“BUSO kak kohkohla, ahpw ohlen Chinao pahn mihmi!” Ih met me Alexandra rongada ni eh mwomwohd nan buso, awiawih arail pahn kotehla irepen sahpw riau nan Palieir en Amerika. E doudihsang nan buso pwehn kilang dahme wiewiawi, ih eri kilangada ohlen China men me apwalki lokaiahn Spain, songosong en kawehwehiong sounsilasilo eh irairo. Pwehki Alexandra kin iang mwomwohdisohn Sounkadehdehn Siohwa kan me kin lokaiahki lokaiahn China, e toukihda pein ih pwehn sawas nin duwen sounkawehwe men.

Ohlo koasoia me e kin kousoan wasao ahpw nah doaropwehn mweimwei en kousoan wasao oh mwohni kan pirapala. Nin tapio sounsilasilo sohte men rong dahme ohlo koasoia oh e pil medewe me Alexandra iang pidada pesines me kin pirapahla oh netikihla aramas. Mwuri, sounsilasilo rong dahme ohlo songosong en kawehweo, ahpw ohlen Chinao anahne pwain pwehki eh sohte nah doaropweo. Pwehki eh sohte nah mwohni, Alexandra kihong ih tala 20 pwehn pwainla oh e kak kapwungohng ih mwuhr. Ohlo uhdahn kalahnganki met oh nda me e pahn kapwungohng ih laudsang tala 20. Alexandra eri kawehwehiong me e sohte anahne kapwungohng ih laudsang tala 20; e perenki sawas pwehki e pehm me met wia mehkot mwahu en wia. Ih eri kihong ohlo ekei sawaspen Paipel kan oh kangoangehki en onop Paipel rehn Sounkadehdehn kan.

E kansenamwahu en rong duwen kadek sapan me aramas kin kasalehiong meteikan me re sehse, oh aramas akan me kin iang soangsoangen pelien lamalam oh irail me sohte kin iang ehu pelien lamalam pil kin kasalehda soangen mwekidohte. Ia duwe, ke pahn men toukihda pein kowe ni soh roporop ni soangen ahlohte? Peidek wet kesempwal pwehki Sises mahsanih: “Kihwei kaperen sang ale.” (Wiewia 20:35) Met kin kesempwal ong saintis kan pwehki sounroporop kan diarada me kihkihwei kin mwahu ong uhk. Kitail pahn kilang ni soangen ahl dah kei me kasalehda met mehlel.

Soahng kan me wiawi kin kasalehda me kihkihwei oh nsenamwahu kin dokpene. Wahnpoaron Pohl ntingihedi me “Koht kin ketin poakohng me kin perenki kihwei.” E koasokoasoia Kristian kan me kin toukihda sawas pwehn sewese kansenamwahwihala apwal en riarail kan. (2 Korint 8:4; 9:7) Pohl sohte koasokoasoia me irail kin kihwei pwehki irail peren. Me mehlelo, irail kin peren pwehki irail kak kihwei.

Met mehlel pwehki ehu roporop kasalehda me, kihkihwei “kin kamwakid ekei wasa kan nan mwahliel me kin kadokepene nsenamwahu, wehwehiong meteikan, oh likilik, oh met kin kahrehda pepehm en nsenamwahu.” Pil ehu roporop diarada me “kihong emen mwohni kin kahrehda nsenamwahu sang omw kin doadoahngkihongete pein kowe.”

Pwehki omw irair kan, mie pak me ke pehm me ke sohte kak kihda soahng tohto? Me mehlelo iei koaros kak nsenamwahuki en wia emen “me kin perenki kihwei.” Ma kitail kihla ni kahrepe pwung, uwen me kitail pahn kihlao sohte anahne en laud. Emen Sounkadehdehn Siohwa kadarala kisinlikou wet ong irail me wiahda makasihn wet iangahki sawas  en mwohni, oh e koasoia: “Erein sounpar kan koaros I sohte kak sawaskihda uwen mwohni laud ahpw kisin uwen mwohni tikitik me I kak sawaskihda nan Wasahn Kaudok.” E pil pousehla koasoia: “Siohwa Koht ketin kapwurehiong ie laudsang uwen me I kihlao. . . . Kalahnganki amwail kamangaiong ie en wiahda kisakis wet. Met kansenamwahwihiehla.”

En kihwei sohte kin pidadahte mwohni. Mie soangsoangen ahl tohto ong kihwei.

Paipel mahsanih: “Ke kin pein wiahiong uhk mehkot mwahu ni omw kin kadek. Ma ke lemei, ke pahn pein kauweiukala.” (Lepin Padahk 11:17) Aramas kadek kan kin perenki kihkihwei, kin perenki toukihda pein irail, arail ahnsou, kehl, nsenoh, oh soahng teikan. Met pahn kahrehiong irail en paiekihda soangsoangen ahl akan nan arail mour, oh ehu kapai pwukat iei en ahneki roson mwahu.

Roporop kan kasalehda me irail kan me kin toukihda pein irail pwehn sewese meteikan sohte kin kalapw ahneki medek oh nsensuwed laud. Pali laud en irail kin ahneki roson mwahu. Kadek sapan pil kin kak kamwahwihala roson en emen me kin lokolongki soumwahu ahnsou werei, me duwehte soangen soumwahu laud me adaneki multiple sclerosis de HIV. E pil sansalda me irail akan me kin nantihong uhdihsang nim sakau en wai oh kin sewese meteikan, kin sohla nohn pwunod oh pweida ni arail soikala nim sakau en wai.

Ehu pwuhk koasoia me kahrepen met eh kak wiawi pwehki “pepehm en limpoak, toupahrek oh kadek kin perehsang pepehm en mwoarosala.” Kihkihwei pil kak katikala pwunod oh nta laud. Oh aramas akan me arail pwoud mehla kin mwadang nsenamwahula sang arail nsensuwed ma re kin sewese meteikan.

Uhdahn sohte peikidpe. Kihkihwei uhdahn mwahuong uhk.

Sises kehkehlingkihong sapwellime tohnpadahk kan: “Kumwail kihkihwei oh aramas akan pahn kasapahldohng kumwail. Irail pahn wudekidi pohmwi uwe ehu me itar, me pahn idaidpene, itpene oh dirla kowahlap. Pwe mehn sohngohte me kumwail pahn sohngki meteikan, re pahn pil sohngkin kumwail.” (Luk 6:38, NW) Ni omw kin kihwei, aramas akan kin men kalahnganki oh mwekidki omw kadek sapan oh irail pil kin men alasang omw kadek. Kihkihwei kin kahrehda miniminpene oh kerenpene.

Sounroporop kan me kin ropada soahng kan nanpwungen aramas esehda me “aramas akan me kin kalapw kasalehda nsenoh kin kangoange meteikan ren alasang.” Ni mehlel, “en wadekete duwen wiewia kadek laud en meteikan kin kahrehiong aramas akan en kalaudehla arail kadek sapan.” Pil duwehte met, ehu roporop kasalehda me “emenemen me kin iang pwihn ehu kak kamwakid aramas epwiki kei, ekei me e sehse de pil me e saikinte tuhwong.” Met wehwehki me mwekid en kadek sapan ehute kak kamwakid emenemen aramas lao e kohpeseng nan kousapw ehu. Ke sou pahn men iang kousoan nan soangen  wasa me duwehte met? Ei, e kak mie kapai laud kan ma pali tohtohn aramas kin kihkihwei.

Ehu mwekid me kasansalehda me met pweida mwahu kohsang Florida, U.S.A. Pwihnen Sounkadehdehn Siohwa kei toukihda pein irail en sawas kamwahwihala wasa ohla kei mwurin ehu melimel laud. Ni arail awiawih dipwisou kan ong kamwahwihala ihmw me re koadoakoadoahkeo, irail tehkada me en mehn mparailo kehlo ohla, oh irail nda me re pahn kamwahwihala. Ahnsou kis mwuri, mehn mparailo ntinglahng poasen kaun en Sounkadehdehn Siohwa kan, nda, “I uhdahn kalahnganki met. I diarada me aramas pwukat me keieu mwahu nanpwungen aramas koaros me I kin tuhwong.” Eh kalahngan kamwakid ih en kadarala eh sawas en mwohni ong doadoahk me e kahdaneki, doadoahk kapwuriamwei en Sounkadehde kan.

Mie mehkot kaselel ehu me sansalda sang nan en saintis kan ar roporop me “e mwomwen mie mehkot me kin kahrehiong aramas en men sewese meteikan.” Roporopo kasalehda me seri kan “kin kasalehda kadek mwohn arail esehla lokaia.” Dahme kahrehda? Paipel sapengala met ni eh mahsanih me aramas akan kepikipikda ‘rasehng Koht,’ me wehwehki, re ahneki soangen irairkohte me Koht sapwellimanki.​—Senesis 1:27.

Ehu nanpwungen irair kaselel kan me Sounkapikpatail, Siohwa Koht sapwellimanki, iei kadek sapan. E ketikihong kitail mour oh soahng koaros me kitail anahne pwehn kaprenkitaillda. (Wiewia 14:17; 17:26-28) Kitail kak karanihala Samatail nanleng oh kupwur limpoak me e sapwellimanki ong kitail ni atail onopki sapwellime Mahsen, Paipel. Paipel pil padahkihong kitail me Koht ketikihdahr koasoandi ong atail nsenamwahu en ahnsou kohkohdo. a (1 Sohn 4:9, 10) Pwehki Siohwa Koht me utupen kadek sapan oh ke wiawihda rasehng ih, e sohte kapwuriamwei me omw kahlemengih ih ni omw kin kihkihwei mwahuong uhk oh kin kaperenda ih.​—Ipru 13:16.

Ke tamataman Alexandra me pwarada nan parakrap en mwowe ko? Dahme wiawi mwurin mwo? Mendahki ekei me iang buso nda me e kesehla nah mwohni me e sewesehki ohlo, ohlo padahkihong kompoakepah kan nan kahnimwo wasa me buso uhdi ieo, oh e mwadangete kapwungala eh pweipwand en tala rieieiseko. Pil patehng met, ohlo wia dahme Alexandra ndao oh tepida onopki Paipel. Mwurin sounpwong siluh, Alexandra perenkihda eh pwurehng tuhwong ohlo nan mihting tohrohr en Sounkadehdehn Siohwa kan ong irail me kin lokaiahki lokaiahn China nan Peru. Pwehn kasalehda eh kalahnganki soahng koaros me Alexandra wiahiong ih, ohlo luke ih oh irail kan me iang ih kohla ni mihting tohrohro ren kohla nan eh imwen mwengeo.

Kihkihwei oh sewese meteikan kin kahrehda peren laud. Oh ke kak kalaudehla omw peren ma ke kin sewese aramas akan ren esehla Utupen kisakis mwahu koaros, Siohwa Koht! (Seims 1:17) Ke kin perenki soangen kihkihwei wet?