نئیں، سانوں بُتاں دی پوجا نئیں کرنی چاہی دی۔ خدا نے بنی‌اِسرائیل نُوں جیہڑے حکم دِتے سن اوہناں بارے ‏”‏نیو کیتھولک انسائیکلوپیڈیا“‏ چ ایہہ دَسیا گیا اے:‏ ”‏بائبل دِیاں فرق فرق ایتاں تے غور کرن نال پتہ چلدا اے کہ سچے خدا دی عبادت کرن والے بُتاں نُوں استمال نئیں کردے سن۔“‏ ذرا ایہناں ایتاں تے غور کرو:‏

•   تُوں اپنے لئی کوئی مورت یاں بُت نہ بنائیں تے نہ ای کسے شے دی صورت بنائیں جیہڑی اسمان چ ہوئے یاں زمین دے اُتے یاں زمین دے تھلے پانی چ۔ تُوں ایہناں نُوں سجدہ نہ کرِیں تے نہ ای ایہناں دی عبادت کرِیں کیونکہ میں یہوواہ تیرا خدا واں تے چاہنا واں کہ تُوں صرف میری ای عبادت کریں۔ (‏خروج 20:‏4، 5‏)‏ کیونکہ خدا چاہندا اے کہ صرف اوہدی ای عبادت کیتی جائے ایس لئی جدوں کوئی بندہ بُتاں، تصویراں، مجسّمیاں یاں ایہو جہی کسے ہور شے دی عبادت کردا اے تے خدا اوہدے توں خوش نئیں ہوندا اے۔‏

•   میں اپنا جلال کسے ہور نُوں تے اپنی حمد کھودیاں ہوئیاں مورتاں نُوں نئیں دَواں گا۔ (‏یسعیاہ 42:‏8‏)‏ جدوں کوئی بندہ بُتاں یاں تصویراں دے ذریعے خدا دی عبادت کردا اے تے خدا اوہدی عبادت نُوں قبول نئیں کردا۔ اِک واری جدوں کجھ اِسرائیلیاں نے خدا دی عبادت کرن لئی سونے دا بچھڑا بنایا تے خدا نے اوہناں لوکاں بارے کہیا کہ اوہناں نے بوہت وڈا گُناہ کیتا اے۔—‏خروج 32:‏7-‏9‏۔‏

•   سانوں ایہہ نئیں سوچنا چاہی دا کہ خدا سونے، چاندی یاں پتھر دی کسے ایہو جہی چیز ورگا اے جیہڑی انساناں نے اپنی سوچ دے مطابق اپنے ہتھاں نال بنائی اے۔ (‏اعمال 17:‏29‏)‏ اکثر جھوٹھے مذہباں چ ایہو جہیاں چیزاں دی عبادت کیتی جاندی اے جیہڑیاں انساناں نے اپنی سوچ دے مطابق اپنے ہتھاں نال بنائیاں ہوندیاں نیں۔ پر بائبل چ دَسیا گیا اے کہ سچے‌مسیحیاں نُوں اوہناں چیزاں دے مطابق نئیں چلنا چاہی دا جیہڑیاں نظر آندیاں نیں سگوں ایمان دے مطابق چلنا چاہی دا اے۔—‏2-‏کُرنتھیوں 5:‏7‏۔‏

•   اپنے آپ نُوں بُتاں توں بچا کے رکھو۔ (‏1-‏یوحنا 5:‏21‏)‏ کئی لوک سوچدے نیں کہ جے اوہ عبادت چ بُتاں یاں تصویراں نُوں استمال کرن گے تے خدا اوہناں دی عبادت توں خوش ہووے گا۔ پر خدا نے بنی‌اِسرائیل نُوں تے مسیحیاں نُوں جیہڑے حکم دِتے نیں، اوہناں توں صاف صاف پتہ چلدا اے کہ خدا ایہو جہی عبادت نُوں قبول نئیں کردا۔‏