HORCHT Gott no aule Jebäda, endoont woo wie bäden ooda to wäm? Soo haben väle daut vondoag dän Dach to hoolen. Dee denkjen, daut en aule Kjoakjen waut goodet es un daut et endoont es, to waut fa eenen Gott eena bät. Oba es daut soo?

No de Schreft no bäden sea väl Menschen nich to dän woaren Gott. En de Bibeltiet wia daut foaken soo, daut de Menschen to Aufjetta bäden. Oba Gott woarnd dee emma wada fa soont. Biejlikj sajcht Psalm 115:4-6 (PB) äwa de Aufjetta: “Dee haben Uaren, un kjennen nich hieren”. Soo, wuarom sull eena to eenen Gott bäden, waut nich mol hieren kaun?

See wie mol eene biblische Jeschicht, waut daut gaunz kloa wiest. De woara Profeet Elia säd to de Baalsprofeeten, daut dee to äaren Gott bäden sullen un lota wudd hee to sienen Gott bäden. Elia säd, daut de woara Gott wudd auntwuaten un daut de faulscha Gott nich wudd. De Baalsprofeeten wieren doamet envestonen. Doawäajen bäden dee lang un sea to äaren Gott. Dee schrieejen mau rajcht sea lud, oba doa wia kjeene Spua. De Schreft sajcht: “Doa wia . . . kjeene Auntwuat. Doa wia kjeen Tieekjen von däm, wäm see aunroopten” (1. Kjennichs 18:29, PB). Waut passieed oba, aus Elia ieescht bäd?

Aus Elia ieescht jebät haud, jeef sien Gott am rein fuaz eene Auntwuat. Hee schekjt Fia vom Himmel rauf un vebrend Elia sien Opfa. Wuarom horcht Gott no dän sien Jebäd? Wie kjennen daut vestonen, wan wie sien Jebäd läsen doa en 1. Kjennichs 18:36-37. Daut es een gaunz kortet Jebäd, daut haud mau soo bie 30 Wieed, aus daut toom ieeschte Mol opp Hebräisch oppjeschräwen wort. Oba Elia brukt en daut Jebäd dree Mol sienen Gott sienen Nomen, Jehova.

Baal meent “Ieejendeema” ooda “Wieet”; daut wia de Kanaanita äa Gott. Un dee nanden dän veschieden doano, wua dee wonden. Oba Jehova es de Nomen von dän eensich woaren Gott. Dis Gott säd to sien Volkj: “Ekj sie Jehova. Daut es mien Nomen. Miene Harlichkjeit jäw ekj kjeenen aundren” (Jesaja 42:8, NW).

Woosoo wort Elia sien Jebäd beauntwuat un de Baalsprofeeten äat nich? Wäajen dee nich to dänselwjen Gott bäden. Denkj mol aun dit Jlikjnis: Wan du dienen Frint wurscht wellen eenen Breef schriewen, dan wurscht du motten dän sienen Nomen brucken. Wan du eenen aundren sienen Nomen brucken wurscht, dan wudd de Breef kjeenmol bat dienen Frint komen! Un dan uk noch: Bie de Baalsaunbädunk wia Huararie met en un doa worden uk Menschen jeopfat. Oba Jehova aunbäden wia aundasch. Hee wull nich haben, daut siene Deena bie dise äakjelje Jewanheiten sullen metmoaken, wiels hee wull haben, daut dee am sullen opp eene reine Wajch aunbäden.

Wan du to Jehova bätst, dan bätst du to dän Schepfa un dän Voda äwa aule Menschen. * De Profeet Jesaja säd en een Jebäd: “Du, HAR [Jehova], best ons Voda” (Jesaja 63:16, PB). Dit es krakjt deeselwja Gott von dän Jesus Christus räd, aus hee to siene Nofolja säd: “Ekj woa noppfoaren no mienen Voda un junen Voda, un no mienen Gott un junen Gott” (Johanes 20:17, PB). Jehova es Jesus sien Voda. Hee es dee Gott, to wäm Jesus bäd, un Jesus lieed siene Nofolja, daut dee uk to disen Gott bäden sullen (Matäus 6:9).

Sajcht de Schreft, daut wie sellen to Jesus, to Maria, to Heilje ooda to Enjel bäden? Nä! Bloos to Jehova. See mol tweeatlei, wuarom. Ieeschtens: Bäden es een Gottesdeenst un de Schreft sajcht, daut wie bloos sellen Jehova Gott aunbäden un deenen (2. Mose 20:5). Daut tweede es, daut de Schreft bloos von Jehova sajcht: “Du hieescht onse Jebäda” (Psalm 65:3, PB). Wan Jehova uk väl Oppgowen aundre äwajeft, haft hee de Oppgow, no de Jebäda to horchen, oba kjeenmol sestwäm jejäft. Hee vesprakjt ons, daut hee selfst no onse Jebäda horchen woat.

Soo, wan du west haben, daut Gott saul diene Jebäda hieren, dan denkj doaraun, waut de Schreft sajcht: “Un wäaemma dan dän Harn [Jehova] sien Nomen aunroopt, saul jerat woaren” (Aposteljeschicht 2:21, PB). Oba hieet Jehova aule Jebäda? Ooda mott wie noch sestwaut äwa daut Jebäd weeten, wan wie wellen, daut Jehova ons hieren saul?