فرض کرو کہ تُسی اِک عجائب گھر دی سیر کر رہے او جِتھے پرانے زمانے دِیاں بوہت ساریاں چیزاں نیں۔‏ زیادہ‌تر چیزاں دی حالت بوہت خراب اے تے ایہناں دے رنگ پھیکے پے گئے نیں۔‏ کجھ چیزاں تے اَدھیاں پچدیاں نیں۔‏ پر اچانک تواڈی نظر اِک ایہو جہی چیز تے پیندی اے جیہڑ‌ی باقی چیزاں نالوں بالکل فرق نظر آ رہی اے کیونکہ اوہدی حالت بالکل ٹھیک اے۔‏ جیہڑ‌ا بندہ توانوں عجائب گھر دی سیر کروا رہیا اے تُسی اوہنوں پچھدے او کہ ”‏کیہہ ایہہ چیز باقی چیزاں نالوں نوِیں اے؟‏“‏ اوہ بندہ توانوں جواب دیندا اے کہ ”‏نئیں،‏ سگوں ایہہ تے باقی چیزاں نالوں زیادہ پرانی اے تے ایہدی کدی مرمت وی نئیں کیتی گئی۔‏“‏ فیر تُسی پچھدے او کہ ”‏کیہہ ایس چیز نُوں باقی چیزاں نالوں زیادہ محفوظ رکھیا گیا سی؟‏“‏ اوہ کہندا اے کہ ”‏نئیں،‏ ایہنے تے سگوں موسم دِیاں بوہتیاں سختیاں دا سامنا کیتا اے۔‏ تے کجھ بھیڑے لوکاں نے ایہنوں تباہ کرن دی وی کوشش کیتی اے۔‏“‏ شاید تُسی ایہہ سن کے حیران ہو جاؤ تے سوچو کہ ”‏ایہہ چیز ہُن تک اینی چنگی حالت چ کیویں اے؟‏“‏

بائبل بالکل ایسے چیز وانگوں اے جیہڑ‌ی پرانی ہون دے باوجود وی صحی حالت چ موجود اے۔‏ ایہہ بوہت پرانی کتاب اے۔‏ بائبل دے علاوہ ہور وی پرانیاں کتاباں ہے نیں پر اوہناں دی حالت بالکل اُنج ای اے جیویں عجائب گھر چ رکھیاں ہوئیاں زیادہ‌تر چیزاں دی اے۔‏ مثال لئی ایہناں کتاباں چ پائی جان والی سائنسی معلومات نوِیں تحقیق نال میل نئیں کھاندی۔‏ ایہناں چ علاج بارے جیہڑ‌ے مشورے پائے جاندے نیں اوہناں دا فائدہ گھٹ تے نقصان بوہتا اے۔‏ ایہناں پرانیاں کتاباں دے بوہت سارے حصے یاں تے گواچ گئے نیں یاں فیر خراب ہو گئے نیں۔‏

بائبل ایہناں کتاباں توں بوہت فرق اے۔‏ ایہنوں اَج توں 35 سو سال پہلاں لکھنا شروع کیتا گیا سی پر ایہہ اَج وی بالکل صحی حالت چ اے۔‏ لوکاں نے صدیاں توں بائبل نُوں وار وار نقصان پونچان دی کوشش کیتی اے جیویں کہ ایہنوں ساڑیا گیا،‏ ایہنوں پڑھن تے پابندی لائی گئی تے ایہنوں جھوٹھا ثابت کرن دی کوشش وی کیتی گئی۔‏ پر کوئی وی ایہنوں مٹا نئیں سکیا۔‏ بائبل چ لکھیاں گلاں جدید تحقیق نال میل کھاندیاں نیں۔‏ ایہدے چ ایہو جہیاں گلاں وی لکھیاں نیں جنہاں نُوں سائنس‌دان اَج ہزاراں سال بعد سمجھ رہے نیں۔‏

شاید تُسی سوچو کہ”‏ کیہہ بائبل دے اصول اَج دے زمانے چ وی فائدے مند ہو سکدے نیں۔‏ “‏ ایہدا جواب جانن لئی تُسی ایس سوال تے غور کرو:‏ ”‏انساناں نُوں اَج کیہڑیاں مشکلاں دا سامنا اے؟‏“‏ شاید تُسی سوچو کہ جنگاں،‏ آلودگی ،‏جُرم تے کرپشن اَج دے سب توں وڈے مسٔلے نیں۔‏ آؤ ایس بارے بائبل دے کجھ اصولاں نُوں ویکھنے آں۔‏ ایہناں تے غور کردے ویلے اپنے آپ کولوں ایہہ سوال پچھو:‏ ”‏جے لوک ایہناں اصولاں تے چلدے تے کیہہ دُنیا دے حالات ہُن نالوں بہتر ہوندے؟‏“‏

امن تے صلح بارے اصول

اوہ لوک خوش رہندے نیں جیہڑ‌ے صلح پسند نیں کیونکہ اوہ خدا دے پُتر کہلان گے۔‏ (‏متی 5:‏9 )‏ جتھوں تک ممکن ہوئے،‏ اپنے وَلّوں ساریاں نال امن نال رہوو۔‏—‏رومیوں 12:‏18‏۔‏

رحم تے معافی بارے اصول

اوہ لوک خوش رہندے نیں جیہڑ‌ے رحمدل نیں کیونکہ اوہناں تے رحم کیتا جائے گا۔‏“‏ (‏متی 5:‏7‏)‏ جے توانوں اِک دُوجے نال شکایت وی ہووے تے اِک دُوجے دی برداشت کرو تے دلوں اِک دُوجے نُوں معاف کرو۔‏ جیس طرحاں یہوواہ  *نے توانوں دلوں معاف کیتا اے اوسے طرحاں تُسی وی دُوجیاں نُوں معاف کرو۔‏—‏کُلسّیوں 3:‏13‏۔‏

تعصب توں بچن بارے اصول

خدا نے اِک آدمی دے ذریعے ساریاں قوماں نُوں پیدا کیتا تاکہ اوہ زمین تے رہن تے زمانے مقرر کیتے تے ایہہ وی طے کیتا کہ انسان کتھے رہن گے۔‏ (‏اعمال 17:‏26‏)‏ خدا تعصب نئیں کردا سگوں اوہ ہر قوم چوں اوہناں لوکاں نُوں قبول کردا اے جیہڑ‌ے اوہدا خوف رکھدے تے چنگے کم کر دے نیں۔‏—‏اعمال 10:‏34،‏ 35‏۔‏

زمین دی دیکھ‌بھال کرن بارے اصول

یہوواہ خدا نے آدم نُوں لے کے عدن دے باغ چ رکھیا کہ اوہدی باغبانی تے نگہبانی کرے۔‏ (‏پیدایش 2:‏15‏)‏ خدا اوہناں لوکاں نُوں تباہ کر دے گا جیہڑ‌ے زمین نُوں تباہ کر رہے نیں۔‏—‏مکاشفہ 11:‏18‏۔‏

لالچ تے بدکاری توں نفرت کرن بارے اصول

خبردار رہوو تے ہر طرحاں دے لالچ توں بچو کیونکہ کوئی بندہ جِنّاں وی امیر ہووے اوہنوں اوہدے مال دی وجہ توں زندگی نئیں مِلدی۔‏ (‏لُوقا 12:‏15‏)‏ تُسی حرامکاری تے کسی طرحاں دی ناپاکی یاں لالچ دا ذکر تک نہ کرو کیونکہ مُقدس لوکاں لئی اِنج کرنا مناسب نئیں اے۔‏—‏اِفسیوں 5:‏3‏۔‏

ایمانداری تے محنت بارے اصول

اَسی ہر گل چ ایمان داری نال کام لینا چاہنے آں۔‏ (‏عبرانیوں 13:‏18‏)‏ چور اَگے توں چوری نہ کرے سگوں اپنے ہتھیں محنت کرے تے چنگا کم کرے تاکہ اوہ ضرورت‌منداں دی مدد کر سکے۔‏—‏اِفسیوں 4:‏28‏۔‏

ضرورت‌منداں دی مدد بارے اصول

بےحوصلہ لوکاں نُوں تسلی دَوو،‏ کمزوراں دی مدد کرو تے ساریاں نال صبر نال پیش آؤ۔‏(‏1-‏تھسلُنیکیوں 5:‏14‏)‏ یتیماں تے بیوہ عورتاں دی دیکھ‌بھال کرو۔‏—‏یعقوب 1:‏27‏۔‏

بائبل چ صرف اصول ای نئیں دَسے گئے سگوں ایہہ وی دَسیا گیا اے کہ اَسی ایہناں نُوں اپنی زندگی چ لاگو کیویں کر سکنے آں۔‏ جے سارے لوک ایہناں اصولاں دے مطابق زندگی گزارن تے فیر دُنیا دے بوہت سارے مسئلے حل ہو جان گے۔‏ بےشک،‏ بائبل دے اصول ساڈے زمانے لئی وی بڑے فائدے مند نیں۔‏ پاک کلام تے عمل کرن نال سانوں کیہڑے فائدے ہوندے نیں؟‏

سب توں سیانے بندے نے اِک وار کہیا سی کہ دانش مندی اپنے کماں توں نیک ثابت ہوندی اے۔‏ (‏متی 11:‏19‏)‏ کیہہ تواڈا وی ایہہ ای خیال اے؟‏ جدوں تُسی پاک کلام دِیاں گلاں تے عمل کرو گے تے فیر تُسی ویکھو گے کہ ایہہ گلاں کنیاں فائدےمند نیں۔‏ شاید تُسی سوچو:‏ ”‏جے بائبل دے اصول اینے فائدے مند نیں تے فیر کیہہ ایہہ چنگا نئیں ہوئے گا کہ ایہناں تے عمل کرکے میری زندگی چ وی تبدیلی آئے؟‏ ایہہ مسئلیاں دا سامنا کرن چ میری مدد کیویں کر سکدے نیں؟‏“‏ ایس سلسلے چ اِک تجربے تے غور کرو۔‏

ڈلفین * دی زندگی بڑی ودھیا چل رہی سی۔‏ پر اچانک اوہدے تے مشکلاں دا پہاڑ ٹُٹ پیا۔‏ اوہدی جوان دھی مر گئی،‏ اوہدی طلاق ہو گئی تے اوہنوں پیسے دھیلے دی تنگی وی ہو گئی۔‏ اوہ دَسدی اے:‏ ”‏مینوں لگیا کہ میری دُنیا اُجڑ گئی اے،‏ نہ دھی رہی،‏ نہ شوہر تے نہ ای گھر۔‏ مینوں لگیا کہ میری پچھان،‏ میری طاقت ایتھوں تک کہ میرے جین دی امید وی ختم ہو گئی سی۔‏“‏

ڈلفین نے اپنی زندگی چ ایس گل دا تجربہ کیتا:‏ ساڈی عمر دی حد 70سال یاں طاقت ہووے تے 80 سال تک ہوندی اے۔‏ پر ایہہ سال وی دُکھ تے مصیبتاں نال بھرے ہوندے نیں۔‏ کیونکہ ایہہ چھیتی چلے جاندے نیں تے اَسی غائب ہو جانے آں۔‏—‏ زبور 90:‏10‏۔‏

ڈلفین نُوں اوکھے ویلے چ بائبل توں مدد ملی۔‏ بائبل دِیاں ہدیتاں تے چلن نال اوہنوں بوہت فائدہ ہویا۔‏ بوہت سارے لوکاں نے بائبل دی صلاح تے عمل کر کے اپنے مسئلیاں نُوں حل کیتا اے۔‏ اوہناں نے وی اوہی گل محسوس کیتی اے جیہڑ‌ی ایس مضمون دے شروع چ دَسی گئی سی کہ بائبل دُنیا دِیاں دُوجیاں کتاباں توں بالکل فرق اے۔‏ ایہدے چ لکھیاں گلاں کدی وی پرانیاں نئیں ہوندیاں۔‏ ایہدی وجہ ایہہ اے کہ بائبل نُوں لکھاؤن والا کوئی انسان نئیں سگوں خدا اے۔‏—‏ 1-‏تھسلُنیکیوں 2:‏13‏۔‏

شاید تُسی وی سوچو کہ زندگی بوہت چھوٹی اے تے مسئلیاں نال بھری ہوئی اے۔‏ جدوں تواڈے لئی مشکلاں دا سامنا کرنا اوکھا ہوندا اے تے تُسی مدد،‏ تسلی تے بھروسے مند صلاح کتھوں لیندے او؟‏

آؤ تِن طریقیاں تے غور کرئیے جنہاں توں پتہ چلدا اے کہ بائبل دی صلاح تے عمل کرن نال تواڈی زندگی سنور سکدی اے۔‏ ایہہ توانوں سکھا سکدی اے کہ

1. تُسی کیویں جتھوں تک ہو سکے مسئلیاں توں بچ سکدے او۔‏

2. تُسی کیویں مسئلے حل کر سکدے او۔‏

3. تُسی کیویں اوہناں حالاتاں دا سامنا کر سکدے او جنہاں نُوں تُسی بدل نئیں سکدے۔‏