آؤ،‏ اِک منڈُے بارے پڑھیے جنہے اپنے ماموں دی جان بچائی۔‏ ایس منڈُے دے ماموں پولُس رسول سن۔‏ بائبل چ ایس منڈُے دا ناں نئیں دسیا گیا۔‏ پر ایہہ ضرور دسیا گیا اے کہ ایس منڈُے نے بوہت بہادری والا کم کیتا سی۔‏ کیہہ تُسی جاننا چاہندے او کہ اوہنے کیہہ کیتا سی؟‏—‏

پولُس رسول شہر یروشلیم دی اِک جیل وچ سن۔‏ توانوں پتہ اے کہ اوہ جیل وچ کیوں سن؟‏ کیونکہ اوہ لوکاں نُوں یسوع مسیح دے بارے دسدے سن۔‏ ایس کر کے دُشمناں نے اوہناں نُوں جیل چ بند کروا دِتا۔‏ کجھ بھیڑے آدمی پولُس توں بوہت نفرت کردے سن۔‏ ایس لئی اوہناں نے پولُس نُوں جانوں مارن لئی اِک چال چلی۔‏ اوہناں نے کہیا:‏ چلو،‏ فوجی افسر نُوں کہنے آں کہ اوہ پولُس نُوں جیل توں عدالت چ لیاؤن دا حکم دَوے۔‏ اَسی سڑک دے آسے پاسے لک جاواں گے۔‏ جدوں سپاہی پولُس نُوں اوتھوں دی لے کے جان گے تے اَسی اوہنوں مار دَواں گے۔‏

پولُس دے بھانجے نے ایہناں آدمیاں دیاں گلاں سُن لئیاں۔‏ توانوں پتہ اے کہ اوہنے کیہہ کیتا؟‏ اوہ جیل چ گیا تے پولُس نُوں دُشمناں دی چال دے بارے دسیا۔‏ پولُس نے اوہنوں کہیا:‏ چھیتی نال جا کے فوجی افسر نُوں ایہہ گل دس دے۔‏ کیہہ پولُس دے بھانجے لئی فوجی افسر نُوں ایہہ گل دسنا سوکھا سی؟‏—‏ نئیں۔‏ کیونکہ ایہہ افسر بڑا وڈا آدمی سی۔‏ پولُس دا بھانجا بوہت بہادر سی۔‏ اوہنے فوراً جا کے اوس افسر نُوں ساری گل دس دِتی۔‏

جدوں افسر نُوں ایس گل دا پتہ چلیا تے اوہنے پنج سو فوجیاں نُوں حکم دِتا کہ اَج رات ای پولُس نُوں لے کے شہر قیصریہ چلے جاؤ۔‏ کیہہ پولُس بچ گئے؟‏—‏ جی۔‏ ایس طرحاں دُشمناں دی چال ناکام ہو گئی تے اوہ پولُس تے حملہ نہ کر سکے۔‏

تُسی ایس کہانی توں کیہہ سکھیا اے؟‏—‏ تُسی وی پولُس دے بھانجے وانگوں بہادر بن سکدے او۔‏ دُوجیاں نال یہوواہ خدا دے بارے گل کردیاں سانوں دلیر بنن دی لوڑ اے۔‏ کیہہ تُسی دلیر بنو گے تے لوکاں نُوں یہوواہ خدا دے بارے دسدے رہوو گے؟‏—‏ جے تُسی ایس طرحاں کرو گے تے تُسی وی کسے دی جان بچا سکو گے۔‏