یوحنا دی اِنجیل 16:1-33
16 ”مَیں توانوں ایہہ گلاں ایس لئی دَسیاں نیں تاکہ تُسی ایمان توں پھر نہ جاؤ۔
2 لوک توانوں عبادتگاہواں چوں کڈھ دین گے۔* اصل چ اوہ ویلا آ رہیا اے جدوں لوک توانوں جانوں مار کے سوچن گے کہ اوہ خدا دی خدمت کر رہے نیں۔
3 اوہ ایہہ سب کجھ ایس لئی کرن گے کیونکہ اوہ نہ تے باپ نُوں جان دے نیں تے نہ ای مینوں۔
4 مَیں توانوں ایہہ گلاں ایس لئی دَسیاں نیں تاکہ جدوں ایہہ ہون تے توانوں یاد آئے کہ مَیں توانوں ایہناں بارے دَسیا سی۔
مَیں توانوں ایہہ گلاں پہلاں نئیں دَسیاں کیونکہ مَیں تواڈے نال ساں۔
5 پر ہُن مَیں اوہدے کول جا رہیا واں جنہے مینوں گھلیا اے۔ پر تواڈے وچوں کوئی وی نئیں پچھ رہیا کہ”تُوں کتھے جا رہیا ایں؟“
6 جیہڑیاں گلاں مَیں توانوں دَسیاں نیں اوہناں دی وجہ توں تواڈے دل دُکھ نال بھر گئے نیں۔
7 پر مَیں توانوں سچ کہہ رہیا واں کہ مَیں تواڈے ای فائدے لئی جا رہیا واں کیونکہ جے مَیں نہ گیا تے مددگار تواڈے کول نئیں آئے گا۔ پر جدوں مَیں جاواں گا تے مَیں اوہنوں تواڈے کول گھل دَواں گا۔
8 تے جدوں اوہ آئے گا تے اوہ دُنیا نُوں صاف صاف وکھائے گا کہ گُناہ، نیکی تے عدالت کیہہ اے۔
9 پہلے تے اوہ دُنیا دا گُناہ ظاہر کرے گا کیونکہ اوہ میرے تے ایمان نئیں لیا رہی۔
10 فیر اوہ میری نیکی ظاہر کرے گا کیونکہ مَیں باپ کول جا رہیا واں تے تُسی مینوں نئیں ویکھو گے۔
11 فیر اوہ ظاہر کرے گا کہ خدا کِدی عدالت کرے گا کیونکہ ایس دُنیا دے حاکم دے خلاف فیصلہ سُنا دِتا گیا اے۔
12 مَیں توانوں ہور وی بڑیاں گلاں دَسنا چاہنا واں۔ پر تُسی اوہناں نُوں حالے نئیں سمجھ سکدے۔
13 پر جدوں سچائی دی روح یعنی مددگار* آئے گا تے اوہ تواڈی رہنمائی کرے گا تاکہ تُسی سچائی نُوں پوری طرحاں سمجھ جاؤ۔ اوہ توانوں اپنے وَلّوں گلاں نئیں دَسے گا سگوں اوہی دَسے گا جو اوہ سُنے گا۔ اوہ توانوں اوہ گلاں دَسے گا جیہڑیاں ہون والیاں نیں۔
14 اوہ میری وڈیائی کرے گا کیونکہ اوہ توانوں اوہی گلاں دَسے گا جیہڑیاں اوہنے میرے کولوں سُنیاں نیں۔
15 جو کجھ باپ دا اے، اوہ سب میرا اے۔ ایس لئی مَیں توانوں کہیا اے کہ مددگار توانوں اوہی گلاں دَسے گا جیہڑیاں اوہنے میرے کولوں سُنیاں نیں۔
16 تھوڑے چِر بعد تُسی مینوں نئیں ویکھو گے۔ پر فیر تھوڑے چِر بعد تُسی مینوں ویکھو گے۔“
17 ایہہ سُن کے اوہدے شاگرد اِک دُوجے نُوں کہن لگ پئے: ”اوہدی ایس گل دا کیہہ مطلب اے کہ ”تھوڑے چِر بعد تُسی مینوں نئیں ویکھو گے۔ پر فیر تھوڑے چِر بعد تُسی مینوں ویکھو گے“؟ تے ”مَیں باپ کول جا رہیا واں“؟“
18 اوہ آپس چ ایہہ وی کہہ رہے سن: ”اوہدی ایس گل دا کیہہ مطلب اے کہ ”تھوڑے چِر بعد“؟ سانوں ایہہ گل سمجھ نئیں آ رہی۔“
19 یسوع نُوں پتہ سی کہ اوہدے شاگرد اوہدے کولوں سوال پچھنا چاہندے نیں۔ ایس لئی اوہنے کہیا: ”کیہہ تُسی آپس چ ایہہ گل کر رہے او کہ مَیں ایہہ کیوں کہیا اے کہ ”تھوڑے چِر بعد تُسی مینوں نئیں ویکھو گے۔ پر فیر تھوڑے چِر بعد تُسی مینوں ویکھو گے“؟
20 مَیں توانوں سچ کہنا واں کہ تُسی رووو گے تے پِٹو گے، پر دُنیا خوش ہوئے گی۔ تُسی دُکھی ہووو گے، پر تواڈا دُکھ خوشی چ بدل جائے گا۔
21 جدوں بچہ پیدا ہون دا ویلا آندا اے تے عورت نُوں بڑا درد ہوندا اے۔ پر جدوں بچہ پیدا ہو جاندا اے تے اوہ اپنے درد نُوں بُھل جاندی اے کیونکہ اوہنوں ایس گل دی خوشی ہوندی اے کہ اوہدا بچہ دُنیا چ آیا اے۔
22 ایسے طرحاں تُسی وی ہُن دُکھی ہو رہے او۔ پر مَیں توانوں فیر ملاں گا، اوہدوں تواڈے دل خوشی نال بھر جان گے تے کوئی وی تواڈے کولوں تواڈی خوشی نئیں کھوئے گا۔
23 اوس دن تُسی مینوں کوئی سوال نئیں پچھو گے۔ مَیں توانوں سچ کہنا واں کہ میرے ناں توں تُسی میرے باپ کولوں جو وی منگو گے، اوہ توانوں دَوے گا۔
24 ہُن تک تُسی میرے ناں توں کجھ وی نئیں منگیا۔ تُسی منگو تے توانوں دِتا جائے گا تاکہ تُسی خوشی نال بھر جاؤ۔
25 مَیں توانوں ایہہ گلاں مثالاں دے کے سمجھائیاں نیں۔ پر اوہ ویلا آ رہیا اے جدوں مَیں تواڈے نال مثالاں دے ذریعے گل نئیں کراں گا سگوں اپنے باپ بارے صاف صاف دَساں گا۔
26 اوس دن تُسی میرے ناں توں باپ کولوں درخاست کرو گے۔ میرے کہن دا مطلب ایہہ وے کہ مینوں تواڈے واسطے درخاست نئیں کرنی پووے گی
27 کیونکہ باپ آپ توانوں پیار کردا اے کیونکہ تُسی مینوں پیار کردے او تے توانوں یقین اے کہ خدا نے مینوں گھلیا اے۔
28 مَیں باپ دی مرضی نال دُنیا چ آیا واں تے ہُن دُنیا نُوں چھڈ کے باپ کول واپس جا رہیا واں۔“
29 شاگرداں نے کہیا: ”ہاں، ہُن تُوں مثالاں دے کے نئیں سگوں صاف صاف گل کر رہیا ایں۔
30 ہُن اَسی جان گئے آں کہ تینوں سب کجھ پتہ اے تے کسے نُوں وی تیرے کولوں سوال پچھن دی لوڑ نئیں۔ سانوں یقین آگیا اے کہ خدا نے تینوں گھلیا اے۔“
31 یسوع نے اوہناں نُوں جواب دِتا: ”کیہہ ہُن توانوں یقین آگیا اے؟
32 ویکھو، اوہ ویلا آن والا اے سگوں آگیا اے جدوں تُسی سارے اپنے اپنے گھر بھج جاؤ گے تے مینوں کلّا چھڈ دَوو گے۔ پر مَیں کلّا نئیں کیونکہ میرا باپ میرے نال اے۔
33 مَیں توانوں ایہہ گلاں ایس لئی دَسیاں نیں تاکہ توانوں میرے ذریعے اِطمینان ملے۔ دُنیا چ تواڈے تے مصیبتاں آن گیاں۔ پر حوصلہ رکھو! مَیں دُنیا تے فتح پا لئی اے۔“
فٹ نوٹ
^ یوحنا 9:22 دے فٹنوٹ نُوں ویکھو۔
^ ایہہ اوہی مددگار اے جدا ذکر یسوع نے 7 ایت چ کیتا۔ ایہہ مددگار پاک روح اے جیہڑی کوئی ہستی نئیں سگوں خدا دی طاقت اے۔
