پاک روح اوہ طاقت اے جدے ذریعے خدا کم کردا اے۔ (‏میکاہ 3:‏8؛‏ لُوقا 1:‏35‏)‏ اوہ اپنی مرضی یاں اپنا مقصد پورا کرن لئی اپنی پاک روح یعنی اپنی طاقت نُوں کِتے وی گھل سکدا اے۔—‏زبور 104:‏30؛‏ 139:‏7‏۔‏

 پاک کلام چ عبرانی لفظ ”‏رُوأخ“‏ تے یونانی لفظ ”‏پنوئما“‏ دا ترجمہ ”‏روح“‏ کیتا گیا اے۔ بوہت ساریاں ایتاں چ ایہہ لفظ پاک روح یعنی خدا دی طاقت وَل اشارہ کردے نیں۔ (‏پیدایش 1:‏2‏)‏ پر پاک کلام چ ایہہ عبرانی تے یونانی لفظ فرق مطلب لئی وی استمال ہوئے نیں جیویں کہ:‏

•   دم۔—‏حبقوق 2:‏19؛‏ مکاشفہ 13:‏15‏۔‏

•   ہوا۔—‏پیدایش 8:‏1؛‏ یوحنا 3:‏8‏۔‏

•   زندگی۔—‏پیدایش 6:‏17‏۔‏

•   طبیعت، سوچ یاں مزاج۔—‏گنتی 14:‏24‏۔‏

•   اسمانی ہستیاں جیویں کہ خدا دے فرشتے وغیرہ۔—‏1-‏سلاطین 22:‏21؛‏ یوحنا 4:‏24‏۔‏

 جیس طرحاں اَسی ہوا نُوں ویکھ تے چُھو نئیں سکدے پر ایہدے اثر نُوں محسوس کر سکنے آں۔ اوسے طرحاں اَسی دم، زندگی، کسے دی طبعیت یاں اسمانی ہستیاں نُوں ویکھ تے چُھو نئیں سکدے پر ایہناں دے اثر نُوں ضرور محسوس کر سکنے آں۔ پاک روح وی ایسے طرحاں ای اے۔—‏مصنف ولیم وائن دی کتاب ‏”‏این ایکسپوزیٹری ڈکشنری آف نیو ٹیسٹامنٹ ورڈز۔“‏

 بائبل چ پاک روح لئی خدا دِیاں اُنگلاں یاں اوہدے ہتھ ورگے لفظ وی استمال کیتے گئے نیں۔ (‏زبور 8:‏3؛‏ 19:‏1؛‏لُوقا 11:‏20؛‏ متی 12:‏28 تے غور کرو۔)‏ جیس طرحاں اِک کاریگر اپنا کم کرن لئی اپنے ہتھاں تے اُنگلاں نُوں استمال کردا اے اوسے طرحاں خدا نے اپنی پاک روح نال ایہہ کم کیتے:‏

•   کائنات نُوں بنایا۔—‏زبور 33:‏6؛‏ یسعیاہ 66:‏1، 2‏۔‏

•   بائبل لکھوائی۔—‏2-‏پطرس 1:‏20، 21‏۔‏

•   پرانے زمانے چ اپنے خادماں نُوں معجزے کرن تے جوش نال مُنادی کرن دی طاقت دِتی۔—‏لُوقا 4:‏18؛‏ اعمال 1:‏8؛‏ 1-‏کُرنتھیوں 12:‏4-‏11‏۔‏

•   ہر زمانے چ اپنے بندیاں نُوں ودھیا خوبیاں وکھان دے قابل بنایا۔—‏گلتیوں 5:‏22، 23‏۔‏

پاک روح کوئی ہستی نئیں اے

 بائبل چ پاک روح نُوں خدا دے ہتھ، اُنگلاں تے اوہدا دم وی کہیا گیا اے۔ ایس لئی پاک روح کوئی ہستی نئیں ہو سکدی۔ (‏خروج 15:‏8‏)‏ جیویں اِک کاریگر دے ہتھ اوہدے جسم تے دماغ توں وکھ ہو کے کجھ نئیں کر سکدے اونویں ای پاک روح وی خدا دی مرضی توں وکھ ہو کے اپنے آپ کجھ نئیں کر سکدی۔ (‏لُوقا 11:‏13‏)‏ پاک کلام چ خدا دی روح نُوں پانی نال وی تشبیہ دِتی گئی اے۔ (‏یسعیاہ 44:‏3‏)‏ ایہدے علاوہ پاک کلام چ خدا دے اِک بندے بارے دَسیا گیا اے کہ اوہ ایمان تے پاک روح نال بھریا ہویا سی۔ (‏اعمال 6:‏5‏)‏ ایہناں مثالاں توں ثابت ہوندا اے کہ پاک روح کوئی ہستی نئیں اے۔‏

 پاک کلام چ یہوواہ خدا تے یسوع مسیح دا ناں دَسیا گیا اے۔ پر ایہدے چ کِتے وی پاک روح دا کوئی ناں نئیں دَسیا گیا۔ (‏یسعیاہ 42:‏8؛‏ لُوقا 1:‏31‏)‏ جدوں ستفنُس نُوں معجزے دے ذریعے اسمان دا منظر وکھایا گیا تے اوہنے تِن نئیں سگوں صرف دو ہستیاں نُوں ویکھیا سی۔ پاک کلام چ دَسیا گیا اے:‏ ستفنُس نے جیہڑا پاک روح نال بھریا ہویا سی، اسمان وَل ویکھیا تے اوہنوں خدا دی عظمت نظر آئی تے یسوع وی نظر آیا جیہڑا خدا دے سجے پاسے کھلوتا ہویا سی۔ (‏اعمال 7:‏55‏)‏ ایس ایت دے مطابق خدا دی پاک روح اوہدی طاقت اے جدے ذریعے اوہ کم کردا اے تے جدے ذریعے ستفنُس ایس منظر نُوں ویکھن دے قابل ہویا سی۔‏

 غلط نظریہ:‏ پاک روح اِک ہستی اے تے تثلیث دا حصہ اے جیویں کہ کیتھولک ترجمے چ 1-‏یوحنا 5:‏7، 8 چ دَسیا گیا اے۔‏

 سچائی:‏ کیتھولک ترجمے چ 1-‏یوحنا 5:‏7، 8 دا ترجمہ اِنج کیتا گیا اے:‏ تِن نیں جیہڑے گواہی دیندے نیں یعنی [‏اسمان اُتے باپ تے بیٹا تے روحُ‌القدس تے ایہہ تنوں اِک ای نیں۔ تے تِن ای جیہڑے زمین تے گواہی دیندے نیں۔]‏ تحقیق توں ثابت ہوندا اے کہ یوحنا رسول نے ایہہ گل نئیں لکھی سی ایس لئی ایہہ بائبل دا حصہ نئیں اے۔ پروفیسر بروس میٹسگر نے لکھیا:‏ ایہہ گل یقین نال کہی جا سکدی اے کہ ایہہ گل سچ نئیں تے ایہنوں نویں عہدنامے چ نئیں ہونا چاہی دا۔‏‏—‏اے ٹیکسچوئل کامنٹری آن دی گریک نیو ٹیسٹامنٹ۔‏

 غلط نظریہ:‏ بائبل چ پاک روح لئی ایہو جہے لفظ استمال کیتے گئے نیں جیہڑے کسے ہستی لئی استمال ہوندے نیں۔ ایس لئی پاک روح کوئی طاقت نئیں سگوں اِک ہستی اے۔‏

 سچائی:‏ ایہہ سچ اے کہ پاک روح دا ذکر کردے ہوئیاں ایہو جہے لفظ استمال کیتے گئے نیں جیہڑے کسے ہستی لئی استمال کیتے جاندے نیں۔ مثال دے طور تے یسوع مسیح نے پاک روح نُوں اِک مددگار آکھیا تے دَسیا کہ ایہہ مددگار ثبوت دَوے گا، رہنمائی کرے گا، سنے گا، دَسے گا تے وڈیائی کرے گا۔ (‏یوحنا 16:‏7-‏15‏)‏ پر ایہدے توں ایہہ ثابت نئیں ہوندا کہ پاک روح اِک ہستی اے۔ پاک کلام چ حکمت، موت تے گُناہ لئی وی ایہو جہے لفظ استمال کیتے گئے نیں جیہڑے کسے ہستی لئی کیتے جاندے نیں۔ (‏امثال 1:‏20؛‏ رومیوں 5:‏17،‏ 21‏)‏ مثال دے طور تے بائبل چ حکمت دے کماں دا ذکر اے تے کہیا گیا اے کہ ایہدے بچے وی ہے نیں۔ ایہدے علاوہ ایہدے چ گُناہ بارے کہیا گیا اے کہ ایہہ پھساندا اے، ماردا اے تے لالچ پیدا کردا اے۔ پر کوئی وی ایہہ نئیں کہوے گا کہ حکمت یاں موت کوئی ہستی اے۔—‏متی 11:‏19؛‏ لُوقا 7:‏35؛‏ رومیوں 7:‏8،‏ 11‏۔‏

 غلط نظریہ:‏ یسوع مسیح دے رسول تے پہلی صدی چ یسوع مسیح دے ہور شاگرد ایہہ من دے سن کہ پاک روح اِک ہستی اے۔‏

 سچائی:‏ ایس گل دی حمایت نہ تے بائبل کردی اے تے نہ ای تاریخ۔ اِنسائیکلوپیڈیا بریٹانیکا چ دَسیا گیا اے:‏ 381 عیسوی چ ہون والی مجلس قسطنطنیہ چ ایہہ عقیدہ بنایا گیا کہ پاک روح خدا دا درجہ رکھن والی اِک الگ ہستی اے۔ اوس ویلے یسوع مسیح دے آخری رسول نُوں وی فوت ہوئے 250 سال توں بوہتا عرصہ ہو گیا سی۔‏