ایہہ سچ اے کہ گھر وچ چھوٹے جہے مہمان دے آؤن نال خوشیاں دی بہار آ جاندی اے۔ پر ایہدے نال نال اِک جوڑے دے موڈھیاں اُتے بھاری ذمے‌داری وی پے جاندی اے۔ بچے دی پیدائش توں بعد توانوں احساس ہوندا اے کہ بچے دی سانبھ سنبھال چ کِنّاں وقت تے کِنّی طاقت لگدی اے۔ نیند پُوری نہ ہون تے جذباتاں چ بدلاؤ آؤن دی وجہ توں تواڈے دونواں چ دُوری آ سکدی اے۔ بچے نُوں سنبھالن تے اپنے بندھن نُوں مضبوط رکھن لئی توانوں زندگی وچ کجھ ردوبدل کرن دی لوڑ پوے گی۔ ایس سلسلے چ بائبل دیاں ہدیتاں تواڈے بوہت کم آؤن گیاں۔‏

پاک کلام دسدا اے:‏ محبت صبر کردی اے تے مہربان اے۔ نالے محبت مطلبی نئیں ہوندی تے غصے چ بھڑک دی نئیں۔ (‏1-‏کُرنتھیوں 13:‏4، 5‏)‏ ایہہ کوئی عجیب گل نئیں کہ پہلی واری ماں بنن توں بعد تواڈا سارا دھیان بچے وَل ہووے گا۔ جیس کر کے تواڈے شوہر نُوں لگ سکدا اے کہ تُسی اوہنوں بُھل گئے او۔ ایس لئی یاد رکھو کہ اوہنوں وی تواڈے پیار دی لوڑ اے۔ پیار تے صبر نال اپنے شوہر نُوں دسو کہ بچے دی دیکھ‌بھال کرن لئی توانوں اوہدی مدد دی لوڑ اے۔‏

شوہرو، اپنی بیوی دیاں ذمے‌داریاں نُوں سمجھن دی کوشش کرو۔ (‏1-‏پطرس 3:‏7‏)‏ ایہہ یاد رکھو کہ اوہدا زیادہ تر وقت بچے دی دیکھ‌بھال کرن چ لگ جاندا اے۔ ہُن اوہدے سِر تے کئی نویاں ذمے‌داریاں پے گئیاں نیں جیس کر کے اوہ پریشانی، تھکاوٹ تے مایوسی دا شکار ہو سکدی اے۔ کدی کدی ہو سکدا اے کہ اوہ تواڈے تے اپنا غصہ کڈھے پر تُسی ٹھنڈے دماغ نال کم لوَو کیونکہ پاک کلام دسدا اے کہ جیہڑا قہر کرن چ دھیما اے اوہ پہلوان توں بہتر اے۔ (‏امثال 16:‏32‏)‏ سمجھ‌داری نال کم لوَو تے ذمے‌داریاں نبھاؤن چ اوہدا پُورا پُورا ساتھ دَوو۔—‏امثال 14:‏29‏۔‏

تُسی کیہہ کر سکدے او؟‏

• باپ:‏ بچے نُوں سنبھالن چ اپنی بیوی دی مدد کرو بھانویں ادھی رات ای کیوں نہ ہوئے۔ ہور کماں چ گھٹ وقت لاؤ تاکہ تواڈے کول اپنی بیوی تے بچے لئی چوکھا وقت ہووے۔‏

• ماں:‏ جے تواڈا شوہر بچے نُوں سنبھالن چ تواڈی مدد کرنی چاہوے تے اوہنوں منع نہ کرو۔ جے اوہ کوئی کم صحی طرحاں نئیں وی کر پاؤندا تاں وی نقص نہ کڈھو سگوں اوہنوں پیار نال کم کرن دا طریقہ دسو۔‏

پاک کلام دسدا اے:‏ اوہ اِک تن ہون گے۔ (‏پیدایش 2:‏24‏)‏ بھانویں کہ گھر چ اِک نواں جی آ گیا اے پر یاد رکھو کہ تُسی دونویں حالے وی اِک تن او۔ ایس لئی اپنے رشتے نُوں مضبوط بناؤن لئی کوئی کسر نہ چھڈو۔‏

جے تُسی اِک بیوی او تے اپنے شوہر نُوں دسو کہ تُسی اوہدی مدد تے تعاون لئی بوہت شکرگزار او۔ شوہر دی تعریف چ کہے گئے دو مِٹھے بول تواڈے بندھن نُوں ہور مضبوط بنا سکدے نیں۔ (‏امثال 12:‏18‏)‏ جے تُسی اِک شوہر او تے اپنی بیوی نُوں دسو کہ تُسی اوہنوں کِنّاں پیار کردے او تے تواڈے دل چ اوہدے لئی کِنّی قدر اے۔ گھرانے دی دیکھ‌بھال کرن لئی جیس طرحاں اوہ محنت کردی اے اوہدے لئی اوہدی تعریف کرو۔—‏امثال 31:‏10،‏ 28‏۔‏

پاک کلام چ دسیا گیا اے کہ کوئی وی اپنے فائدے بارے نئیں سگوں دُوجیاں دے فائدے بارے سوچے۔ (‏1-‏کُرنتھیوں 10:‏24‏)‏ ہمیشاں اپنے ساتھی دے بھلے بارے سوچو۔ اِک دُوجے دی تعریف کرن، اِک دُوجے نال گل کرن تے اِک دُوجے دی گل سُنن لئی وقت کڈھو۔ سیکس دے معاملے چ خودغرض نہ بنو سگوں اپنے ساتھی دیاں لوڑاں بارے وی سوچو۔ پاک کلام دسدا اے کہ میاں بیوی اِک دُوجے دا حق ادا کرن۔ (‏1-‏کُرنتھیوں 7:‏3-‏5‏)‏ ایس لئی ایس معاملے بارے اِک دُوجے نال کُھل کے گل کرو۔ جے تُسی صبر تے سمجھ‌داری نال کم لوَو گے تے تواڈا بندھن مضبوط رہوے گا۔‏

تُسی کیہہ کر سکدے او؟‏

• کٹھے وقت گزارو۔‏

• چھوٹیاں چھوٹیاں گلاں دے ذریعے اپنے ساتھی لئی پیار دا اظہار کرو جیویں کہ کوئی کارڈ یاں کوئی تحفہ دے کے۔‏

پاک کلام دسدا اے:‏ تیمُتھیُس دی بچپن توں ای پاک صحیفیاں مطابق تربیت کیتی گئی سی۔ (‏2-‏تیمُتھیُس 3:‏15‏)‏ ایسے طرحاں توانوں وی پہلے توں ای سوچ لینا چاہیدا اے کہ تُسی بچپن توں اپنے بچے دی تربیت کیویں کرو گے۔ بچہ ماں دے پیٹ چ وی بوہت کجھ سکھ سکدا اے۔ اوہ تواڈی آواز نُوں پچھان سکدا اے نالے تواڈی خوشی، غمی تے غصے نُوں محسوس کر سکدا اے۔ کجھ دِناں یاں مہینیاں دے بچے نُوں وی کجھ نہ کجھ ضرور پڑھ کے سناؤ بھانویں اوہنوں سمجھ نہ وی آوے۔ جے تُسی اِنج کردے رہوو گے تے وڈیاں ہو کے اوہنوں وی پڑھن دا شوق ہووے گا۔‏

ایہہ نہ سوچو کہ تواڈا بچہ حالے بوہت چھوٹا اے تے اوہدے نال خدا بارے گلاں کرن دا کوئی فائدہ نئیں۔ اپنے بچے نال مِل کے دُعا کرو تاکہ اوہ سُنے کہ تُسی یہوواہ نال کیویں گلاں کردے او۔ (‏اِستثنا 11:‏19‏)‏ جدوں تُسی اپنے بچے نال کھیڈدے او تے اوہدوں وی خدا دیاں بنائیاں چیزاں بارے اوہدے نال گل کرو۔ (‏زبور 78:‏3، 4‏)‏ عمر ودھن دے نال نال اوہنوں پتہ چلدا جائے گا کہ تُسی یہوواہ خدا نُوں کِنّاں پیار کردے او۔ ایس طرحاں اوہ وی خدا نُوں پیار کرنا سکھے گا۔‏

تُسی کیہہ کر سکدے او؟‏

• دُعا چ خدا توں حکمت منگو تاکہ تُسی اپنے بچے دی تربیت کر سکو۔‏

• اپنے بچے نال خدا بارے گلاں کریا کرو تاکہ اوہ چھوٹی عمر توں ای اوہدے بارے سکھنا شروع کر دَوے۔‏