ایہہ سچ اے کہ تُسی پُوری کوشش کردے او کہ تواڈا خاندان ہسدا وسدا رہوے۔ پر فیر وی اچانک کوئی مصیبت تواڈی زندگی نُوں ہلا کے رکھ سکدی اے تے تواڈی خوشی غمی چ بدل سکدی اے۔ (‏واعظ 9:‏11‏)‏ ایہناں مشکل گھڑیاں دوران خدا سانوں بڑے پیار نال سنبھال دا اے۔ جے تُسی پاک کلام دی رہنمائی تے چلو گے تے تُسی تے تواڈا خاندان ہر اوکھی گھڑی دا ڈٹ کے سامنا کر سکو گے۔‏

پاک کلام دسدا اے:‏ اپنیاں ساریاں پریشانیاں اوہدے اُتے سُٹ دَوو کیونکہ اوہنوں تواڈی فکر اے۔ (‏1-‏پطرس 5:‏7‏)‏ ایہہ گل ہمیشاں یاد رکھو کہ خدا تواڈے اُتے مصیبتاں نئیں لیاؤندا۔ (‏یعقوب 1:‏13‏)‏ جے تُسی خدا دے نیڑے ہووو گے تے اوہ تواڈیاں امیداں توں کِتے ودھ تواڈی مدد کرے گا۔ (‏یسعیاہ 41:‏10‏)‏ اپنے دل دا حال اوہدے سامنے کھول دَوو۔—‏زبور 62:‏8‏۔‏

ہر روز بائبل پڑھن تے ایہدے تے سوچ وچار کرن نال توانوں تسلی ملے گی۔ تد تُسی ویکھو گے کہ یہوواہ تواڈیاں ساریاں مصیبتاں وچ کیویں توانوں تسلی دیندا اے۔ (‏2-‏کُرنتھیوں 1:‏3، 4؛‏ رومیوں 15:‏4‏)‏ خدا وعدہ کردا اے کہ اوہ توانوں ایسا اطمیناں دَوے گا جیہڑا سمجھ توں باہر اے۔—‏فِلپّیوں 4:‏6، 7،‏ 13‏۔‏

تُسی کیہہ کر سکدے او؟‏

• یہوواہ توں دُعا کرو تاکہ تُسی ٹھنڈے دماغ نال سوچ سکو۔‏

• اپنے خاندان نُوں مشکل وچوں کڈھن لئی سارے طریقیاں تے سوچ وچار کرو تے فیر سب توں ودھیا طریقہ چُنو۔‏

پاک کلام دسدا اے:‏ ہوشیار دا دل علم حاصل کردا اے تے دانا دے کن علم دے طالب نیں۔ (‏امثال 18:‏15‏)‏ پتہ لاؤ کہ گھر دے جیاں تے کیہہ بیت رہی اے۔ فیر ویکھو کہ ہر جی دیاں لوڑاں کیہہ نیں۔ اوہناں نال گل کرو تے اوہناں دی گل غور نال سنوُ۔—‏امثال 20:‏5‏۔‏

جے تواڈا کوئی رشتے‌دار یا پیارا دوست فوت ہو جائے تے اوہدے وچھڑن دا غم دل چ دبا کے نہ رکھو۔ تُسی رو کے دل ہولا کر سکدے او۔ یاد رکھو کہ یسوع مسیح وی اپنے دوست لعزر دی موت ویلے روئے سن۔ (‏یوحنا 11:‏35؛‏ واعظ 3:‏4‏)‏ تھوڑا آرام کرن تے سون نال وی تواڈے دل دا بھار ہولا ہو سکدا اے۔ (‏واعظ 4:‏6‏)‏ ایس طرحاں توانوں اپنے غم تے قابو پاؤن چ مدد ملے گی۔‏

تُسی کیہہ کر سکدے او؟‏

• اپنے گھر والیاں نال گل بات کرن دی عادت بناؤ تاکہ کوئی مصیبت آؤن تے اوہ تواڈے نال کُھل کے گل کر سکن۔‏

• اوہناں لوکاں نال گل کرو جیہڑے تواڈے ورگے حالاتاں وچوں لنگھ چُکے نیں۔‏

پاک کلام دسدا اے:‏ دوست ہر ویلے پیار وکھاؤندا اے تے مصیبت دے دن بھرا وانگوں کم آؤندا اے۔ (‏امثال 17:‏17‏)‏ ہو سکدا اے کہ تواڈے دوست توانوں سہارا دینا چاہندے ہون پر شاید اوہناں نُوں پتہ ای نہ ہووے کہ توانوں کیس قسم دی مدد دی لوڑ اے۔ ایس لئی اوہناں نُوں صاف صاف اپنیاں مشکلاں بارے دسو۔ (‏امثال 12:‏25‏)‏ نالے تُسی خدا دے کلام دی چنگی سمجھ رکھن والے لوکاں توں مدد لے سکدے او۔ اوہ توانوں بائبل چوں رہنمائی دین گے جدے نال توانوں سہارا ملے گا تے خدا نال تواڈا رشتہ مضبوط رہوے گا۔—‏یعقوب 5:‏14‏۔‏

اوہناں لوکاں نال میل جول رکھ کے توانوں سہارا ملے گا جیہڑے خدا تے اوہدے وعدیاں اُتے پکا ایمان رکھدے نیں۔ مصیبت چ پھسے لوکاں دی مدد کر کے وی توانوں بڑا حوصلہ ملے گا۔ اوہناں نُوں یہوواہ خدا تے اوہدے وعدیاں بارے ضرور دسو۔ نالے اوہناں لوکاں توں دُور دُور نہ رہوو جیہڑے توانوں پیار کردے تے تواڈی پرواہ کردے نیں۔—‏امثال 18:‏1؛‏ 1-‏کُرنتھیوں 15:‏58‏۔‏

تُسی کیہہ کر سکدے او؟‏

• کسے دوست نال گل کرو تے اوہدی مدد قبول کرو۔‏

• اوہنوں اپنیاں مشکلاں بارے صاف صاف دسو۔‏