جی بالکل۔ اِبلیس اصل چ ہے وے۔ اوہ اِک ایہو جہی ہستی اے جنہے خدا دے خلاف بغاوت کیتی۔ اوہدے ناں دا مطلب اے جھوٹھے اِلزام لان والا۔ (‏یوحنا 14:‏30؛‏ افسیوں 6:‏11، 12؛‏ مکاشفہ 12:‏9‏)‏ پاک کلام چ اوہنوں کجھ ہور ناں وی دِتے گئے نیں جیویں کہ:‏

•   شیطان۔ ایہدا مطلب اے مخالفت کرن والا۔—‏ایوب 1:‏6‏۔‏

•   اژدہا۔ ایہہ لفظ ایہہ ظاہر کرن لئی بائبل چ استمال کیتا گیا اے کہ شیطان دھوکھےباز اے۔—‏2-‏کُرنتھیوں 11:‏3‏۔‏

•   ورغلان والا۔—‏متی 4:‏3‏۔‏

•   جھوٹھا۔—‏یوحنا 8:‏44‏۔‏

اِبلیس انسان دے اندر دی بُرائی دا ناں نئیں اے

 کجھ لوکاں دا خیال اے کہ اِبلیس انساناں دے اندر پائی جان والی بُرائی دا ناں اے۔ پر بائبل چ خدا تے اِبلیس دے وچ ہون والی گل بات دا ذکر کیتا گیا اے۔ خدا دی ذات کامل اے یعنی ہر طرحاں دی بُرائی توں پاک اے ایس لئی ایہہ صاف ظاہر اے کہ خدا اپنے اندر موجود بُرائی نال گل نئیں کر رہیا سی۔ (‏اِستثنا 32:‏4؛‏ ایوب 2:‏1-‏6‏)‏ اِک موقعے تے اِبلیس نے یسوع نُوں وی ورغلان دی کوشش کیتی جیہڑا گناہ توں پاک اے۔ (‏متی 4:‏8-‏10؛‏ 1-‏یوحنا 3:‏5‏)‏ سو بائبل توں پتہ چلدا اے کہ اِبلیس اِک حقیقی ہستی اے۔ ایہہ انساناں دے اندر پائی جان والی بُرائی دا ناں نئیں اے۔‏

 کیہہ سانوں ایس گل توں حیرانی ہونی چاہی دی اے کہ کئی لوک اِبلیس نُوں حقیقی ہستی نئیں من دے؟ بالکل وی نئیں۔ کیونکہ بائبل صاف دَسدی اے کہ اِبلیس اپنا مقصد پورا کرن لئی دھوکھا دیندا اے۔ (‏2-‏تھسلُنیکیوں 2:‏ 9، 10‏)‏ تے اوہدا اِک وڈا دھوکھا ایہہ وے کہ اوہنے لوکاں نُوں ایہہ تاثر دِتا اے کہ اوہ اصل چ ہے ای نئیں۔—‏2-‏کُرنتھیوں 4:‏4‏۔‏

غلط نظریہ:‏ اِبلیس دا اِک ہور ناں لُوسیفر اے۔‏

 حقیقت:‏ کجھ بائبل ترجمیاں چ جیس عبرانی لفظ دا ترجمہ لُوسیفر کیتا گیا اے اوہدا مطلب اے روشن۔ (‏یسعیاہ 14:‏12‏)‏ ایہہ لفظ بابل دے بادشاہواں دے غرور نُوں ظاہر کرن لئی استمال کیتا گیا۔ یہوواہ خدا اوہناں بادشاہواں نُوں اوہناں دے غرور دی وجہ توں شرمندہ کرن والا سی۔ (‏یسعیاہ 14:‏4،‏ 13-‏20‏)‏ ایس لئی جدوں اوہناں دی سلطنت ختم ہو گئی تے فیر لفظ روشن طنز دے طور تے اوہناں لئی استمال کیتا گیا۔‏

غلط نظریہ:‏ شیطان خدا دے وکیل دے طور تے کم کردا اے۔‏

 حقیقت:‏ اِبلیس خدا دا دُشمن اے نہ کہ اوہدا خادم۔ شیطان اِبلیس خدا دی خدمت کرن والے لوکاں تے جھوٹھے اِلزام لاندا اے تے اوہناں دی مخالفت کردا اے۔—‏1-‏پطرس 5:‏8؛‏ مکاشفہ 12:‏10‏۔‏