efeesa 6:14-15 nokomen?

⁷ De Lia fa ons. De Eltestasch kjennen Paulus nich bloos nodoonen, wan dee von Hus to Hus prädjen, oba wan dee opp jieda Jeläajenheit un wua emma dee sent Zeichnis jäwen (läs Efeesa 6:14-15). Dee kjennen daut biejlikj doonen, wan dee enkjeepen ooda wan dee opp äare Oabeit sent.  Dee kjennen uk de Nobasch ooda deejanje prädjen, waut an Sachen vekjeepen, wan dee bie een Buwoakj methalpen. Krakjt soo aus Paulus kjennen de Eltestasch de Tiet em Prädichtdeenst utnutzen, om aundre uttolieren, wua uk de Deenstaumthelpa met en sent.

8. Waut motten Eltestasch eenjemol doonen?

⁸ De Eltestasch sellen nienich soo drock sennen met Sachen vonne Vesaumlunk ooda vom Kjreis, daut dee nich mea Tiet haben toom prädjen. Daut dee äare Oppgowen fein nokomen kjennen, motten dee daut eenjemol aufsajen, wan se an mea jäwen wellen. Nodäm daut dee doaräwa nojedocht un jebät haben, woaren dee veleicht seenen, daut see nich mea jenuach Tiet haben woaren fa daut wichtichste, wan see noch mea Oppgowen aunnämen. Bie daut wichtichste wudd met en sennen, daut see jieda Wäakj daut Famieljenstudium haben, emma flietich em Deenst sent un uk äare Kjinja em Deenst utlieren. Eenje felt daut schwoa eene Oppgow auftosajen. Oba dee kjennen sikj secha sennen, daut Jehova daut vestonen kaun, wan dee daut doonen, om äare aundre Oppgowen fein notokomen.

9. Waut kaun fa Eltestasch schwoa sennen, wan dee aul soo väl to doonen haben?

⁹ Wuarom daut schwoa sennen kaun. Jehova siene Deena moaken väle Trubbels derch. Nu en de latste Tiet fält ons daut aula aun Moot, Help un Troost. Un eenje fält daut eenjemol aun Help, daut dee nich waut schlajchtet doonen (1. Tess. 5:14). Secha kjennen de Eltestasch nich aul dise Schwierichkjeiten von Jehova siene Deena wajchnämen. Oba Jehova well doawäajen von de Eltestasch haben, daut dee siene Deena Troost jäwen un dee beschitzen. Woo kjennen Eltestasch, waut aul soo drock sent, sikj de Tiet nämen toom aundre halpen?

10. Woo kjemmad Paulus sikj no 1. Tessalonicha 2:7 no om Jehova siene Deena?

¹⁰ Paulus sien Biespel. Paulus socht no Jeläajenheiten, woo hee siene Breeda Moot toospräakjen kunn. Daut es goot, wan de Eltestasch sien Biespel nodoonen un to äare Gloowesbreeda leeftolich un frintlich sent (läs 1. Tessalonicha 2:7). Paulus vesechad siene Gloowesbreeda, daut hee dee leewd un daut Jehova dee leewd (2. Kor. 2:4; Efs. 2:4-5). Hee behaundeld dee soo aus siene Frind un wia met an toop. Doaderch, daut hee äwa siene ieejne Sorjen un Schwakheiten räd, wees hee, daut hee opp dee vetrud (2. Kor. 7:5; 1. Tim. 1:15). Oba Paulus deed daut nich doatoo, daut de aundre sullen no am kjikjen. Enne Städ daut wull hee siene Breeda halpen.

11. Wuarom jeef Paulus siene Gloowesbreeda Rot?

¹¹ Eenjemol wia daut needich, daut Paulus  siene Gloowesbreeda Rot jeef. Oba hee deed daut nienich, wäajen hee sikj äwa dee oajad. Hee jeef dee Rot, wäajen hee om dee bekjemmat wia un dee fa veschiedne Jefoaren beschitzen wull. Hee proowd soonen Rot to jäwen, waut leicht to vestonen wia, un hee wull, daut dee dän aunneemen. Biejlikj schreef hee de Korinta eenen Breef, wua een strenja Rot bennen wia. Nodäm daut hee dän jeschräwen haud, schekjt hee Titus doahan. Paulus wia besorcht, aus dee dän Rot aunnämen wudden. Oba woo schaftich hee nich wia, aus hee hieed, daut dee dän wellich aunjenomen hauden (2. Kor. 7:6-7).

12. Woo kjennen de Eltestasch äare Gloowesbreeda Moot toospräakjen?

¹² De Lia fa ons. De Eltestasch kjennen sikj aun Paulus een Biespel nämen, wan dee sikj Tiet nämen un met äare Gloowesbreeda toop sent. Eene Mäajlichkjeit es, wan dee tiedich bie de Toopkomes sent un met dee Unjahoolungen haben, waut dee Moot jeft. Foaken brukt daut mau een poa Minuten, daut eene Sesta ooda Brooda wada Moot kjricht (Reem. 1:12; Efs. 5:16). Een Eltesta, waut sikj aun Paulus een Biespel nemt, woat Gott sien Wuat brucken, om siene Gloowesbreeda Moot tootospräakjen un dee to sajen, daut Jehova an leeft. Hee woat an uk weeten loten, daut hee an leeft. Hee woat foaken met dee räden un seenen, woo hee dee lowen kaun. Wan een Eltesta Rot jäwen mott, dan stett dee sikj emma opp Gott sien Wuat. Hee sajcht krakjt, woo de Sach steit, oba hee deit daut leeftolich un well, daut dee dän Rot aunnämen (Gal. 6:1).

13. Waut kjennen de Schwakheiten von eenen Eltesten aun am doonen?

¹³ Wuarom daut schwoa sennen kaun. De Eltestasch sent nich volkomen. Soo aus aule aundre, moaken dee uk Fäla (Reem. 3:23). Veleicht es dee daut eenjemol schwoa, rajcht aun äare Schwakheiten nauntokjikjen. Eenje kjikjen veleicht soo sea no äare ieejne Fäla, daut dee mootloos woaren. Aundre denkjen veleicht, daut äare Schwakheiten nich soo schlemm sent, un daut daut nich needich es, waut to endren.

14. Woo holp de Deemoot Paulus no Filippa 4:13 no met siene Schwakheiten foadich to woaren?

¹⁴ Paulus sien Biespel. Wäajen Paulus deemootich wia, kunn hee vestonen, daut hee nich auleen met siene Schwakheiten foadich woaren kunn. Hee brukt Gott siene Help. Ea wia hee sea iewrich de Christen to vefoljen, oba lota wort hee en, daut hee em orrajchten wia un endad dan sien gaunzet Läwen (1. Tim. 1:12-16). Met Jehova  siene Help wort Paulus een leeftolja, metfeelenda un deemootja Eltesta. Hee wia sikj gaunz em kloaren, daut hee väle Schwakheiten haud, oba hee docht nich dän Tiet äwa aun daut. Enne Städ daut vetrud hee opp Jehova, daut dee am vejäwen wudd (Reem. 7:21-25). Hee velangd von sikj selfst nich Volkomenheit. Enne Städ daut schauft hee sea doaraun, een bätra Christ to woaren un veleet sikj deemootich opp Jehova siene Help toom sien Woakj doonen (1. Kor. 9:27; läs Filippa 4:13, NW *).

15. Woo sellen de Eltestasch äwa äare ieejne Schwakheiten denkjen?

¹⁵ De Lia fa ons. De Eltestasch sent nich aunjestalt, wäajen dee volkomen sent. Oba Jehova well, daut dee toostonen, daut dee uk Fäla moaken un daut dee doaraun schaufen, emma bätre Christen to woaren (Efs. 4:23-24). Een Eltesta saul sikj selfst unjasieekjen toom seenen, wua hee sikj noch vebätren mott un doatoo Gott sien Wuat brucken. Dan woat Jehova dän halpen, schaftich to sennen un een gooda Eltesta to sennen (Jak. 1:25).

16. Waut kunn passieren, wan een Eltesta bloos wudd no aundre äare Schwakheiten kjikjen?

¹⁶ Wuarom daut schwoa sennen kaun. Wäajen de Eltestasch väl met de Breeda von äare Vesaumlunk toopschaufen, es daut leicht, daut an dee äare Schwakheiten oppfaulen. Un wan dee nich oppaussen, kjennen dee sikj doaräwa oajren, nich leeftolich sennen ooda doaräwa grunzen. Paulus woarnd de Christen doafäa, daut de Soton daut wudd sea jleichen, wan see daut deeden (2. Kor. 2:10-11).

17. Woo docht Paulus äwa siene Breeda un Sestren?

¹⁷ Paulus sien Biespel. Hee docht emma goot äwa siene Breeda un Sestren. Hee wist goot, daut dee Fäla muaken, wiels eenjemol deed am daut wee, waut dee deeden. Oba Paulus wist, daut eena nich onbedinjt een schlajchta Mensch wia, wan eena eenen Fäla muak. Hee leewd siene Breeda un kjikjt no dee äare goode Sieden. Wan dee daut schwoa foll daut rajchte to doonen, dan docht hee doaraun, daut dee secha daut baste wullen un daut dee eefach Help fäld.

18. Waut kjenn wie doavon lieren, woo Paulus met Efodia un Sintieche omjinkj? (Filippa 4:1-3).

¹⁸ See wie mol, woo Paulus twee Sestren en de Vesaumlunk en Filippi holp (läs Filippa 4:1-3). Daut späat sikj soo, daut Efodia un Sintieche sikj äwa waut nich eenich wieren un doawäajen nich mea Frind wieren. Oba Paulus wia nich strenj met dee. Hee wia leeftolich un kjikjt no dee äare goode Sieden. Daut wieren true Sestren, waut Jehova aul lang jedeent hauden. Paulus wist, daut Jehova dee leewd. Wäajen  hee goot äwa dise Sestren docht, kunn hee dee tooroden, daut dee unjarenaunda wada sullen Fräd moaken. Wäajen Paulus no de goode Sieden von de Breeda kjikjt, kunn hee wieda goode Frind sennen met dee von dise Vesaumlunk.

19. (a) Waut halpt de Eltestasch, goot äwa äare Gloowesbreeda to denkjen? (b) Waut lia wie von daut Bilt, wua de Eltesta daut Vesaumlungshus halpt reinmoaken?

¹⁹ De Lia fa ons. Jie Eltestasch, kjikjt no de Breeda un Sestren äare goode Sieden. Jieda eena es onvolkomen, oba jieda eena haft uk goode Sieden (Filip. 2:3). Eenjemol es daut needich, daut de Eltestasch eenen Brooda ooda eene Sesta motten Rot jäwen. Oba soo aus Paulus sellen de Eltestasch nich bloos no daut kjikjen, waut de aundra sajcht ooda deit, waut veleicht kunn toom oajren sennen. Daut es bäta, wan dee doano kjikjen, daut de aundra Jehova leeft, daut dee am wieda tru deent un waut fa goodet dee wudd doonen kjennen. Wan de Eltestasch no de aundre äare goode Sieden kjikjen, dan kjennen dee de Breeda halpen, daut dee sikj von aule en de Vesaumlunk jeleeft feelen.

20. Woo kaun Paulus sien Biespel de Eltestasch wieda togood komen?

²⁰ Fa junt Eltestasch woat daut eene Help sennen, wan jie junt Paulus sien Biespel wieda unjasieekjen. Jie wudden biejlikj kjennen bie dän Index der Wachtturm-Publikationen daut Wuat “Paulus” sieekjen un dan de Äwaschreft “Beispiel für Älteste”. Wan jie junt eenjet von daut derchläsen, dan wudd jie kjennen doaräwa nodenkjen: “Woo kaun Paulus sien Biespel mie halpen, daut ekj wieda kaun schaftich sennen un miene Oppgow aus Eltesta doonen?”

21. Äwa waut kjennen de Eltestasch sikj gaunz secha sennen?

²¹ Jie Eltestasch, denkjt doaraun, daut Jehova von junt nich velangt, daut jie volkomen sent. Hee well eefach, daut jie tru sent (1. Kor. 4:2). Jehova freid sikj sea doaräwa, daut Paulus soo flietich un tru wia. Jie kjennen junt secha sennen, daut Gott daut sea schazt, waut jie en sienen Deenst doonen. Jehova woat nienich “june Woakjen un june Leew vejäten . . ., dee jie en sienen Nomen beweesen aus jie de heilje deenden un noch deenen” (Heb. 6:10).