Ia Sapwellimen Koht Madamadau ong Sakau?

ATAIL Sounkapikada, me kupwurki dahme keieu mwahu ong kitail, sohte ketin kalihkidi nim sakau ni uwe ieu me konehng. * Ahpw e ketikihong aramas “wain mehn kaparanda nan kapehde, lehn olip mehn kansenamwahwihada, oh pilawa mehn kakehlahda paliwere.” (Melkahka 104:15) Ehu ahnsowo, Sises ketin wekidala pihl ong “wain mwahu.”

E konehng en medewe me Sounkapikada mwahngih ia duwen sakau eh kin kak kamwakid mwahliel oh paliwar. Sang nan Paipel, Samatail nanleng ketin ‘padahkihkitail pwe en wia kamwahu ehu ong kitail,’ oh e ketin keinapwih kitail sang kamamsakau. (Aiseia 48:17) Tehk kaweid inen pwukat:

“Kumwail dehr kin sakaukihla douluhl wain, pwe e pahn kaweikumwailla.” (Episos 5:18) “Me kamamsakau kan, . . . re sohte pahn iang sohsohki Wehin Koht.” (1 Korint 6:9-11) Mahsen en Koht kin uhwong “sakaula, oh soahng teikan me duwehte mepwukat.”​—Kalesia 5:19-21.

Kitail pahn tehkpene ekei kahpwal en kamamsakau.

Kahpwal kan me Kohsang Kamamsakau

Sakau kak wia mehkot mwahu ahpw mie soangen wini kehlail kei me kin mi nan sakau me kin kamwakid madamadau oh paliwar. Kamamsakau kak kahrehda soangen kahpwal pwukat:

Kamamsakau kin kauwehla madamadau en me kang sakauo, kahrehda e sohla kak madamadau ni pwung. (Lepin Padahk 23:33) Allen me kin kamamsakau me koasoiepe mi nan iren mwoweo, nda: “Kamamsakau kaidehn ihte soumwahu en paliwar, ahpw e pil wia soumwahu en madamadau oh tiahk en aramas. Ke sohla kin medewe duwen medek me kamamsakau kin wiahiong meteikan.”

Kamamsakau kak kahrehiong uhk en sohla masepwehk oh namenek. Iren Paipel kan kaweidki: “Wain, me kapw oh mering kasalongehlahr pepehm mwahu en nei aramas  akan!” (Oseia 4:11) Ia duwen met kin wiawi? Ni ahnsou me kitail kin sakaula, atail madamadau oh ineng kan me kitail sohte kin kasale, kin kak sansalda. Atail kin koasoanehdi en wia me mwahu kak luwetala. Sakau kak kauwehla atail tiahk mwahu kan oh imwikihla ohlahn atail nanpwungmwahu rehn Siohwa.

Karasepe, John oh eh pwoud akamaida oh ih kohla nan imwen sakau. E nimehr ekis sakau ahnsou me lih emen kohla reh. Mwurin e pil nimala ekis, John iangada liho oh e wiahda dipen kamwahl. Mwurin mwo, John koluhkihla e wiahda mehkot me e uhdahn sohte pahn wia ma e sohte sakau.

Kamamsakau pil kak kahrehda emen en sohte kanaiehng eh lokaia oh wiewia. Paipel mahsanih: “Kasalehiong ie emen me kin sakaula oh kin men song soangen sakau tohrohr, eri, I ahpw pahn kasalehiong uhk emen me kin nsensuwed oh pein pahtoula, me kin kahrehda kahpwal, oh kin kaulimala.” (Lepin Padahk 23:29-30) Kamamsakau kak kahrehda ken “pehm duwehte ma ke mihmi nan madau, mehnmadau, likilikahs pohn kehu en sohp pwoat me kin mwekimwekid.” (Lepin Padahk 23:34) Emen me kin sakaula kak pwourda oh nda, “re kemeiedahr, re wokihiedier, ahpw I sohte tamataman. Dahme I sohte kak pwourkihda? I uhdahn anahne pil ehu kepen sakau.”​—Lepin Padahk 23:35.

Kamamsakau kak kauwehla roson en paliwar. “Pwe manda ke pahn duwehte mehmen me sineik kehpenehr.” (Lepin Padahk 23:32) Palien wini nan sains kadehdehda duwen erpit en lepin padahk en kawa wet. Nanpwungen soumwahu tohto me Sakau laud kin kahrehda, iet ekei, soumwahu en kanser kan, soumwahu en eh me kohsang sakau, mengpenehn eh, mpwosdahn keisar, tikitiklahn suke ren me soumwahu en suke, seri me kin ipwidi oh paliwere kasalehda me pahpa de nohno kin kamamsakau, mwoatorala, de soumwahu en mohngiong. Kamamsakau pak ehute pil kak imwikihla sohla kehn wasa de pil mehla. Kahpwal me keieu laud me kohsang kamamsakau sohte kin pidadahte atail roson en paliwar.

Kahpwal me keieu laud. Mehnda ma emen sohte sakaula, ahpw ma e nim sakau ni ahl me sapwung, met pahn keper ong eh nanpwungmwahu rehn Koht. Paipel mahsanih ni sansal: “Meid suwediong kumwail! Kumwail kin pirida nimenseng oh tapihada nim sakau, oh kin sakasakau lel nipwong.” Dahme kahrehda? Aiseia kasalehda duwen keper ong atail nanpwungmwahu rehn Koht me kohsang kang  sakau ni ahl me sapwung: “Kumwail sohte wehwehki dahme KAUN-O ketin wiewia.”​—Aiseia 5:11, 12.

Mahsen en Koht kaweidkin kitail en dehr “patehng aramas me kin kamam sakau.” (Lepin Padahk 23:20) Lih mah kan ale kaweid en dehr “wia lidun wain.” (Taitus 2:3) Dahme kahrehda? Pwehki aramas sohte pahn kehn ahpw ekisekis arail nim sakau pahn lalaudla. Mwuri me kang sakauo ele pahn kin nda “dahme I sohte kak pwourkihda? I uhdahn anahne pil ehu kepen sakau.” (Lepin Padahk 23:35) Soun nim sakau kan kin mihla nan irair ehu me uhdahn keper ni arail kin inangih nim sakau mandahn rahno pwehn kihsang arail ohn sakau.

Paipel panawihki me irail kan me kin iang me “kamam sakau, kapehd en mwenge, kamwoaronge wasa . . . pahn wehkadahng Koht pein irail, ong Koht me pahn ketin kadeikada me momour oh me melahr akan.” (1 Piter 4:3, 5) Oh me pid ahnsou apwal akan me kitail momour ie, Sises mahsanih: “Kumwail pein mwasamwasahn kumwail. Kumwail dehr kedirepwehkin kumwail mwenge laud oh sakau kehlail, oh pwunod kan en sampah wet; pwe Rahno kakete leledohng kumwail ni ahnsou mwadang. E pahn kohdo, rasehng nsar ehu.”​—Luk 21:34, 35.

Ahpw dahme irail kan me kin nim sakau daulihala kak wia pwehn pere irail sang “kamamsakau”?

[Nting tikitik me mi pah]

[Kilel nan pali 4, 5]

Kamamsakau kak kahrehda kahpwal tohto