Ke Kin Tiengla Mwowe oh Wauneki Iengomw Me Pwoson kan?

“Kumwail en nsenohki emenemen ni amwail kin limpoakpene nin duwen pirien ehu. Kumwail en tiengla mwowe ni amwail kin wauneki emenemen.”​—ROM 12:10, NW.

1, 2. (a) Kehkehlik dahieu Pohl kihda nan nah kisinlikou ong mehn Rom kan? (b) Peidek dah kei kitail pahn tehkpene?

 NAN nah kisinlikou ong mehn Rom kan, wahnpoaron Pohl kasalehda kesempwalpen atail en kasalehda limpoak nin duwen Kristian akan nan mwomwohdiso. E katamankihong kitail me atail limpoak “en dehr kin liksansalmwahu.” E pil koasoia duwen “limpoakpene nin duwen pirien ehu” oh me soangen limpoak wet anahne kasalehda “nsenohki emenemen.”​—Rom 12:9, 10a, NW.

² Ei, en limpoakpene nin duwen pirien ehu kin pidada laudsang ahnekihte soangen pepehm ong meteikan. Soangen pepehm pwukat anahne sansalkihda wiewia kan. Sohte me pahn ese omw limpoak oh nsenoh ma ke sohte kin kasalehda sang omw wiewia kan. Ihme kahrehda Pohl kapatahiong kehkehliko: “Kumwail en tiengla mwowe ni amwail kin wauneki emenemen.” (Rom 12:10b, NW) Dahme kin pidada kasalehda wahu? Dahme kahrehda e kesempwal en tiengla mwowe oh kasalehda wahu ong iengetail me pwoson akan? Ia duwen atail kak wia met?

Dahme Kin Pidada Kasalehda Wahu?

3. Ia duwen Paipel eh kin kawehwehdi lepin lokaiao “wahu”?

³ Lepin lokaiahn Ipru ong “wahu” kin wehwehki en wiahki emen me e kesempwal. Lepin lokaiao pil kin kalapw kawehwehdi nan iren Paipel kan ong “lingan” oh met kin kasalehda duwen emen eh waunla pwehki aramas akan kin kesempwalki ih. (Sen. 45:13) Lepin lokaiahn Krihk me kin kawehwehdiong “wahu” nan Paipel kin wehwehki lapalap oh kesempwal. (Ipru 2:9) Ei, kitail kin wauneki irail akan me kitail kin kesempwalki.

4, 5. Dahme kin pidada wauneki meteikan? Menlau karasahda.

⁴ Dahme kin pidada atail kin wauneki meteikan? Met sohte kin pidada ihte mwomwehda wauneki irail. Mehlel, wahu kin sansalda sang atail wiewia kan ong meteikan, ahpw e uhdahn tepisang mwomwen atail kin kilangwohng irail oh pil atail pepehm ong irail.

⁵ Ia duwen Kristian emen eh kak kasalehda wahu mehlel ong ienge me pwoson kan ma e sohte pehm sang nan eh mohngiong me irail warohng ale wahu? (3 Sohn 9, 10) Rasehng tuhke pwoat me kak keirada mwahu oh mour werei pwehki kalewe kan kin poad nan pwelmwahu, wahu kak mehlel oh mihmi werei ihte ma e pahn kohsang mohngiongitail. Pwehki mwomwehdahte kasalehda wahu sohte kin kohsang mohngiongitail, met sohte kin mihmi werei. Ihme kahrehda kitail kak wehwehki kahrepen Pohl eh kehkehlingki mwowe duwen kasalehda wahu: “Amwail limpoak en dehr kin liksansalmwahu.”​—Rom 12:9; wadek 1 Piter 1:22.

Kawauwih Irail kan me “Wiawihda Rasehng Koht”

6, 7. Dahme kahrehda kitail anahne wauneki meteikan?

⁶ Pwehki kitail anahne wauneki riatail kan  sang nan mohngiongitail pwe kitail en kak kasalehiong irail wahu, kitail en dehr manokehla kahrepe kan me Paipel kihda duwen atail pahn wauneki riatail Kristian kan. Kitail pahn tehkpene kahrepe riau.

⁷ Aramas akan sohte duwehte kepikipik teikan pohn sampah pwehki re “wiawihda rasehng Koht.” (Seims 3:9) Ihme kahrehda kitail ahneki sapwellimen Koht irair kaselel kan me duwehte limpoak, erpit oh pwung pahrek. Sounmelkahkao pil koasoia irair ehu me kitail alehdi sang Sounkapikpatail: “Maing KAUN, . . . Kapingpomwi kin leldawohng nanleng; . . . Komwi me ketin koasoanehdi aramas pwe . . . komwi me ketin kamwarehkinirailda lingan oh wahu.” (Mel. 8:1, 4, 5; 104:1) * Koht kin ketin kamwarehkin aramas akan lingan oh wahu. Kahrehda, ni atail kin wauneki emen, kitail kin pohnese me Siohwa me kin ketin kahrehda aramas akan en alehdi wahu. Ma mie kahrepe mwahu kitail en kin kasalehiong aramas akan wahu, eri ia uwen laud kitail anahne wauneki riatail Kristian akan!​—Sohn 3:16; Kal. 6:10.

Tohn Peneinei Tehieu

8, 9. Nin duwen me Pohl koasoia, kahrepe dahieu kitail ahneki en wauneki iengetail me pwoson kan?

⁸ Pohl koasoia pil ehu kahrepen atail en kin wauneki emenemen. Mwohnte e kihda kaweid me pid en kasalehda wahu, e koasoia: “Kumwail en nsenohki emenemen ni amwail kin limpoakpene nin duwen pirien ehu.” Lokaiahn Krihk me kawehwehda “nsenohki emenemen” kin dokedoke pepehm kehlail me kin kolpene peneinei ehu me kin limpoakpene oh men sawaspene. Kahrehda, ni Pohl eh doadoahngki lepin lokaia wet, e kin kasalehda me nanpwungmwahu en mwomwohdiso anahne kin kehlail oh poakpene duwehte peneinei miniminpene ehu. (Rom. 12:5) Patehng met, kitail en tamataman me Pohl ntingihedi mahsen pwukat ong Kristian keidi kan, irail koaros me Sahmohte, Siohwa, ketin pwekada nin duwen seri kei. Eri, ni ahl kesempwal ehu, re wia peneinei keren. Kristian keidi kan ni mwehin Pohl kin ahneki kahrepe laud en wauneki emenemen. Met pil mehlel ong me keidi kan rahnwet.

⁹ Ahpw ia duwen irail “sihpw teikan”? (Sohn 10:16, NW) Mendahki re saikinte wiahla seri pwekpwek kei en Koht, re kak ni pwung ekerki emenemen brother oh sister pwehki ar wia peneinei en Kristian ehu me kin miniminpene nan sampah pwon. (1 Pit. 2:17; 5:9) Eri, ma irail sihpw teikan kin uhdahn wehwehki dahme kahrehda re kin ekerki emenemen “brother” de “sister,” eri, re pil ahneki kahrepe laud en wauneki sang nan mohngiongirail iengerail kan nan pwoson.​—Wadek 1 Piter 3:8.

Dahme Kahrehda E Uhdahn Kesempwal en Kasalehda Wahu?

10, 11. Dahme kahrehda e uhdahn kesempwal en kasalehda wahu sang mohngiongitail?

¹⁰ Dahme kahrehda e uhdahn kesempwal en kasalehda wahu sang mohngiongitail? Pwehki kahrepe wet: Ni atail kasalehda wahu ong riatail kan, kitail kin uhdahn sewese nsenamwahu oh miniminpene en mwomwohdiso pwon.

¹¹ Ei, kitail kin pohnese me atail ahneki nanpwungmwahu rehn Siohwa oh pil sawas sang sapwellime manaman kin wia utupen kehl me keieu laud me kitail ahneki nin duwen Kristian mehlel kan. (Mel. 36:7; Sohn 14:26) Ni ahnsowohte, ni emen iengetail me pwoson kin kasalehda arail kesempwalkin kitail, met kin kangoange kitail. (Lep. Pad. 15:23) Ni emen eh kin nda de wia mehkot me kasalehda eh wauneki kitail, kitail kin perenkihda. E kin kalaudehla atail kehl en pousehlahte weweid ni peren oh tengedihong ahl me kolahng mour. Ele ke pil kin ahneki soangen pepehm wet.

12. Ia duwen emenemen kitail eh kak sewese kakairada limpoak nan mwomwohdiso?

¹² Pwehki Siohwa mwahngih duwen atail anahn en ale wahu, sapwellime mahsen  kin kangoange kitail en “ngoangki kasalehda wahu ong emenemen.” (Rom 12:10, Today’s English Version; wadek Madiu 7:12.) Kristian koaros me kin kapwaiada kaweid wet me sohte kin wekila kin sewese kakairada limpoak me kin mi nanpwungen pirien en Kristian kan. Eri, e pahn mwahu ma kitail en uhdi oh idek, ‘Iahd me I kasalehda ni ei koasoi oh wiewia me I kin wauneki riei brother oh sister kan nan mwomwohdiso?’​—Rom 13:8.

Kitail Koaros en Tiengla Mwowe oh Kasalehda Wahu

13. (a) Ihs me anahne tiengla mwowe oh kasalehda wahu? (b) Dahme mahsen kan en Pohl nan Rom 1:7 kin kasalehda?

¹³ Ihs me anahne tiengla mwowe oh kasalehda wahu? Paipel kasalehda me Kristian elder kan kin “wia kahlemengihpen” mwomwohdiso. (1 Pit. 5:3) Mehlel, elder kan kin wiahda mehn kahlemeng nan soangsoangen doadoahk kan. Ahpw, nin duwen silepen sihpw kan, re uhdahn anahne tiengla mwowe ni arail wauneki kisehrail kan nan pwoson iangahki iengerail elder kan. Karasepe, ni ahnsou me elder kan kin tuhpene pwe ren koasoiapene anahn kan en mwomwohdiso, re kin wauneki emenemen sang ni arail kin rong kanahieng dahme iengerail elder teikan koasoia. Re pil kin kasalehda wahu sang ni arail kin pohnese en elder kan koaros arail madamadau oh pepehm ni ahnsou me re kin wiahda pilipil ehu. (Wiewia 15:6-15) Ahpw kitail anahne tamataman me nein Pohl kisinlikou ong mehn Rom kan kin kowohng elder kan oh pil mwomwohdiso pwon. (Rom 1:7) Kahrehda, kaweid wet en tiengla mwowe oh kasalehda wahu pil kin kadoadoahk ong kitail koaros rahnwet.

14. (a) Menlau karasahda wekpeseng en kasalehda wahu oh tiengla mwowe en kasalehda wahu. (b) Peidek dahieu me kitail en idek rehtail?

¹⁴ Kitail en pil tehk kaweid en Pohl wet. E kangoange ienge me pwoson kan nan Rom en sohte kasalehdahte wahu ahpw ren tiengla mwowe oh kasalehda wahu. Dahme kahrehda met kin wekpeseng? Medewehla karasepe wet. Ia duwe, sounpadahk men kin kangoange pwihnen tohnsukuhl me eseier wadawad en sukuhlki wadawad? Soh. Sounpadahko ele men sewese tohnsukuhl ko en wadawad mwahusang. Duwehte met, atail kin ahneki limpoak ong emenemen, me kin kamwakid kitail en kasalehda wahu, iei kilel en Kristian mehlel kan. (Sohn 13:35) Ahpw duwehte tohnsukuhl kan me eseier wadawad ar kak kekeirda sang ni arail kamwahwihala arail koahiek en wadawad, eri kitail kak kekeirda ni atail wia mehn kahlemeng mwahu en kasalehda wahu. (1 Des. 4:9, 10) Pwukoa tohrohr wet kin kohwong emenemen kitail. Ele kitail en idek rehtail, ‘Ia duwe,  I kin rapahki ahnsou mwahu en wauneki meteikan nan mwomwohdiso?’

Wauneki “me Tikitik kan”

15, 16. (a) Me pid duwen kasalehda wahu, ihs me kitail en dehr pohnsehsehla? Dahme kahrehda? (b) Dahme kakete kasalehda me kitail ahneki wahu mehlel ong riatail kan?

¹⁵ Me pid duwen kasalehda wahu, ihs nan mwomwohdiso me kitail en dehr pohnsehsehla? Mahsen en Koht mahsanih: “Ni omw kin kisekise me semwehmwe kan [“me tikitik kan,” NW], duwehte omw patohwanohng KAUN-O, oh KAUN-O ahpw pahn ketin kasapahldohng uhk.” (Lep. Pad. 19:17) Ia duwen kaweid me dierek nan mahsen pwukat eh kin kamwakid kitail ni atail kin nantihong tiengla mwowe oh kasalehda wahu?

¹⁶ Ke pahn pwungki me pali laud en aramas kin perenki wauneki irail kan me lapalap, ahpw aramas pwukat ele sohte kin wauneki irail me re medewe me sohte kesempwal. Ahpw Siohwa sohte kin ketin wia met. E mahsanih: “I pahn kin wauneki irail kan me kin waunekin ie.” (1 Sam. 2:30; Mel. 113:5-7) Siohwa ketin kasalehda wahu ong irail koaros me kin papah oh wauneki ih. E sohte kin ketin pohnsehsehla irail “me tikitik kan.” (Wadek Aiseia 57:15; * 2 Kron. 16:9) Mehlel kitail men alasang Siohwa. Eri, ma kitail men ese ia uwen mehlel atail kin wauneki meteikan, e pahn mwahu en idek, ‘Ia mwomwen ei wiewia kan ong irail kan me sohte kin ahneki pwukoa nan mwomwohdiso?’ (Sohn 13:14, 15) Pasapengpen peidek wet kin kasalehda uwen mehlel en wahu me kitail ahneki ong meteikan.​—Wadek Pilipai 2:3, 4.

Kasalehda Wahu ni Atail Kihda Atail Ahnsou

17. Ia keieun ahl me kitail kak tiengla mwowe oh kasalehda wahu? Dahme kahrehda?

¹⁷ Ia keieun ahl me kitail kak tiengla mwowe oh kasalehda wahu ong koaros nan mwomwohdiso? Sang ni atail kihong meteikan atail ahnsou. Dahme kahrehda kitail kak nda met? Nin duwen Kristian kan, kitail kin kedirepw, oh kitail anahne ahnsou laud pwe en kapwaiada soangsoangen doadoahk kesempwal kan en mwomwohdiso. Kahrehda, e sohte kapwuriamwei en kin kilangwohng ahnsou me e wia mehkot kesempwal. Kitail pil kin pohnese me kitail en dehr idingkihong riatail kan en kihong kitail arail ahnsou laud. Duwehte met, kitail kin kalahnganki ni en meteikan nan mwomwohdiso ar wehwehki me re sohte anahne idingkihong kitail en kihong irail atail ahnsou.

18. Sang nan kilel me mi pali 22, ia duwen atail ele kin kasalehda atail perenki kihong iengetail me pwoson kan atail ahnsou?

¹⁸ Kitail pil pohnese (ahpw mehlel irail kan me papah nin duwen silepe kan nan mwomwohdiso) me atail perenki kauhdi atail wiewia kan pwe en kihong iengetail me pwoson kan atail ahnsou kin kasalehda atail kin wauneki irail. Ia duwen? Sang ni atail kauhdi atail wiewia kan pwe en kihong riatail kan atail ahnsou, kitail mwomwen ndaiong irail, ‘I kin uhdahn kesempwalkin uhk, kahrehda, ei kihong uhk ei ahnsou kesempwal sang ei kin usehlahte wia dahme I wiewia.’ (Mark 6:30-34) Ahpw ni pali teio, ma kitail sohte perenki kauhdi atail wiewia kan pwe en kihong riatail men atail ahnsou, kitail kakete kahrehiong ih en pehm me kitail sohte kin kesempwalki ih. Mehlel, kitail wehwehki me mie ahnsou me kitail anahne wia mehkot ni karuwaru oh kitail sohte kak kauhdi  dahme kitail wiewia. Ahpw, atail perenki de sohte perenki kihong meteikan atail ahnsou kin kasalehda uwen laud en atail wauneki riatail kan sang mohngiongitail.​—1 Kor. 10:24.

Koasoanehdi Teng en Tiengla Mwowe

19. Ia duwen atail kak wauneki iengetail me pwoson kan likin kihong irail atail ahnsou?

¹⁹ Mie ahl kesempwal teikan me kitail kak kasalehda wahu ong iengetail me pwoson kan. Karasepe, ni atail kin kihong irail atail ahnsou, kitail pil anahne nsenohki irail. Siohwa pil pwurehng ketikihda mehn kahlemeng. Sounmelkahka Depit koasoia: “KAUN-O kin ketin sinsile me pwung kan oh kin ketin karonge ar likwer kan.” (Mel. 34:15) Kitail kin nantihong alasang Siohwa sang ni atail kin uhdahn nsenohki riatail kan ahpw mehlel irail kan me kohdo rehtail oh peki sawas. Sang ni atail wia met, kitail kin wauneki irail.

20. Dahme kitail men tamataman me pid kasalehda wahu?

²⁰ Nin duwen atail tehkpenehr, kitail men tamataman dahme kahrehda kitail anahne wauneki iengetail me pwoson kan sang mohngiongitail. Kitail pil kin rapahki ahnsou mwahu pwe en tepin kasalehda wahu ong koaros iangahki irail “me tikitik kan.” Sang ni atail kin wia mepwukat, kitail pahn kakehlaka limpoak oh miniminpene en riatail kan nan mwomwohdiso. Eri, kitail koaros en pousehlahte kaidehn ihte kasalehda wahu ahpw tiengla mwowe en wauneki emenemen. Ke kin koasoanehdi teng en wia met?

[Nting tikitik kan me mi pah]

Ke Tamataman?

• Dahme kin pidada wauneki meteikan?

• Ia kahrepen atail kin wauneki iengetail me pwoson kan?

• Dahme kahrehda e kesempwal en wauneki emenemen?

• Ia duwen atail kak wauneki iengetail me pwoson kan?

[Peidek en Onop]

[Kilel nan pali 22]

Ia duwen atail kak wauneki iengetail me pwoson kan?