Oppe gaunze Welt es daut soo heet aus noch kjeenmol ea. De Menschen motten doamet foadich woaren un uk met aundret schlemmet Wada, waut doavon kjemt. Hia sent een poa Berechten doaräwa:

•   “Dit es de heetste Juni jewast, en de 174 Joa, daut se sikj daut oppjeschräwen haben, woo heet daut oppe Welt es” (National Oceanic and Atmospheric Administration, U.S. Department of Commerce, 13. Juli 2023).

•   “En Italien, Spaunien, Frankreich, Dietschlaunt un Poolen es daut nu jroz schrakjlich heet, un se jleewen, daut et opp de Inslen Sizilien un Sardinien woat bat 48 Grod Celsius (118 Grod Fahrenheit) heet woaren. Dit kaun leicht de heetste Somma en Europa sennen von dan, aus se sikj daut oppschriewen” (European Space Agency, 13. Juli 2023).

•   “Wie räakjnen doamet, daut et dolla un foakna räajnen woat, je woama daut enne Welt woat. Doaderch woat daut emma jratre Äwaschwamungen jäwen” (Stefan Uhlenbrook, director of hydrology, water and cryosphere at the World Meteorological Organization, 17. Juli 2023).

 Wan du emma mea Berechten doaräwa hieescht, woo schlemm daut met daut Wada es, moakst du die dan Sorjen doaräwa? Well wie mol seenen, waut de Schreft äwa dise wichtje Sach sajcht.

 Jo. Daut et oppe gaunze Welt soo heet es un daut et aundret schlemmet Wada jeft, stemt met daut, waut de Schreft fa onse Tiet verutsäd. Biejlikj säd Jesus verut, daut wie “schrakjeljet” seenen wudden, ooda soont, waut eenem enjsten kaun (Lukas 21:11, PB). Wäajen daut Wada oppe gaunze Welt emma woama woat, haben väle Angst, daut de Menschen de Ieed gaunz vedoawen woaren.

 Nä. Gott haft de Ieed jemoakt, soo daut wie doa emma bowen läwen kjennen. Hee woat nich tooloten, daut de Menschen de Ieed venichten (Psalm 115:16; Liera 1:4). Enne Städ daut woat hee deejanje venichten, “dee de Ieed vedorwen haben” (Openboarunk 11:18, PB).

 De Schreft wiest, daut Gott de Macht haft, de Ieed von Owwadasch to beschitzen, un daut hee daut uk doonen woat.

•   “[Gott] steld daut Owwada, daut de Walen sikj läden” (Psalm 107:29, PB). Gott haft de Macht, de Natua unja Kontroll to hoolen. Wäajen Menschen de Natua soo väl Schoden aunjedonen haben, motten dee nu met schlemmet Wada foadich woaren, oba Gott kaun aul daut fiksen.

•   “Du sorchst fa daut Launt un latst daut räajnen, un moakst daut doaderch sea rikj” (Psalm 65:10, PB). Met Gott siene Help woat de Ieed to een Paradies woaren.

 De Schreft vesprakjt, daut de Schoden en de Natua woat jefikst woaren. Wan du mea doaräwa weeten west, dan läs dän Artikjel “Wer wird unseren Planeten retten?”.