Dahme Kahrehda Sises Sohte Kin Ketin Iang Pidada Politik?

MEDEWEHLA dahme wiawi nan pahr 32. Rahno kereniong imwiseklahr. Aramas tohto eselahr duwen Sises me wia Mesaia pwehki e kin ketin kamwahwihala me soumwahu kan oh kaiasada me melahr kan. Eri rahnwet pokon en aramas kid pwuriamweikihla sapwellime manaman kan oh padahk kan duwen Koht. Met e ketin kihpeseng aramas akan me men mwenge ni kisin pwihn kei. E ketin kapakapohng Siohwa oh kamwenge irail koaros. Ih eri ketikihpene luhwen mwenge ko pwehn dehr lekdekla mwahl. Ia en aramas ako arail pepehm?​—Sohn 6:1-13.

Mwurin aramas ako arail kilang manaman kan en Sises oh sapwellime koahiek nin duwen kaun emen me kin apwalihala pokon en aramas akan oh arail anahn akan, irail medewehda me Sises pahn ketin wia nanmwarki me keieu mwahu. (Sohn 6:14) Arail mwekid sohte kapwuriamwei. Tamataman me irail uhdahn anahne kaun mwahu men pwehki arail wasao mihla pahn kaunda suwed en ehu wehi tohrohr. Irail eri song en iding Sises pwehn iangala arail pelien politik. Tehk dahme Sises ketin wia nan soangen irair wet.

Sohn 6:15 mahsanih: “Ni Sises eh ketin mwahngihada me irail pahn kodohng ale, pwe re en kasapwiladahng nanmwarki, e ahpw kelehpw ketila sang rehrail oh ketidalahng pohn nahnao.” E sansalehr dahme Sises ketin pilada. E ketin koasoanehdi teng en dehr iang pidada pelien politik en eh wasao. E sohte ketin wekidala sapwellime pilipil. E mahsanih me sapwellime tohnpadahk ko pil anahne kahlemengih ih. (Sohn 17:16) Dahme kahrehda e ketin pilada en wiahki met?

Dahme Kahrehda Sises Ketin Pilada en Sohte Poupali?

En Sises sohte poupali kin poahsoanda sang ire mehlel kan en Paipel. Tehk duwen ire riau sang ire pwukat.

“Ekei aramas ahneki manaman, a ekei kin wie lokolok pahn ar manaman.” (Eklesiasdes 8:9) Ih met me Paipel kin mahsanihki duwen poadopoad en kaundahn aramas. Tamataman me Sises ketin ieias nanleng nin duwen ngehn emen mwohn eh ketidihdo nin sampah oh wia aramasala. (Sohn 17:5) Eri, e mwahngih me mehnda ma aramas men wia dahme keieu mwahu, re sohte ahneki koahiek en apwalih mwahu anahn akan en aramas lik kei; oh Koht sohte ketin kapikada irail en wia met. (Seremaia 10:23) Sises mwahngih me kamwahulahn kahpwal en aramas pahn kohsang ehu wasa tohrohr a kaidehn sang koperment en aramas kan.

“Sampah unsek mi pahn manaman en Me Suwedo.” (1 Sohn 5:19) Ke kin pwuriamweikihla mahsen pwukat? Me tohto kin. Irail kin medewe duwen aramas mwahu tohto me kin iang pidada politik pwehki re men kamwahwihala sampah. Mendahki arail kin wia uwen arail kak, kaun me keieu mwahu sohte kak powehdi manaman en ih me Sises ketin kahdaneki “kaunen sampah wet.” (Sohn 12:31; 14:30) Ihme kahrehda Sises mahsanihong emen kaun: “Ei wehi, kaidehn kisehn sampah wet.” (Sohn 18:36) Sises me pahn ketin wia Nanmwarki en wehin Koht nanleng. Ma Sises ketin iang pidada politik, e pahn kesehla eh lelepek oh uhki sapwellimen Semeo koperment.

Eri ia duwe, Sises kin ketin padahngki me sapwellime tohnpadahk kan sohte anahne wia mehkot ong koperment en sampah wet? Soh, e ketin padahkihong irail ia duwen arail kak ahneki madamadau toupahrek ong arail pwukoa ong Koht oh pil arail pwukoa ong koperment en sampah wet.

Sises Kin Ketin Wauneki Koasoandi en Koperment en Sampah

Ni Sises eh ketin padapadahk nan tehnpaso, irail akan me kin uhwong ih song en kahrehiong  ih en mahsanih mehkan me sohte pwung ni arail kalelapek reh ma aramas anahne pwain daksis. Ma Sises mahsanih soh, aramas pahn medewe me Sises kin uhwong arail koperment oh kak kamwakid aramas akan en uhwong kaunda suwed en mehn Rom kan. Ahpw ma Sises mahsanih ei, tohto pahn medewe me e ketin pwungki koasoandi suwed me re mi loale. Sapwellimen Sises pasapeng wia pasapeng me keieu mwahu. E mahsanih: “Kumwail kihong Sihsar dahme en Sihsar, a ong Koht dahme sapwellimen Koht.” (Luk 20:21-25) Eri, sapwellime tohnpadahk kan ahneki pwukoa ong Koht oh pil Sihsar me iei koperment en sampah wet.

Koperment kan kin kolokol koasoandi mwahu ehu. Irail kin anahne tohn arail wehi en kin mehlel, pwain daksis oh kapwaiada kosonned akan. Mehn karasepe dah me Sises ketikihda duwen “kihong Sihsar dahme en Sihsar”? Sises tikida rehn eh pahpa oh nohno me kin peikiong kosonned mehnda ma e sohte mengei. Karasepe, Sosep oh eh pwoud Mery me liseian, seiloangki mwail 90 pwehn kohla Pedleem ni ahnsou me koperment en Rom wiahda koasoandi wet. (Luk 2:1-5) Sises kin kahlemengih ira oh peikiong kosonned me iangahki pwain daksis mehnda ma e sohte anahne wia met. (Madiu 17:24-27) E pil kin ketin kanahieng pwehn dehr wia mehkot me e sohte ahneki manaman ong. (Mark 12:13-17) Kitail kak nda me Sises kin ketin wauneki koasoandi en koperment ahpw e sohte kin iang pidada. Eri ia wehwehn sapwellimen Sises mahsen pwukat, “ong Koht me uhdahn sapwellimen Koht”?

Ia Duwen Sises Eh Kihong “Koht me uhdahn sapwellimen Koht”?

Ehu pako, aramas idek rehn Sises ma mehnia kosonned en Koht me keieu kesempwal ong aramas. Krais mahsanih: “‘Ke pahn poakohng Kaun-o omw Koht sang nan  kapehdomw unsek, sang ni ngenomw [“omw mour,” NW] unsek, sang ni omw lamalam koaros unsek.’ Ih met kosonned me keieu lapalap oh kesempwal. A me keriaun kesempwal, me rasehngete met, iei: ‘Ke pahn poakohng mehn mpomw duwen omw kin poakohng pein uhk.’” (Madiu 22:37-39) Sises ketin padahngki me ni atail pahn kihong “Koht me uhdahn sapwellimen Koht,” keieu kitail pweipwandkihong ih atail limpoak. Met kin pid atail lelepek ong ih ni mohngiong unsek.

Ia duwe, atail limpoak oh lelepek kak kohwong Siohwa Koht oh sapwellime koperment nanleng oh ni ahnsowohte pil kohwong koperment en sampah wet? Pein Sises mahsanih ire wet: “Sohte aramas emen kak liduwih soumas riemen; pwe e pahn kailongki emen, e ahpw pahn poakepoake meteio; e pahn loalopwoatohng emen, e ahpw pahn mwamwahliki meteio.” (Madiu 6:24) Wasaht, Sises kin mahsanih duwen lelepek ong Koht oh kepwe kan, ahpw e sansal me e ketin kamehlele me ire wet pil kin dokedoke mehkan me pid duwen politik oh sapwellime tohnpadahk kan pil kin kamehlele met.

Soahng kan me ntingdi me keieu werei nin sampah kin kasalehda me sapwellimen Sises tohnpadahk en mahs akan sohte kin iang pidada pelien politik. Pwehki irail kin kihong arail kaudok unsek ong Ih me Krais kin ketin kaudokiong, irail sohte kin kihong arail lelepek ong wehin Rom oh eh kaun de iang sounpei oh ale pwukoa nan koperment. Pwehki met, irail lelohng soangsoangen uhwong kan. Arail imwintihti kan kin ekei pak karaunkin irail me re kin “kailongki aramas.” Ia duwe, met mehlel?

Kristian Mehlel kan Kin Nsenohkin Aramas

Tamanda me Sises mahsanih me keriaun kosonned en Koht me kesempwal iei “Ke pahn poakohng mehn mpomw duwen omw kin poakohng  pein uhk.” Sansal me sohte tohnpadahk en Krais pahn kailongki aramas. Sises kin ketin poakohng aramas oh doadoahk laud ong irail oh sewese irail ong arail anahn en ehuehu rahn.​—Mark 5:25-34; Sohn 2:1-10.

Dahme aramas akan kin esehki duwen Sises? Re sohte kin likwerihki ih Soun kamwahwihala soumwahu, Soun kamwenge aramas kid kei, de Soun kaiasada me melahr akan mendahki e ketin wia mepwukat koaros. Ahpw aramas akan kin ekerki ih Sounpadahk oh e konehng irail en wia met. (Sohn 1:38; 13:13) Sises ketin mahsanih me ehu kahrepe keieu kesempwal me e ketikihdo nin sampah wet iei en padahkihong aramas duwen Wehin Koht.​—Luk 4:43.

Ihme kahrehda sapwellimen Krais tohnpadahk mehlel kan kin poadidiong doadoakohte me arail Kaun kin ketin wia ni eh ketiket sampah. E kin ketin padahkihong aramas akan duwen rongamwahu en Wehin Koht. Sises Krais ketin kehkehlikihong Kristian mehlel koaros en padahkihong aramas akan en sampah pwon duwen ire wet. (Madiu 24:14; 28:19, 20) Koperment en nanleng wet sohte kak wiahda sapwung oh e pahn kaunda sapwellimen Koht kapikipikda kan koaros nin duwen kosonned en limpoak. E pahn kapwaiada kupwuren Koht oh kihsang lokolok oh mehla kohkohlahte. (Madiu 6:9, 10; Kaudiahl 21:3, 4) Ihme kahrehda Paipel kin kahdaneki mahsen en Krais “Rongamwahu”!​—Luk 8:1.

Ma ke rapahki ia sapwellimen Sises Krais tohnpadahk mehlel kan rahnwet, ia duwen omw pahn kak diar irail? Ia duwe, irail pahn iang pidada politik en sampah wet? De irail kin keieu kesempwalki doadoakohte me Sises kin ketin wia me iei kalohki oh padahkih duwen Wehin Koht?

Ke men esehla duwen Wehin Koht oh ia duwen eh kin pid omw mour met? Se luke komwi en tuhwong Sounkadehdehn Siohwa kan nan omw wasa de kohla nan arail Web site, www.watchtower.org.

[Koakon/​Kilel kan nan pali 20]

Sounkadehdehn Siohwa kan Kin Sewese Arail Kousapw?

Sounkadehdehn Siohwa kan kin soupoupali ong pelien politik. Ahpw re kin nantihong sewese sohte lipilipil aramas me kin me nan arail wasa. Iet ekei sawas kan me re wia:

◼ Sounkadehdehn Siohwa kan tohtohsang me isirar. Re kin toukihda pein arail ahnsou pwehn sawas. Re kin doadoahngki daulih awa 1,500,000,000 nan ehuehu sounpar pwehn padahkihong aramas akan audepen Paipel oh ia duwen eh kak sewese irail en powehdi wiewia oh tiahk keper kan, ia duwen arail kak ahneki peneinei nsenamwahu oh ia duwen arail kak kamwahwihala arail mour.

◼ Irail kin wiahda oh kihseli pwuhk kan ni soh isepe. Pwuhk pwukat wiawihda daulih lokaia 500, iangahki ekei lokaia kan me pwuhk teikan sohte kin doadoahngki.

◼ Irail kin wia kasukuhl en padahk ong wehi pokon me sewese aramas rar kei en koahiekla oh esehla wiepen koasoi.

◼ Irail kin wiahda soangen prokram kan me sewese aramas nen kei nin sampah pwon en esehla nting oh wadawad.

◼ Irail koasoanehdi Pwihn en Kauwada Ihmw me tohtohsang 400 nin sampah pwon pwehn kasukuhlihada me tohto me kin toukihda arail ahnsou ong doadoahk en kokou ihmw pwe ren kak sawas kauwada wasahn kasukuhl en Paipel kan. Erein sounpar eisek samwalahro, daulih Wasahn Kaudok 20,000 wiawihda.

◼ Irail kin sawas wasa koaros me kahpwal en melimel ape kin wiawi ie. Re kin sewese Sounkadehdehn Siohwa kan oh pil meteikan. Erein sounpar riau samwalahro melimel laud tohto wiawi nan wehin Amerika. Sounkadehdehn Siohwa tohto toukihda arail sawas oh pwurehng kauwada Wasahn Kaudok daulih meh 90 oh ihmw 5,500.

[Kilel nan pali 19]

Ni ahnsou me aramas akan iding Sises en ketin iang pidada pelien politik, e “kelehpw ketila sang rehrail oh ketidalahng pohn nahnao”