Nan oaralap en mwoweo, kitail tehk duwen kilel me Sises ketikihda. Kilel wet kihda mehn kadehde sansal me Wehin Koht kokoudahr nanleng oh Sises Krais me wia Nanmwarki.

Paipel mahsanih me ni Sises eh ketikiher manaman en Wehio, e pahn kesepwekehsang Sehdan oh nah ngehn suwed kan nanleng. Met, arail mwekid irairdi nin sampah, ih ehu kahrepe me soahng kan ar inenen susuwedla sangete pahr 1914.​—Kaudiahl 12:7, 9.

Mendahki irair en sampah eh susuwedla, Sises, nin duwen Nanmwarki en Wehin Koht, ketin wiahda soahng kan me kin sewese aramas akan nan sampah pwon. Pwehki kasukuhl en Paipel me Sises ketin kohpada eh kin wiewiawi nan sampah pwon, me tohto kin sukuhlki oh doadoahngki ire mehlel oh kaweid en Paipel kan nan arail mouren ehuehu rahn. (Aiseia 2:2-4) Meh rar kei sukuhlkier ia duwen arail pahn ahneki mouren peneinei nsenamwahu, oh sohte kin mweidohng doadoahk en mwohni de ahneki kepwe en wiahla soahng kan me keieu kesempwal nan arail mour. Soangen aramas  pwukat kin ale kasukuhl me kin wia kamwahuparail met oh re kin wiahla soangen aramas me Koht ketin kupwurki ren wia towe mehlel en sapwellime wehi.

Mendahki Sises ketin kaundahr nanleng, koperment en aramas kan kin kakaunte pohn sampah. Ahpw Koht ketin mahsanihongehr Sises: “Komwi en kaunda sapwellimomwi imwintihti kan.” (Melkahka 110:2) Ahnsou keren Sises pahn ketin kasohrehla ni unsek sounpelian kan koaros oh ketin doarehla irail kan me men peikiong Koht.

Kereniongehr Wehin Koht pahn mwekid ni eh pahn

• Kasohrehla pelian lamalam likamw kan. Pelien lamalam me kin padahngki likamw kan duwen Koht oh kahrehiong mour en aramas akan en apwalla pahn sohrala. Paipel kin karasahiong pelien lamalam likamw kan duwehte lihen netiki paliwere. Eh kasohrala pahn wia mehkot kapwuriamwei ong aramas tohto.​—Kaudiahl 17:15, 16.

• Kauwehla kaundahn aramas. Wehin Koht pahn mwekid pwehn kauwehla kaundahn aramas koaros.​—Kaudiahl 19:15, 17, 18.

• Kasohrehla aramas suwed kan. Ahpw dahme pahn wiawihong irail kan me kin tengediong wia me suwed oh kahng peikiong Koht? “Koht pahn ketin koahkoahsang aramas suwed kan nan sahpwo [“sampah,” NW].”​—Lepin Padahk 2:22.

• Kasohrehla Sehdan oh ngehn suwed kan. Sehdan oh ngehn suwed kan solahr pahn kak “pitih wehi kan.”​—Kaudiahl 20:3, 10.

Ia wehwehn mepwukat koaros ong irail kan me kin utungada Wehin Koht?

Ni eh ketin kakaun nin duwen Nanmwarki nanleng, Sises pahn ketin wiahda soahng kan me tohtohsang dahme aramas kaun men kak wiahda. Ienge kaun meh 144,000 pahn kin sewese ih, irail kan me pilipilda sang nanpwungen aramas akan. (Kaudiahl 5:9, 10; 14:1, 3) E pahn ketin kahrehiong kupwuren Koht en wiawi nin sampah. Dahme Wehin Koht pahn wia ong tohnsampah?

• Kasohrehla soumwahu oh mehla. “Sohte emen me kin kousoan nan sahpwo pahn kaulimkihla eh soumwahu,” oh “mehla solahr pahn wiawi.”​—Aiseia 33:24; Kaudiahl 21:4.

• Kahrehda popohl mehlel oh sohte keper en miehla. Koht pahn ketikihong aramas akan “paiamwahu oh popohl” oh re “pahn mour meleilei pahn mwetehn arail tuhkehn wain de tuhke pik kan; re sohte pahn perki mehkot.”​—Aiseia 54:13; Maika 4:4.

• Kihong aramas doadoahk katapan. “Re pahn nsenamwahuki mehlel dipwisou kan me re koadoahkihada. Arail doadoahk kan pahn kin pweida mwahu.”​—Aiseia 65:22, 23.

• Kamwahwihala ohlahn nanwehwe, nansed oh nansapw. “Sapwtehno pahn perenda, oh rohs akan pahn mpwek oh masalpeseng nan sahpw madekeng kan.”​—Aiseia 35:1.

• Padahkihong aramas dahme re anahne wia pwe ren mour kohkohlahte. “Met wehwehki mour soutuk, arail pahn eseikomwihla, me komwihte me Koht mehlel, oh Sises Krais me komw ketin poaronehdo.”​—Sohn 17:3.

Koht ketin kupwurki ken iang paiekihda soangen kapai pwukat. (Aiseia 48:18) Oaralap en mwurin met pahn kawehwehda dahme ke kak wia ahnsou wet pwe ken iang ahneki soangen mour kaselel wet ahnsou kohkohdo.