Woo woat eena eent von Jehova siene Zeijen?

AUFSPÄLEN

Waut eena doonen mott, om eent von Jehova siene Zeijen to woaren, wees Jesus en Matäus 28:19-20. Dise Varzh wiesen, daut deejanje, waut Jesus nofoljen wellen, met aundre äwa Gott räden motten, ooda Zeichnis jäwen. Oba waut es noch doatoo needich?

Ieeschtens: Eena mott lieren, waut de Bibel sajcht. Jesus jeef siene Nofolja daut Jeboot: “Moakt ... Lieelinja ... lieet an” (Matäus 28:19-20, De Plautdietsche Bibel). Daut Wuat “Lieelinkj”, ooda “Jinja”, bediet “Schiela”. De Bibel un besonda de Lieren von Jesus, waut doabennen sent, wiesen ons, woo wie een schaftjet un tofrädnet Läwen haben kjennen (2. Timotäus 3:16-17). Wie halpen die wellich, derch een Bibelstudium de Bibel bäta kjanen to lieren. Daut es emsonst (Matäus 10:7-8; 1. Tessalonicha 2:13).

Tweedens: Daut nokomen, waut eena lieet. Jesus säd, de Bibelschiela sullen uk “aules ... doonen”, waut hee an befolen haud (Matäus 28:20, De Plautdietsche Bibel). Daut, waut eena ut de Bibel lieet, saul aulsoo nich bloos em Kopp bliewen. Daut kaun sennen, daut eena sikj en sien denkjen un haundlen sea endren mott (Aposteljeschicht 10:42; Efeesa 4:22-29; Hebräa 10:24-25). Wäa Jesus siene Jebooten helt, woat sikj dan eenich woaren, am notofoljen un sikj Jehova Gott hantojäwen (Matäus 16:24).

Dreddens: Sikj deepen loten (Matäus 28:19). En de Bibel woat de Doop met een Bejrafnis vejlikjt (see uk Reema 6:2-4). Waut es doamet jemeent? Eena begroft soo to sajen daut, waut eena bat dan jewast es, un fangt een nieet Läwen aun. Derch de Doop bekjant eena ver aundre, daut eena de ieeschte beid Sachen, waut Jesus säd, jedonen haft, un daut eena Gott no een reinet Jewessen frajcht (Hebräa 9:14; 1. Petrus 3:21).

Woo kaun ekj weeten, aus ekj reed sie fa de Doop?

Räd met de Eltestasch en diene Vesaumlunk doaräwa. Dee woaren secha moaken, aus du vesteist, waut de Bibel lieet, aus du daut en dien Läwen nokjemst, un aus du die Gott friewellich hanjejäft hast (Aposteljeschicht 20:28; 1. Petrus 5:1-3).

Talen dise Bedinjungen uk fa de Kjinja von Jehova siene Zeijen?

Jo. Wie trakjen onse Kjinja “christlich opp” un doonen dee “em christlichen Senn trajchtwiesen” – daut meent soo, aus de Bibel sajcht (Efeesa 6:4, De Plautdietsche Bibel). Oba wan dee ieescht een jewesset Ella haben, motten dee selfst entscheiden, aus dee sikj wellen deepen loten. Doatoo motten dee lieren, waut de Bibel sajcht, un daut uk aunnämen un nokomen (Reema 12:2). Jieda eena mott irjentwanea selfst entscheiden, aus dee Jehova deenen well ooda nich (Reema 14:12; Galata 6:5).