TEPIN Kristian ko kin doadoahk laud pwehn kalohki duwen “rongamwahu en Wehin Koht” ong aramas tohto ni uwen me irail kak. (Mad. 24:14) Ekei pil seiloakla ni sahpw teikan. Karasepe, wahnpoaron Pohl kohla wasa ehu me met adaneki Turkey oh kalohk erein eh wia doadoahk en misineri. a Sounpar 2,000 samwa mwuri, nan pahr 2014, Turkey pil pwurehng wia wasa ehu me doadoahk tohrohr en kalohk wiawi ie. Dahme kahrehda koasoandi en doadoahk tohrohr wet wiawihda? Ihs me iang doadoahk wet?

Mie sounkalohk daulih 2,800 nan Turkey, ahpw aramas isidep duwerar (79,000,000) me mi nan sahpwo. Met wehwehki emen sounkalohk ong aramas 28,000. Eri kitail kak medewehla me sounkalohk kan kin kak tuhwong me malaulaute nan sahpwo. Arail mehn akadei ong doadoahk tohrohr wet iei en kalohk ong aramas tohto ni uwen me re kak erein ahnsou mwotomwot ehu. Riatail Kristian mpen meh 550 me kin lokaiahki lokaiahn Turkey sang sahpw teikan seiloakla Turkey oh iang riatail kan wasao kalohk erein doadoahk tohrohr wet. Dahme pweida?

Kalohk lella wasa koaros. Ehu mwomwohdiso nan Istanbul koasoia: “Ni aramas akan ar kilangkitda, re idek: ‘Mie mihting tohrohr ehu me wiawi wasaht? Se kilang Sounkadehdehn Siohwa kan wasa koaros!’” Ehu mwomwohdiso nan kahnimw en Izmir koasoia: “Ohl emen me kin doadoahk ni wasahn daksi kan idek rehn emen elder, ‘Dahme wiewiawi? Kumwail kalaudehla amwail doadoahk en kalohk?’” Ei, aramas akan tehk duwen doadoahk tohrohr wet.

Irail kan sang sahpw teikan me towehda doadoahk wet uhdahn perenki kalohk wasao. Steffen, sang Denmark, nda: “Rahn koaros, I kin kak kalohk ong aramas akan me saikinte rong duwen Siohwa. I pehm me I uhdahn padahkihong me tohto duwen mwaren Siohwa.” Jean-David sang France nda: “Se kalohk nan ehute ahl erein awa tohto. E uhdahn kaperen! Me tohto sehse ihs Sounkadehdehn Siohwa kan. Kereniong wenihmw koaros se kin kak koasoiong tohnihmw kan, kasalehiong irail ehu kasdo, oh pwilikihdi sawaspen Paipel kan.”

Irail meh 550 ko me iang towehda doadoahk wet pwilikihdi sawaspen Paipel 60,000 nan wihk riaute!  Doadoahk tohrohr wet uhdahn lella wasa koaros nan sahpwo.

Arail ngoangki doadoahk en kalohk laudla. Doadoahk tohrohr wet kamwakid riatail Kristian ko wasao. Me tohto tepida medemedewe ren doadoahngki pali laud en arail ahnsou ong papah Siohwa. Nempehn pioneer kan nan Turkey laudla persent 24 erein sounpwong 12 mwurin doadoahk tohrohr wet.

Sounkalohk kan sang sahpw teikan me towehda doadoahk wet kasalehda ia duwen doadoahk tohrohr wet eh kamwakid mwomwen arail kin kalohk mwurin arail pwurala sapwarailo. Şirin, sister men sang Sehmen, nda: “Riat Kristian ko nan Turkey kin mengeiki kalohk ong aramas ni ahnsou sohte lipilipil. I uhdahn kin namenek ni ahnsou me I kin wia wiepen kalohk wet. Ahpw pwehki doadoahk tohrohr wet, mehn kahlemeng en riatail ko wasao, oh kapakap laud, I kakehr wia dahme I sohte kak wia mwoweo. I pil kalohk oh pwilikihdi kisin doaropwe kan ni wasahn kisa kan! Met I solahr nohn namenek duwehte mahso.”

Johannes sang Sehmen, nda: “I esehla ekei mehn kasukuhl kan ong pein ei wiepen kalohk. Riatail ko nan Turkey kin uhdahn men ehukihong aramas tohto duwen padahk mehlel ni uwen me re kak. Re kin isaneki ahnsou sohte lipilipil en kalohk ong meteikan. I pilada en pil wia duwehte ni ei pwurala Sehmen. Oh met I uhdahn kin kalohk ong aramas tohtohsang mahso.”

Zeynep sang France, nda: “Doadoahk tohrohr wet uhdahn kamwakid mwomwen wiepen ei kalohk. E sewese ie en kalaudehla ei kin eimah oh likih Siohwa.”

Sounkalohk kan karanihala emenemen. Re sohte kak manokehla limpoak oh miniminpenehn riatail Kristian ko sang sahpw teikan. Jean-David, me kitail koasoia mwoweo, nda: “Se ‘song’ kadek sapan en riatail ko.” E pil nda: “Re wiahkinkitla kompoakparail oh kisehn arail peneinei. Re kasamwolong kiht nan imwarail kan. I ese me kitail wia pirien en Kristian ehu nan sampah pwon; I kin wadek duwen met pak tohto nan neitail sawaspen Paipel kan. Ahpw ih tepin ei kehnda duwen met. Met pil kalaudehla ei pohlki ei wia kisehn sapwellimen Siohwa aramas akan, oh I kalahngankihong ih pai kaselel wet.”

 Claire sang France, nda: “Mehnda ma se kohsang Denmark, France, Sehmen, de Turkey, kiht koaros peneinei ehu. E mwomwen me Koht ketin irisasang irepen sahpw koaros.”

Stéphanie sang France pil nda: “Doadoahk tohrohr wet padahkihong kiht me kaidehn tiahk de lokaia me kin kaminiminpene kiht ahpw at limpoak ong Siohwa.”

Irail ko me kohsang sahpw teikan me iang towehda doadoahk wet tepida medewe en keseula Turkey pwehn sewese doadoahk laud me anahnte wasao. Me malaulaute me keseulahr wasao. Kitail koaros uhdahn kalahnganki irail pwukat me kin toukihda pein irail en papah wasa me anahn laud mie ong sounkalohk.

Karasepe, mie kisin pwihn en sounkalohk 25 nan ehu wasa. Erein sounpar tohto, elder emente me mi nan pwihn wet. Medewehla peren en sounkalohk ko pwehki nan pahr 2015, sounkalohk wenemen sang Sehmen oh Netherlands keseula wasao pwehn sewese irail!

Dahme sounkalohk kan me keseula Turkey erein ahnsou ehu ndahki mwomwen arail mour wasao? Mehlel, ekei pak e kin apwal, ahpw re uhdahn kin paiekihda doadoahk wet. Tehk dahme ekei irail nda:

Federico, brother pwopwoud men me sounpar 40 samwa me keseusang Spain, nda: “Ei sohte ahneki kepwe tohto kin sewese ie en ahneki saledek, oh e kin mweidohng ie en medemedewehte dahme keieu kesempwal.” Ia duwe, e pahn kangoange meteikan en wia soangen doadoahk wet? E nda: “Ei, uhdahn! Ni omw keseula ehu wasa pwehn sewese aramas akan en esehla Siohwa, ke kin uhdahn mweidohng ih en ketin seweseiuk. Ke uhdahn kin pehm sapwellimen Siohwa epwel mwahu laudsang mahs.”

Rudy, brother pwopwoud men sang Netherlands me kereniong sounpar 60, nda: “Se uhdahn perenki at papah wasa me anahn laud mie ong sounkalohk oh en kalohk ong aramas tohto me saikinte rong duwen padahk mehlel. At kilang peren en irail  kan me esehla padahk mehlel kin uhdahn kaperenda kiht.”

Sascha, brother pwopwoud men sang Sehmen me sounpar 40 samwa, nda: “Ahnsou koaros me I kin kohla kalohk, I kin tuhwong aramas akan me ahpwtehn rong duwen padahk mehlel. Ei kihong irail ahnsou mwahu en esehla Siohwa kin uhdahn kaperenda ie.”

Atsuko, sister pwopwoud men sang Sapan me sounpar 35 samwa, nda: “Mahso, I kin ahnsou koaros men Armakedon en mwadang wiawi. Ahpw mwurin ei keseula Turkey, I kalahngankihong Siohwa me e kin ketin kanengamahte. Ni ei kin kalapw kilang mwomwen eh kin ketin kaweid irair kan, met kalaudehla ei men karanihala ih.”

Alisa, sister men sang Russia me sounpar 30 samwa, nda: “Ei papah Siohwa ni ahl wet kin sewese ie en pehm sapwellime kalahngan.” (Mel. 34:8) E pil nda: “Siohwa sohte ketin wiahte Semei ahpw e pil ketin wia Kompoakepahi keren men, me I kin esehla mwahu nan soangsoangen irair koaros. Mie ahnsou kaperen tohto nan ei mour oh I pil ahneki kapai tohto!”

Rongamwahwo lellahng aramas tohto pwehki doadoahk tohrohr en kalohk wet nan Turkey. Ahpw, miehte wasa me rongamwahwo saikinte lel. Rahn koaros, sounkalohk kan me keseula Turkey kin tuhwong aramas akan me saikinte rong duwen Siohwa. Ia duwe, ke pahn men papah soangen wasa duwehte met? Ma ei, se kangoange iuk: “Sarada oh kilengwohng mwetuwel kan, wahrail kan mahier oh mwahuwongehr en dondol.” (Sohn 4:35) Ia duwe, ke pahn kak sawas wasa ehu me ni karasaras duwehte mwaht ehu me “wahrail kan mahier oh mwahuwongehr en dondol”? Ma ei, wiahda kahk kan ahnsou wet pwehn kapwaiada mehn akadei wet. Ke kak uhdahn kamehlele me ni omw kalaudehla omw iang kalohki rongamwahwo “lelohng ni irepen sampah,” met pahn wahdohng uhd kapai tohto me siksang kapai teikan!​—Wiewia 1:8.