PWEHKI kitail mi nan sampah suwed ehu, kitail anahne doadoahk laud pwehn ahneki popohl. Ahpw, mehnda ma atail popohl sohte nohn laud, kitail kin kalapw nantihong en kolokol. Dahme Paipel mahsanih me kak sewese kitail en ahneki popohl mehlel oh poatopoat? Oh ia duwen atail kak sewese meteikan en pil ahneki met?

Pwe kitail en ahneki popohl mehlel, kitail anahne ahneki meleilei nan loalatail oh pehm me kitail sohte perki mehkot. Kitail pil anahne kakairada nanpwungmwahu kehlail rehn meteikan. Keieu kesempwal, pwehn ahneki popohl me poatopoat, kitail anahne kakairada nanpwungmwahu keren rehn Koht. Ia duwen atail kak wia met?

Ni ahnsou me kitail kin peikiong sapwellimen Siohwa kosonned oh kaweid pwung kan, kitail kin kasalehda me kitail likih ih oh kitail inengieng ahneki nanpwungmwahu meleilei reh. (Ser. 17:7, 8; Seims 2:22, 23) Ma kitail wia met, e pahn ketin karanihala kitail oh kapaikinkitail meleilei nan loalatail. Aiseia 32:17 mahsanih: “Pwehki aramas koaros pahn weweidki me pwung, oh popohl oh meleilei pahn kakaun kohkohlahte.” Kitail kak ahneki popohl mehlel nan loalatail sang ni atail peikiong Siohwa ni mohngiong unsek.​—Ais. 48:18, 19.

Kitail pil ale sawas en ahneki popohl me poatopoat sang kisakis kesempwal me Samatailo nanleng ketikihong kitail​—me iei sapwellime manaman.​—Wiewia 9:31.

Wahnpoaron Pohl ntingihedi popohl nin duwen kesiluh en “wahn sapwellimen Koht manaman.” (Kal. 5:22, 23, NW) Pwehki popohl mehlel kohsang sapwellimen Koht manaman, kitail anahne mweidohng en kamwakid kitail en  kakairada popohl mehlel. Kitail pahn tehkpene ahl riau me sapwellimen Koht manaman kak sewese kitail en ahneki popohl.

Keieu, kitail kin ale sawas en kakairada popohl sang ni atail kin kaukaule wadek sapwellimen Koht Mahsen. (Mel. 1:2, 3) Ni atail doudouloale dahme Paipel mahsanih, sapwellimen Koht manaman kin sewese kitail en wehwehki sapwellimen Siohwa madamadau ong soahng tohto. Karasepe, kitail kin kilang ia duwen eh kin ketin kolokolete popohl oh dahme kahrehda popohl wia mehkot kesempwal ong ih. Ni atail doadoahngki mehn kasukuhl pwukat sang Mahsen en Koht, atail popohl kin laudla nan atail mour.​—Lep. Pad. 3:1, 2.

Keriau, kitail anahne kapakapki sapwellimen Koht manaman. (Luk 11:13) Siohwa ketin inoukihda me ma kitail peki sapwellime sawas, ‘sapwellimen Koht popohl, me inenen laudsang uwen atail dehdehki, ahpw pahn nekinekid mohngiongitail oh pil atail lamalam rehn Krais Sises.’ (Pil. 4:6, 7) Ma kitail kin kaukaule kapakapki oh peki sapwellimen Siohwa manaman, Koht pahn ketikihong kitail popohl nan loalatail me kin ongete irail kan me ahneki nanpwungmwahu keren reh.​—Rom 15:13.

Ia duwen ekei ar doadoahngki kaweid oh ire mehlel kan nan Paipel oh wiahda wekidekla kan me sewese irail en ahneki popohl me poatopoat​—rehn Siohwa, pein irail, oh rehn aramas akan?

Nan mwomwohdisohn Kristian rahnwet, mie ekei me mahso kin “mwadang en lingeringer” ahpw met kin kadek, ese lamalam, kanengamah, oh ahneki meleilei rehn meteikan. * (Lep. Pad. 29:22) Pwehn kadehdehda mehlelpen met, tehk dahme wiawihong sounkalohk riemen me ale sawas en powehdi ara lingeringer oh pil kakairada popohl rehn meteikan.

Ahn David loalsuwed kin kamwakid mwomwen eh kin koasoi. Mwohn eh inoukihong Koht eh mour, e kin kalapw kauwe meteikan oh lokaia lemei ong eh peneineio. Kedekedeo, David kilang me e anahne wekila oh kakairada popohl. Ia duwen eh wia met? E nda, “I tepida doadoahngki kaweid kan en Paipel nan ei mour, oh imwilahn met, wahu nanpwungen ngehi oh ei peneineio kin kekeirda.”

 Mwomwen ahn Rachel kekeirda kamwakid eh wiewia kan. E nda, “Pil ahnsou wet, I kin ahneki pepehm en lingeringer pwehki I tikida nan peneinei ehu me koaros kin kalapw lingeringer.” Dahme sewese ih en kakairada popohl? E nda, “I kin kaukaule kapakapohng Siohwa oh peki sapwellime sawas.”

David oh Rachel wia mehn kahlemeng kei me kasalehda me ni atail doadoahngki kaweid oh ire mehlel kan nan Paipel oh peki Koht en ketikihong kitail sapwellime manaman pwehn sewese kitail, kitail pahn ahneki popohl. E sansal me mendahki kitail mi nan sampah suwed ehu, kitail kak ahneki popohl nan loalatail me kin sewese miniminpenehn atail peneinei oh riatail Kristian kan. Ahpw, Siohwa ketin kangoange kitail en “ahneki popohl rehn aramas koaros.” (Rom 12:18) Ia duwe, met uhdahn kak wiawi, oh kamwahu dah kan me kin kohsang atail nantihong wiahda popohl?

Sang atail kin wia doadoahk en kalohk, kitail kin luke aramas akan en paiekihda rongamwahu en Wehin Koht. (Ais. 9:6, 7; Mad. 24:14) E kaperen en ese me me tohto kin men rong. Imwilahn met, re solahr kin toutoukihla pepehm en nsensuwedki de lingeringerki dahme re kin kilang wiewiawi. Ahpw, met re ahneki koapworopwor mehlel ong ahnsou kohkohdo oh kin “nantihong kolokol popohl ni mohngiong unsek.”​—Mel. 34:14.

Ahpw, kaidehn koaros kin men rong nin tapio dahme kitail kalohki. (Sohn 3:19) Mendahki met, sapwellimen Koht manaman kin sewese kitail en padahkihong irail rongamwahwo ni elen wahu oh meleilei. Ni ahl wet, kitail kin idawehn sapwellimen Sises kaweid ong kalohk me kileldi nan Madiu 10:11-13, ni eh mahsanih: “Ni amwail pahn kin pedolong nan ihmw ehu, amwail rahnmwahu en kin duwe met: ‘Popohl ong tehnpas wet.’ Ma tohn ihmwo pahn kasamwo kumwail, amwail popohl pahn mihmihte rehrail; a ma re sohte men kasamwo kumwail, a kumwail pwurehng amwail popohl.” Ni atail kin alasang sapwellimen Sises kaweid, kitail kak ahneki popohl ni atail kohkohsang aramaso oh koapworopworki me e pahn rong ni ahnsou me kitail pwurehng pwurala.

Kitail pil kin kasalehda popohl ni atail kin tuhwong kaunen koperment kan ni ahl ehu me kasalehda wahu​—iangahki irail kan me ele kin uhwong atail doadoahk en kalohk. Karasepe, koperment en ehu sahpw nan Aperika kasalehda lipilipilki aramas oh sohte mweidada kokoudahn atail Wasahn Kaudok kan. Pwehn kapwungala irair wet ni meleilei, emen brother me mwoweo kin papah nin duwen misineri men nan sahpwo ale pwukoa en kohla rehn meninkeder lapalap en Aperika me mi London, England. E pahn padahkihong ohlo duwen doadoahk meleilei me Sounkadehdehn Siohwa kan kin wia nan sapweo. Ia imwilahn met?

E nda: “Ni ahnsou me I lella ni ohpiso, I tehkada me mwomwen likou me serepein me doadoahk wasao likawih kohsang ehu keinek me I ese lokaiahki arail lokaia. Eri I rahnmwahwih ih ni arail lokaiao. Serepeino pwuriamweila oh idek, ‘Kahrepe dahieu me ke lelkihdo wasaht?’ Ni kadek, I ndaiong me I men tuhwong meninkeder lapalapo. Serepeino eker ohlo nan delepwohn, oh ohlo pedoido oh rahnmwahwih ie ni arail lokaiao. Mwurin mwo, e rong kanahieng ni ei kawehwehiong ih duwen doadoahk meleilei me Sounkadehde kan kin wia.”

Ahn brothero kawehwehda met ni elen wahu kahrehiong ohlo en wehwehkihda atail doadoahko oh kihsang eh lipilipilki aramas. Ahnsou kis mwurin mwo, koperment en sahpwo nan Aperika kihsang arail keinapwih kokoudahn Wasahn Kaudok kan. Riatail Kristian kan uhdahn perenkihda eh imwikihla meleilei! Ei, atail kasalehiong meteikan wahu kin imwikihla kapai kaselel tohto​—iangahki popohl.

Rahnwet, sapwellimen Siohwa aramas akan kin ahneki popohl mehlel nanpwungarail. Ke pahn kalaudehla popohl wet ni omw nantihong kakairada irair en wahn sapwellimen Koht manaman wet nan omw mour. Keieu kesempwal, ke pahn ale sapwellimen Siohwa kupwuramwahu oh ahneki popohl laud oh poatopoat nan sapwellime sampah kapwo.​—2 Pit. 3:13, 14.