پاک کلام چ دَسیا گیا اے کہ غصے وچ بے قابو ہو جانا غلط اے۔ ایہدی وجہ توں نہ صرف غصہ کرن والے بندے نُوں سگوں دُوجیاں نُوں وی نقصان ہوندا اے۔ (‏امثال 29:‏22‏)‏ کدی کدار غصہ آن دی کوئی جائز وجہ ہو سکدی اے۔ پر خدا دے کلام چ دَسیا گیا اے کہ جیہڑے لوک بوہت زیادہ غصے چ آ جاندے نیں، اوہ نجات نئیں پان گے۔ (‏گلتیوں 5:‏19-‏21‏)‏ پاک کلام چ ایہو جیہے اصول دِتے گئے نیں جیہڑے غصے تے قابو پان چ کسے بندے دی مدد کر سکدے نیں۔‏

•  کیہہ غصہ کرنا ہمیشاں غلط ہوندا اے؟‏

•  غصہ کرنا کدوں غلط ہوندا اے؟‏

•  تُسی اپنے غصے تے کیویں قابو پا سکدے او؟‏

•  غصے بارے پاک کلام توں کجھ ایتاں

 جی نئیں۔ غصہ کرنا ہمیشاں غلط نئیں ہوندا۔ مثال دے طور جدوں خدا دے بندے نحمیاہ نُوں پتہ چلیا کہ اوہدے ہم‌ایماناں تے کِنّاں ظلم ہو رہیا اے تے اوہنوں بوہت غصہ آیا۔—‏نحمیاہ 5:‏6‏۔‏

 کدی کدار خدا نُوں وی غصہ آندا اے۔ مثال دے طور تے جدوں بنی‌اِسرائیل نے خدا نال کیتا ہویا وعدہ توڑ دِتا تے اوہدی عبادت چھڈ کے بُتاں دی پوجا کرن لگ پئے تے یہوواہ دا قہر اوہناں تے بھڑکیا۔ (‏قضاۃ 2:‏13، 14‏)‏ پر فیر وی یہوواہ دی پچھان ایس گل توں نئیں ہوندی کہ اوہ غصے والا خدا اے۔ اوہ جدوں وی غصہ کردا اے، اوہدے غصے دے پچھے ہمیشاں کوئی نہ کوئی جائز وجہ ضرور ہوندی اے تے اوہ غصے چ بے قابو نئیں ہوندا۔—‏خروج 34:‏6؛‏ یسعیاہ 48:‏9‏۔‏

 غصہ کرنا اوس ویلے غلط ہوندا اے جدوں اِک بندہ غصے چ آ کے اپنے آپ تے قابو نئیں رکھدا یاں اوہدے غصے دی وجہ جائز نئیں ہوندی۔ کیونکہ اَسی سارے انسان عیب‌دار آں ایس لئی اَسی سارے اکثر غصے چ بے قابو ہو جانے آں نالے بوہت سارے موقعیاں تے ساڈے کول غصہ کرن دی کوئی خاص وجہ وی نئیں ہوندی۔ آؤ، ایہدے بارے کجھ مثالاں تے غور کرئیے۔‏

•   جدوں خدا نے قائن دی قربانی نُوں قبول نئیں کیتا تے اوہ بوہت ای زیادہ غصے چ آ گیا۔ اوہدا غصہ ایناں زیادہ ودھ گیا کہ اوہنے اپنے ای بھرا ہابل نُوں قتل کر دِتا۔—‏پیدایش 4:‏3-‏8‏۔‏

•   جدوں خدا نے نینوہ دے لوکاں نُوں سزا دین دا فیصلہ بدل لیا تے یُوناہ نبی بوہت ای زیادہ غصے چ آ گیا۔ ایہدی وجہ توں خدا نے یُوناہ نبی دی اِصلاح کیتی۔ خدا نے اوہنوں سمجھایا کہ اوہدا غصہ جائز نئیں اے تے یُوناہ نُوں اوہناں لوکاں نال ہمدردی کرنی چاہی دی اے جنہاں نے اپنے گُناہواں توں توبہ کر لئی اے۔—‏یُوناہ 3:‏10–‏4:‏1،‏ 4،‏ 11‏۔‏ a

 ایہناں مثالاں توں پتہ چلدا اے کہ جیہڑا اپنے غصے تے قابو نئیں رکھدا اوہ خدا دی نظر چ نیک نئیں ٹھہر سکدا۔—‏یعقوب 1:‏20‏۔‏

•   یاد رکھو کہ غصے تے قابو نہ رکھنا کمزوری دی علامت اے۔‏ کجھ لوک شاید سوچن کہ جیہڑا بندہ غصے چ اپنی ساری بھڑاس کڈھ دیندا اے اوہ بڑا طاقت‌ور ہوندا اے۔ پر اصل چ جیہڑا اپنے غصے تے قابو نئیں رکھ سکدا اوہ بوہت ای کمزور ہوندا اے۔ پاک کلام چ لکھیا اے:‏ جیہڑا اپنے آپ تے قابو نہ رکھ سکے اوہ اوس شہر وانگوں اے جدیاں کنداں ڈھا دِتیاں گئیاں نیں۔ (‏امثال 25:‏28؛‏ 29:‏11‏)‏ ایہدی بجائے جے اَسی اپنے غصے نُوں قابو چ رکھنے آں تے اَسی ایہہ ظاہر کراں گے کہ اَسی اصل چ بہادر تے عقل‌مند آں۔ (‏امثال 14:‏29‏)‏ پاک کلام چ دَسیا گیا اے:‏ جیہڑا قہر کرن چ دھیما اے اوہ پہلوان توں بہتر اے۔—‏امثال 16:‏32‏۔‏

•   اپنے غصے نُوں ٹھنڈا کر لوو تاکہ تُسی کوئی ایہو جیہا کم نہ کر بیٹھو جدے تے توانوں پچھتانا پووے۔‏ پاک کلام چ لکھیا اے:‏ قہر توں باز آ تے غصے نُوں چھڈ دے۔ تنگ نہ پے۔ کیونکہ ایہدے توں بُرائی ای نکلدی اے۔ (‏زبور 37:‏8‏)‏ جدوں سانوں غصہ آندا اے تے ایہہ ساڈے اپنے ہتھ چ اے کہ اَسی اوس وقت کیہہ کراں گے۔ ایس توں پہلاں کہ اَسی غصے چ آ کے کوئی بوہت ای غلط کم کر بیٹھئے، سانوں اپنے غصے توں باز آ جانا چاہی دا اے۔ ایس بارے پاک کلام دا ایہہ مشورہ وی بڑا فائدےمند اے:‏ جدوں توانوں غصہ آئے تے گُناہ نہ کرو۔—‏اِفسیوں 4:‏26‏۔‏

•   جدوں توانوں غصہ آن لگے تے تھوڑی دیر لئی دُوجیاں کولوں دُور چلے جاؤ۔‏ پاک کلام چ دَسیا گیا اے:‏ جھگڑے دا شروع ہونا اِنج ای جیویں پانی پُھٹ پیندا اے ایس لئی لڑائی توں پہلاں جھگڑے نُوں چھڈ دَوو۔ (‏امثال 17:‏14‏)‏ جے تواڈا کسے بندے نال کوئی مسئلہ ہو جاندا اے تے ایہہ سمجھ‌داری دی گل ہوئے گی کہ ایس مسئلے نُوں جِنّی چھیتی ہو سکے حل کر لوو۔ پر ایہدے لئی ایہہ ضروری اے کہ پہلاں تُسی تے اوہ بندہ اپنے غصے نُوں ٹھنڈا کرے تاکہ تُسی مسئلے اُتے سکون نال گل کر سکو۔‏

•    معاملے نُوں پوری طرحاں سمجھو۔‏ پاک کلام چ لکھیا اے:‏ بندے دی تمیز اوہنوں قہر کرن چ دھیما بناندی اے۔ (‏امثال 19:‏11‏)‏ سمجھ‌داری ایہدے چ وے کہ اَسی پوری گل جانے بغیر ای کسے نتیجے تے نہ پونچ جائیے۔ جدوں اَسی پوری توجہ نال دُوجیاں دی گل سناں گے تے اَسی معاملے نُوں پوری طرحاں سمجھ جانواں گے تے اِنج اَسی بِلاوجہ غصہ کرن توں بچ جانواں گے۔—‏یعقوب 1:‏19‏۔‏

•    اِطمینان حاصل کرن لئی دُعا کرو۔‏ جدوں تُسی دُعا کرو گے تے خدا توانوں اوہ اطمینان دَوے گا جیہڑا سمجھ توں باہر اے۔ (‏فِلپّیوں 4:‏7‏)‏ دُعا دے ذریعے اَسی خدا دی پاک روح حاصل کر سکنے آں تے خدا دی پاک روح ساڈی مدد کرے گی کہ اَسی اپنے اندر اِطمینان، تحمل، تے ضبطِ‌نفس ورگیاں خوبیاں پیدا کر سکئے۔—‏لُوقا 11:‏13؛‏ گلتیوں 5:‏22، 23‏۔‏

•   سوچ سمجھ کے دوست بناؤ۔‏ جنہاں لوکاں نال اَسی بہندے کھلونے آں اَسی اوہناں ورگے ای بن جانے آں۔ (‏امثال 13:‏20؛‏ 1-‏کُرنتھیوں 15:‏33‏)‏ ایس لئی پاک کلام چ ایہہ نصیحت کیتی گئی اے:‏ غصے والے بندے نال دوستی نہ کر تے ظلم کرن والے بندے نال نہ جا۔ کِتے اِنج نہ ہوئے کہ تُوں اوہدیاں راہواں تے چلیں تے اپنی جان نُوں پھندے چ پھسائیں۔—‏امثال 22:‏24، 25‏۔‏