MEHN saim pinsel me mwomwen pwoht me mi nan pehn Jordano mwomwen sohte kaperen en naineki. Ahpw met mehkot me e keieu kesempwalki. Jordan kawehwehda: “Kompoakepahi mah men me adaneki Russell me kihong ie ni ahnsou me I pwulopwul.” Mwurin Russell eh mehla, Jordan esehda me Russell kin sewese eh pahpa kahlap oh eh pahpa nohno ni ahnsou apwal akan. Jordan koasoia: “Pwehki met ei esehier mwomwen Russell, kisin kisakis wet uhdahn kesempwal ong ie laudsang mahso.”

Nin duwen me Jordan kasalehda, ong ekei aramas kisakis ehu ele pahn mwomwen tikitik de sohte kesempwal. Ahpw, ong emen me kalahnganki kisakiso ele e pahn uhdahn kesempwal de sohte mehkot pahrekiong uwen kesempwal en kisakiso. Paipel kawehwehda kisakis ehu me sohte mehkot pahrekiong ni eh doadoahngki mahsen pwukat me koaros kin ese: “Pwe iei uwen Koht eh ketin loalloale sampah, me e ketikihdohki Sapwellime Iehros, pwe mehmen me kin pwosonla ih en dehr salongala, a en ahneki mour soutuk.”​—Sohn 3:16.

Kisakis wet kak wahdo mour soutuk! Mie ehu kisakis me uhdahn mwahusang met? Ekei aramas ele sohte kin pohnese uwen kesempwal en kisakis wet, ahpw Kristian mehlel kan kin wauneki nin duwen mehkot “kesempwal.” (Melkahka 49:8; 1 Piter 1:18, 19) Ahpw, dahme kahrehda Koht ketikihda mouren sapwellime Ohlo nin duwen kisakis ehu ong tohnsampah?

Wahnpoaron Pohl kawehwehda dahme kahrehda ni eh doadoahngki mahsen pwukat: “Dihp tepidohng sampah sang rehn aramas tehmen, ahpw tialahng mehla. Eri, mehla lelohngehr aramas koaros, pwe aramas koaros dipadahr.” (Rom 5:12) Tepin ohl Adam, dipada ni eh pein nsenkihda en sapeikiong Koht oh e lokolongki kalokolok en mehla. Pwehki Adam, mehla lelohng kadaudoke kan koaros, aramas koaros nin sampah.

 “Pweinen dihp, iei mehla; ahpw sapwellimen Koht kisakis sapan, iei mour soutuk rehn Krais Sises atail Kaun.” (Rom 6:23) Pwehn kamaiaudahsang aramas akan sang mehla, Koht ketin poaronehdo sapwellime Ohlo, Sises Krais, nin sampah pwehn tounmeteikihla sapwellime mour unsek ong tohnsampah. Poahsoankihda meirong wet de “pweinen pweipwei sapahlo,” koaros me pahn pwosonla Sises pahn ahneki mour soutuk.​—Rom 3:24, NW.

Me pid duwen kapai kan koaros me Koht ketikihong sapwellime tohnkaudok kan sang rehn Sises Krais, Pohl kasalehda: “Kitail kapingkalahngankihong Koht sapwellime kisakis kesempwal wet.” (2 Korint 9:15) Ei, pweinen pweipwei sapahlo uhdahn wia mehkot me inenen laud ong kitail. Ahpw nanpwungen sapwellimen Koht kisakis kaselel koaros ong aramas, dahme kahrehda pweinen pweipwei sapahlo me keieu kesempwal? Ni ahl dah me e weksang kisakis teikan me Koht ketikihda? a Oh ia duwen atail pahn mwekidki met? Se kangoangeiuk en wadek pasapeng kan sang nan Paipel ong peidek pwukat me mi nan iren mwuri kan.