“MIE ahi koapworopwor.” Sounpar limeisek samwalahro ni August 28, 1963, Martin Luther King, Jr., kaun en uhki pwuhng en aramas nan Amerika, koasoia lokaia pwukat nan eh kapahrek me keieu wadawad. E doadoahngki lepin lokaia pwukat pwehn kasalehda eh koapworopwor me ehu rahn aramas akan pahn ahneki mour me saledek sang lipilipilki aramas. Mendahki eh wia kapahrek wet ong aramas keite nan Amerika, aramas sang sahpw tohto kin pwungki mour en eh koapworopworo.

Sounpwong siluh mwurin eh kapahreko, nan November 20, 1963, sahpw tohtohsang 100 pwungki alehda koasoandi me United Nations kamanahla me pid en Kihsang Koaros Wiewiahn Wiakauwe Aramas. Ekei koasoandi me duwehte met me pidada sampah pwon pil wiawihda mwurin sounpar kei. Soangen doadoahk mwahu pwukat koaros kahrehda peidek wet, Dahme pweidahr?

Nan March 21, 2012, Sekteri en U. N. General Ban Ki-moon kasalehda me mendahki mie inou kan me sahpw kan pwungkipene oh pil mie dipwisou tohto, iangahki koasoandi ehu me wehi koaros kin doadoahngki pwehn irehdi de kihsang mwamwahliki, wiakauwe aramas de kailongki ekei pwihn en aramas, pepehm en lipilipilki aramas kin pousehlahte kahrehda lokolok ong aramas tohto nan sampah pwon.

Pil nan sahpw kan me ekis pweida ni arail nantihong kihsang wiakau aramas de irair teikan en lipilipilki aramas, miehte peidek ehu: Ia duwe, doadoahk mwahu pwukat kihsangehr pepehm en lipilipilki aramas de e padahkihongete ren dehr kasalehda me re kin wia met? Ekei kamehlele me kamwahu pwukat kin sewesehte irehdi wiakauwe aramas, ahpw sohte kak kihsang pepehm en lipilipilki aramas. Dahme kahrehda? Pwehki wiakauwe aramas kak sansal mwohn aramas oh kin mie kalokepe nan kosonned, ahpw lipilipilki aramas kin pidada dahme aramas kin medewe de pehm loalarail, me kosonned sohte kak kaunda.

Ihme kahrehda, emen me songosong en kihsang irair en lipilipilki aramas en dehr ihte kauhdi wiakauwe aramas ahpw e anahne pil wekidala madamadau oh pepehm en emen eh kin kilangwohng ehu pwihn en aramas. Met uhdahn kak wiawi? Ma ei, ia duwen? Kitail tehkpene dahme wiawihong ekei me pahn sewese kitail en kilang me kaidehn ihte aramas kak wiahda wekidekla kan ahpw pil mie mehkot me kak sewese irail en wia met.

Linda: I ipwidi nan palieir en Aperika. I kin kilangwohng emen me kaidehn aramas pwetepwet sang palieir en Aperika me re sohte kesempwal, re sohte sukuhl oh ke sohte kak likih irail, oh re wiahte lidu kei ong aramas pwetepwet kan. I tengala nan madamadau en lipilipilki aramas ahpw I sohte pohnese met. Ahi madamadau tepida wekila ni ei tepida onopki Paipel. I sukuhlki me “Koht sohte ketin lipilipilki aramas” oh me loalatail kin kesempwal sang soangen poh dah kilitail de lokaia dah kitail lokaiahki. (Wiewia 10:34, 35; Lepin Padahk 17:3) Nan Pilipai 2:3 sewese ien kilang me ma I kin wiahki meteikan koaros me re mwahusang ie, I pahn kak powehdi pepehm en lipilipilki aramas. Ahi weweidki kaweid en Paipel me duwehte met akan sewese ien nsenohki esehla meteikan sohte lipilipil soangen poh dah kilirail. Met I saledek sangehr pepehm en lipilipilki aramas.

 Michael: I tikida wasa kis nan Australia me pali laud en aramas ako pwetepwet oh I kakairada pepehm en lipilipilki aramas sang sapw en Eisia kan, ahpw mehlel mehn China. Pepehm wet uhdahn kehlail. Ni ei kin tangahki sidohsa oh kilangada emen me masarail ko mesen mehn Eisia, I pahn kihdi ei kilahs en sidohsao oh wering irail oh nda “Pwurala nan sapwomwo!” Mwuhr, ni ei tepida onopki Paipel, I diarada duwen sapwellimen Koht madamadau ong aramas akan. E ketin poakohng irail sohte lipilipil ia wasa re kohsang ie de mwomwarail. Soangen limpoak wet sair ie, oh ei kailok uhd wekiong limpoak. En wiahda wekidekla pwukat uhdahn kapwuriamwei. Met I inenen perenki werekiong aramas me kohsang soangsoangen sahpw oh irair en mour. Met kalaudehla ei wehwehki duwen mour oh pil kahrehiong ie peren laud.

Sandra: Ei nohno kohsang Umunede nan Delta, Nigeria. Ahpw ahi pahpao, eh peneinei kohsang Edo oh kin lokaiahki lokaiahn Esan. Pwehki met, peneinei en ahi pahpao kin uhdahn mwamwahliki ahi nohno lao lel rahno me e mehla. Eri I inoukihda me I sohte mwahn pahn wia mehkot me pidada emen me lokaiahki lokaiahn Esan oh I sohte pahn pwoudiki emen sang Edo. Ahpw ni ahi tepida onopki Paipel, ahi madamadau tepida wekila. Pwehki Paipel mahsanih me Koht sohte ketin lipilipilki aramas oh mehmen me lemmwiki ih kin pwungla reh, ihs ngehi pwe I en kailongki aramas pwehki arail keinek de lokaia? I kapwungala ahi madamadau oh ahneki popohl rehn ahi pahpao eh peneinei. Ahi doadoahngki kaweid kan en Paipel kahrehiong ie en ahneki peren oh popohl. E pil sewese ien ehuong meteikan sohte lipilipil mwomwen ar tikida, soangen aramas dah irail, arail lokaia de wehi me re kohsang ie. Ihs me I pwoudikihda? Ohl emen sang Edo me kin lokaiahki lokaiahn Esan.

Dahme kahrehda Paipel kak sewese irail pwukat oh pil me tohto teikan ren powehdi kailok oh pepehm en lipilipilki aramas? Met pwehki Paipel iei Mahsen en Koht. E ahneki manaman en wekidala ahn emen madamadau oh pepehm duwen meteikan. Patehng met, Paipel kasalehda dahme pil anahn pwehn kihsang pepehm koaros en lipilipilki aramas.

Loalokongkihla Paipel kak sewese irehdi oh kihsang pepehm kehlail kan, ahpw mie soahng riau me anahne kohsang mwohn lipilipilki aramas eh kak sohrala douluhl. Keieu, dihp oh soh unsek en aramas. Paipel mahsanih: “Sohte emen me sohte dipe.” (1 Nanmwarki 8:46) Eri sohte lipilipil uwen atail kin nantihong, kitail ahneki soangen kahpwalohte me wahnpoaron Pohl ahneki. E ntingihedi: “Ni ahnsou me I kin inengieng wia dahme mwahu, mehkot me suwedte me mie me I kak pilada.” (Rom 7:21) Ihme kahrehda, mie ahnsou me loalatail me soh unsek pahn pwurehng ahneki “lamalam suwed” me kak kahrehiong kitail en ahneki pepehm en lipilipilki aramas.​—Mark 7:21.

Keriau, Sehdan me Tepil ahneki manaman en kamwakid soahng kan. Paipel kahdaneki ih “sounkam aramas emen” oh me e “kin pitipitih sampah pwon.” (Sohn 8:44; Kaudiahl 12:9) Met kawehwehda kahrepen lipilipilki aramas mihla wasa koaros oh dahme kahrehda tohnsampah sohte kak kihsang madamadau kehlail wet. Re pil sohte kak kihsang wiakauwe aramas, kamalahn keinek kan oh pil wiewia teikan en kailongki pwihn en aramas ehu, pwihn en pelien lamalam ehu oh aramas me weksang irail.

Ihme kahrehda, mwohn pepehm en lipilipilki aramas eh pahn kohsang, dihp, soh unsek, oh manaman en Sehdan me Tepil anahne uhdahn kasohrala. Paipel kasalehda me Wehin Koht pahn kapwaiada met.

Sises Krais ketin padahkihong sapwellime tohnpadahk kan ren kapakapki ong Koht: “Mweimwi en pweida wasa koaros, kupwuromwi en kin wiawi nin sampah duwen eh kin wiawi nanleng.” (Madiu 6:10) Wehin Koht iei me pahn kihsang wiewia sapahrek koaros, me iangahki soangen wiewia koaros me pidada lipilipilki aramas.

Ahnsou me Wehin Koht pahn pweida oh pahn kaunda sampah, Sehdan pahn selidi douluhl pwe “e dehr kin pitih wehi kan.” (Kaudiahl 20:2, 3) Eri, e pahn mie “sampah kapw,” de pwihn en aramas ehu, me “pwungen kalahngan en Koht pahn poadada ie.” *—2 Piter 3:13.

Irail me pahn mihmi nan koasoandi pwung wet pahn unsekla oh saledeksang dihp. (Rom 8:21) Nin duwen towe kei en Wehin Koht, re sohte pahn kahrehda “meninkau de mehkot suwed.” Dahme kahrehda? “Pwe sampah pahn direkihla kupwurokong en KAUN-O, duwehte madau eh kin direkihla pihl.” (Aiseia 11:9) Ni ahnsowo, tohnsampah koaros pahn sukuhlki duwen sapwellimen Siohwa Koht ahl akan oh kahlemengih sapwellime irair en limpoak. Met pahn wehwehki kaimwiseklahn pepehm koaros en lipilipilki aramas, “pwe Koht sohte kin ketin lipilipilki aramas.”​—Rom 2:11.