یسوع مسیح نے اپنی جان قربان کر کے اوہناں لوکاں لئی نجات دی راہ کھولی جیہڑے یہوواہ دے وفادار نیں۔ (‏متی 20:‏28‏)‏ ایسے لئی اوہنوں پاک کلام چ دُنیا دا نجات دہندہ کہیا گیا اے۔ (‏1-‏یوحنا 4:‏14‏)‏ پاک کلام چ ایہہ وی لکھیا ہویا اے کہ کسے ہور دے ذریعے نجات نئیں مِل سکدی کیونکہ خدا نے زمین تے کوئی ہور ناں نئیں چُنیا جدے ذریعے نجات ملے۔—‏اعمال 4:‏12‏۔‏

 یسوع مسیح نے اوہناں لئی موت دا مزہ چکھیا جیہڑے اوہدے تے ایمان ظاہر کردے نیں۔ (‏عبرانیوں 2:‏9؛‏ یوحنا 3:‏16‏)‏ فیر خدا نے اوہنوں زندہ کر دِتا تے اوہ اِک روحانی مخلوق دے طور تے اسمان تے واپس چلا گیا۔ (‏اعمال 3:‏15‏)‏ اوتھے اوہ اوہناں لوکاں نُوں نجات دَوا سکدا اے جیہڑے اوہدے وسیلے خدا کولوں دُعا کردے نیں کیونکہ اوہ ہمیشاں زندہ اے تے اوہناں لوکاں لئی ہمیشاں لئی اِلتجا کر سکدا اے۔—‏عبرانیوں 7:‏25‏۔‏

ایہہ کیوں ضروری اے یسوع ساڈے لئی اِلتجا کرے؟‏

 اَسی سارے گُناہ‌گار آں۔ (‏رومیوں 3:‏23‏)‏ گُناہ دی وجہ توں خدا نال انساناں دا رشتہ اِک طرحاں ٹُٹ گیا اے جدی وجہ توں انسان مردے نیں۔ (‏رومیوں 6:‏23‏)‏ پر یسوع اوہناں لوکاں لئی اِک وکیل دے طور تے کم کردا اے جیہڑے اوہدی قربانی تے ایمان ظاہر کردے نیں۔ (‏1-‏یوحنا 2:‏1‏، فٹ نوٹ)‏ اوہ اِک وکیل وانگوں اوہناں لئی اِلتجا کردا اے یعنی خدا کولوں درخاست کردا اے کہ اوہ اوہناں دِیاں دُعاواں سنے تے یسوع دی قربانی دی بِنا تے اوہناں دے گُناہ معاف کر دَوے۔ (‏متی 1:‏21؛‏ رومیوں 8:‏34‏)‏ خدا اوہناں اِلتجاواں نُوں سن دا اے جیہڑیاں یسوع کردا ے کیونکہ ایہہ اوہدی مرضی مطابق ہوندیاں نیں۔ اوہنے یسوع نُوں دُنیا چ ایس لئی گھلیا تاکہ دُنیا اوہدے ذریعے نجات پاوے۔—‏یوحنا 3:‏17‏۔‏

کیہہ نجات پان لئی یسوع تے ایمان لیانا ای کافی اے؟‏

 نئیں۔ ایہہ سچ اے کہ نجات پان لئی یسوع تے ایمان لیانا ضروری اے پر ایہہ کافی نئیں۔ (‏اعمال 16:‏30، 31‏)‏ پاک کلام چ دَسیا گیا اے کہ جیس طرحاں جسم ساہ دے بغیر مُردہ اے اوسے طرحاں ایمان اعمال دے بغیر مُردہ اے۔ (‏یعقوب 2:‏26‏)‏ ایس لئی نجات پان لئی ایہہ کم کرنے ضروری نیں:‏

•   یسوع مسیح تے اوہدے باپ یہوواہ نُوں چنگی طرحاں جانو۔—‏یوحنا 17:‏3‏۔‏

•   اوہناں تے اپنا ایمان مضبوط کرو۔—‏یوحنا 12:‏44؛‏ 14:‏1‏۔‏

•   اوہناں دے حکم من کے اپنا ایمان ظاہر کرو۔ (‏لُوقا 6:‏46؛‏ 1-‏یوحنا 2:‏17‏)‏ یسوع مسیح نے کہیا سی کہ جیہڑ ے لوک اوہنوں مالک مالک کہندے نیں اوہ نجات نئیں پان گے سگوں صرف اوہ لوک نجات پان گے جیہڑے اوہدے اسمانی باپ دی مرضی تے چلدے نیں۔—‏متی 7:‏21‏۔‏

•   مشکلاں دے باوجود خدا تے یسوع تے ایمان ظاہر کردے رہوو۔ یاد رکھو کہ یسوع نے کہیا سی کہ جیہڑا آخر تک ثابت‌قدم رہوے گا اوہی نجات پائے گا۔—‏متی 24:‏13‏۔‏