Wahnpoaron Pohl ntingkihlahng ienge eldero Timoty: “I ruweseiuk mwohn Koht oh Krais Sises oh tohnleng pilipildahr kan ken kapwaiada kaweid pwukat oh dehr kin wia pilipil sapahrek.”—1 Tim. 5:21.

Kitail pahn koasoiapene mahs ihs tohnleng kan me kaidehn kisehn pwihn wet. E sansal me irail meh 144,000 ko sohte iang kisehn pwihn wet. Ni ahnsou me Pohl ntinglahng Timoty, kaiasadahn Kristian keidi kan ong nanleng saik tepida. Wahnpoaron ko oh me keidi teikan saikinte wiahla ngehn kei, kahrehda irail sohte kak iang kisehn “tohnleng pilipildahr kan.”—1 Kor. 15:​50-54; 1 Des. 4:​13-17; 1 Sohn 3:2.

Patehng met, “tohnleng pilipildahr kan” sohte kak pidada tohnleng sapeik ko ni mwehin Nohliko. Pwe tohnleng pwukat iangala en Sehdan pali oh wiahla ngehn suwed kei me Sises kin ketin uhwong. (Sen. 6:2; Luk 8:​30, 31; 2 Pit. 2:4) Ni ahnsou kohkohdo, re pahn selidi nan pwoahr loal ehu me soh kapi erein sounpar 1,000 oh mwuri re pahn iang Tepilo kamakamala.—Sud 6; Kaud. 20:​1-3, 10.

Eri “tohnleng pilipildahr kan” me Pohl koasoia ele pid tohnleng kan nanleng me kin iang “Koht oh Krais Sises” doadoahk.

Mie tohnleng lelepek kid kid kei. (Ipru 12:​22, 23) E mwomwen me Siohwa sohte kin ketikihong tohnleng koaros soangen doadoahk ehute. (Kaud. 14:​17, 18) Tamanda me mie ahnsou me tohnleng emente me alehdi pwukoa en kasohrehla sounpei en Asiria 185,000. (2 Nan. 19:35) Ahpw tohnleng tohto me ele pwukoahki en “kihsang mehkoaros me kin kahrehda dipekelekel oh aramas me kin wia me suwed nan [sapwellimen Sises] Wehi.” (Mad. 13:​39-41) A ekei tohnleng kan ele pahn “kihpene sapwellime kan me pilipildahr” ong nanleng. (Mad. 24:31) A pil ekei tohnleng kan kin ‘apwahpwalih kitail wasa koaros me kitail pahn kohla ie.’—Mel. 91:11; Mad. 18:10; 4:11; Luk 22:43.

“Tohnleng pilipildahr kan” nan 1 Timoty 5:21 kakete wia tohnleng ko me ahneki pwukoa tohrohr me pid mwomwohdiso kan. Nan iretikitik kan limwahn ireo, Pohl kihda kaweid duwen mwomwen en elder kan ar pahn wia arail pwukoa kan, oh me tohnmwomwohdiso anahne kasalehda arail wauneki elder kan. Pohl koasoia me elder kan en “dehr kin wia pilipil sapahrek” ni arail wia arail pwukoa kan oh ren kin medewe ni keneinei mwohn ar pahn wiahda pilipil kan. Kahrepe kesempwal ehu ren peikiong en Pohl kaweido iei pwehki irail pwukoahki arail wiewia kan “mwohn Koht oh Krais Sises oh tohnleng pilipildahr kan.” Eri e sansal me ekei tohnleng ko alehdi pwukoa kan me pid mwomwohdiso, me duwehte en sinsile irail, apwahpwalih doadoahk en kalohk, oh peusehiong Siohwa dahme re kin kilang.—Mad. 18:10; Kaud. 14:6.