OARALAP | DAHME KAHREHDA SISES KETIN LOKOLOK OH PWOULA?
E Uhdahn Wiawi?
Nan pahr 33, Sises mehn Nasareto kamakamala. E alehdi karaunlikamw me dene e uhwong kaun akan, e lelohng kamakam uk oh poasdahng pohn tuhke pwoat. E ketin pwoula ni medek laud. Ahpw Koht ketin kaiasada ih ong mour, oh mwurin rahn 40, Sises ketidahla nanleng.
Mwekid kapwuriamwei pwukat kohsang nan Rongamwahu pahieu ko en Palien Paipel ni Lokaiahn Krihk, me kitail kin kahdaneki Kadehde Kapw. Ia duwe, mepwukat uhdahn wiawi? Met wia peidek ehu me konehng oh kesempwal. Ma mepwukat sohte wiawi, ahn Kristian kan pwoson sohte katepe oh koapworopwor en mour soutuk nan Paradais wia ouraman ehu me sohte douluhl pahn pweida. (1 Korint 15:14) Weksang met, ma mepwukat uhdahn wiawi, eri mie koapworopwor kaselel ehu ong tohnsampah ni ahnsou kohkohdo, koapworopwor ehu me ke kak ehukihong meteikan. Eri, ia duwe, audepen pwuhken rongamwahu ko mehlel de e wia pwuhken soai kei?
DAHME IRE MEHLEL KAN KASALEHDA
Weksang soai kaselel kan, ntingdahn pwuhken Rongamwahu ko kasalehda me e ntingdi ni keneinei oh oaritik. Karasepe, re kin kasalehda eden wasa tohto me uhdahn mie, aramas kak mwemweitla pali laud en wasa pwukat rahnwet. Re kin koasoia duwen aramas akan me uhdahn mie, me soupoad kan kin koasoia duwen arail mour.—Luk 3:1, 2, 23.
Sounnting kan en ni mwehin tepin Kristian kan lel mpen pahr 200 kin koasoia duwen Sises. a Mwomwen mwekid kan ong eh pwoula me pwuhken Rongamwahu ko kawehwehda pwungiong wiepe kan me mehn Rom kan kin wia pwehn kemehla emen nan ahnsowo. Laudsang met, mwekid pwukat kin kawehwehdi ni ahl me uhdahn wiawi oh mehlel, e pil koasoiahda soangen sapwung kan me ekei sapwellimen Sises tohnpadahk ko wiahda. (Madiu 26:56; Luk 22:24-26; Sohn 18:10, 11) Mehn kadehde mehlel pwukat koaros ni sansal kin kasalehda me sounnting en pwuhken rongamwahu ko kin mehlel oh kin pwung ni arail kin ntingihedi duwen Sises.
IA DUWEN IASADAHN SISES?
Mendahki pali laud en aramas akan kin pwungki me Sises ketin momour oh pwoula, mie ekei peidengki eh iasada. Pil sapwellime wahnpoaron ako ni ar tepin rong rohng me e iasada, re sohte kamehlele. (Luk 24:11) Ahpw re sohla peikasal ni irail oh tohnpadahk teikan ar kilangada Sises me iasadao eh pwarada ni soangsoangen ahnsou kan. Ni mehlel, ehu ahnsowo, aramas daulih 500 me iang kadehde met.—1 Korint 15:6.
Tohnpadahk ko ni eimah kadehdehiong koaros me Sises ketin iasada, pil ong irail akan me kemehla ih mendahki ar kakete selidi oh kamakamala. (Wiewia 4:1-3, 10, 19, 20; 5:27-32) Ia duwe, tohnpadahk tohto pahn kak eimah ma re sohte uhdahn kamehlele me Sises ketin iasada? Ni mehlel, iasadahn Sises iei mehn kadehde kehlail ehu me kamwakamwakid pelien lamalam en Kristian kan mahs oh pil ahnsouwet.
Pwuhken Rongamwahu kan duwen pwoulahn oh iasadahn Sises kadehdehda me e uhdahn wia poadopoad mehlel ehu. Omw pahn wadek kanahieng kak kamehlelehiong uhk me mwekid pwukat uhdahn wiawi. Omw kamehlele mepwukat pahn kehlailla sang ni omw wehwehki dahme kahrehda mepwukat wiawi. Oaralap en mwurin met pahn kawehwehda.
a Tacitus, me ipwidi mpen pahr 55, ntingihedi “Kristus, me ahd wet [Kristian] tepisang ie, ale kalokolok laud erein kaundahn Tiberius sang emen kaun lapalap, Pontius Pailet.” Irail kan me pil koasoia duwen Sises iei Suetonius (ni mwehin tepin Kristian kan); Josephus emen soupoad en mehn Suhs (ni mwehin tepin Kristian kan); oh Pliny Younger, kepina en Pidinia (tepin sounpar 101 lel 200).
