1, 2. Dahme Sises ketin wia nipwong en Nisan 14, pahr 33? (Menlau kilang tepin kilel.)

 MARAMO mat nipwong en Nisan 14 pahr 33 nan Serusalem. Sises oh sapwellime wahnpoaron ko wia kamadipw en Pahsohpa, kataman ehu pwehn kataman ong aramas akan duwen Siohwa eh ketin doarehla mehn Israel kan sang Isip sounpar 1,500 samwalahro. Sises ketin wia saken soutik tohrohr ehu rehn sapwellime wahnpoaron lelepek ehk emen ko, saken soutik ehu me sapwellime tohnpadahk kan pahn pwurepwurehng wia sounpar koaros pwehn katamanda sapwellime pwoula. *​—Mad. 26:1, 2.

² Sises ketin loulou, ketikihong sapwellime wahnpoaron ko pilawa me sohte doal ihs oh mahsanih: “Kumwail iang ale oh tungoale.” Ih eri ketin ale delen waino, ketin loulou oh mahsanih: “Kumwail koaros iang tungoale.” (Mad. 26:26, 27) Mie wehwe tohrohr me pid pilawao oh waino. Sapwellimen Sises wahnpoaron lelepek ko sukuhlki soahng tohto nipwong kesempwalo.

3. Peidek dah kan me kitail pahn koasoiapene nan iren onop wet?

 ³ Sises kupwurki me sapwellime tohnpadahk ko en tamataman eh pwoula sounpar koaros, me mwuhr adanekihla Saken Soutik en Kauno de Katamano. (1 Kor. 11:20) Mie peidek kei me pwarada. Dahme kahrehda kitail en tamataman pwoulahn Sises? Ia wehwehn pilawao oh waino? Ia duwen atail kak kaunopada ong Katamano? Ihs me pahn iang tungoale pilawao oh waino? Oh ia duwen Kristian kan arail kasalehda me re kin kesempwalki koapworopwor me re ahneki?

4. Pwehki pwoulahn Sises, dahme kitail kak ahneki?

⁴ Pwehki Adam wiahda dihp, met kahrehda kitail sohsohki dihp oh mehla. (Rom 5:12) Sohte aramas soh unsek men kak patohwanohng Koht pweinen eh mour de mour en meteikan. (Mel. 49:6-9) Ahpw Sises ketin tounmeteikihla sapwellime mour unsek ong kitail oh patohwanohng Koht pweinen meirong wet. Ni eh ketin wia met, Sises ketin kahrehiong kitail en kak ahneki koapworopwor en mour kohkohlahte, saledek sang dihp oh mehla.​—Rom 6:23; 1 Kor. 15:21, 22.

5. (a) Ia duwen atail ese me Koht oh Sises kin ketin poakohng kitail? (b) Dahme kahrehda kitail en iang towehda rahnen Katamano?

⁵ Koht ketin kadehdehda sapwellime limpoak ong aramas akan ni eh ketikihda meirongo. (Sohn 3:16) Sises pil ketin kadehdehda sapwellime limpoak ni eh ketin tounmeteikihla eh mour ong kitail. Pil mwohn eh ketido sampah, Sises kin ketin “perenkihda aramas akan koaros.” (Lep. Pad. 8:30, 31) Kitail uhdahn kalahnganki dahme Siohwa oh Sises ketin wiadahr ong kitail! Ihme kahrehda kitail kin peikiong sapwellimen Sises kehkehlik en ‘wia met ong ni katamanpe’ sang ni atail iang towehda rahnen Katamano.​—1 Kor. 11:23-25.

6. Dahme kitail wehwehki duwen pilawa oh wain en Katamano?

⁶ Erein kaimwiseklahn saken soutik rehn sapwellime wahnpoaron ko, Sises sohte ketin wiahda akmanaman kei oh wekidala pilawao ong ni kahlepe de waino ong ni sapwellime nta. E mahsanihki duwen pilawao: “Kumwail ale, pwe iei [“Met wehwehki,” NW] werei met.” E pil mahsanihki waino: “Ih [“Met wehwehki,” NW] ntahio met me pahn kepwilipwilkihdi aramas koaros, ntahi me kin kadehde sapwellimen Koht inou kapw.” (Mark 14:22-24) E sansal me pilawao oh waino kin wiahte karasaras kei.

7. Dahme pilawa me sohte doal ihs kin wiliandi?

⁷ Nipwong kesempwalo, Sises ketin doadoahngki pilawa sohte doal ihs me kohsang ni kamadipw en Pahsohpao. (Eks. 12:8) Ekei pak Paipel kin doadoahngki ihs pwehn karasaraskihong dihp. (Mad. 16:6, 11, 12; Luk 12:1) Pilawa me sohte doal ihs me Sises ketin doadoahngki kin wiliandi kahlepeo me sohte dihp ehu mie. (Ipru 7:26) Ihme kahrehda kitail kin doadoahngki pilawa me sohte doal ihs ni rahnen Katamano.

8. Dahme waino kin wiliandi?

⁸ Wain me Sises ketin doadoahngki kin wiliandi sapwellime ntao, de sapwellime mour, duwehte wain me kitail kin doadoahngki rahnpwukat ni rahnen Katamano. Likin Serusalem, mie wasa ehu me adaneki Kolkoda, wasa me e pwoukinkitailla oh ketikihda moure “pwe en lapwahda dipen aramas tohto.” (Mad. 26:28; 27:33) Ma kitail kalahnganki kisakis kesempwal wet, emenemen kitail pahn kaunopada sounpar koaros ong mwekid tohrohr wet. Ia duwen atail kak wia met?

9. (a) Dahme kahrehda kitail en doadoahngki koasoandi en wadawad en Paipel ong Katamano? (b) Ia omw pepehm duwen meirongo?

⁹ Ehu ahl en kaunopada ong Katamano iei en doadoahngki koasoandi en wadawad en Paipel ong Katamano me mi nan neitail pwuhken Tetehk Paipel Ehuehu Rahn. Wadewadek dahme wiawi nan Paipel pahn sewese kitail en doudouloale dahme Sises ketin wia mwohnte e pwoula. * Emen sister ntingihedi: “Se kin kasikasik Kataman en wiawi. Se kin pehm me kesempwalpen Katamano kin wia lalaudla pahr koaros. I tamataman . . . I kilang paliwar en ahi pahpao mwurin e mehla oh ih ahnsou me I uhdahn kesempwalikihla oh kalahnganki meirongo. . . . Mehlel, I ese iren Paipel koaros me pid meirongo oh I kak kawehwe ong aramas teikan! Ahpw, ihte mwurin ahi pehmada duwen kasuwedpen mehla me mohngiongi dirkihla peren pwe I wehwehki duwen dahme koasoandi en meirongo pahn wiahiong kitail.” Atail doudouloale duwen sapwellimen Sises meirongo eh pahn sewese pein kitail kin wia ehu ahl kesempwal ong atail en kaunopada ong Katamano.

10. Dahme kitail pil kak wia pwehn kaunopada ong Katamano?

¹⁰ Pil ehu ahl me kitail kak kaunopada iei en kalaudehla atail ahnsou ong kalohk oh luke aramas tohto ni uwen me kitail kak pwe ren iang towehda Katamano. Mwein kitail kak iang wia sawaspen pioneer. Ni atail kin koasoiong meteikan duwen Koht, sapwellime Ohl oh pil koapworopwor en mour soutuk, kitail pahn ahneki pepehm en nsenamwahu pwe kitail wiadahr dahme Koht ketin kupwurki kitail en wia.​—Mel. 148:12, 13.

11. Dahme kahrehda Pohl nda me ekei mehn Korint ko kin tungoal oh nim ni ahl me sohte konehng ni rahnen Katamano?

¹¹ Ni omw kaukaunop ong Katamano, doudouloale dahme Pohl ntingkilahng Kristian kan nan Korint. (Wadek 1 Korint 11:27-34.) E nda me ma emen tungoale pilawao oh nim waino ni ahl me sohte konehng, de sohte wauneki, e pahn dipada ong “kahlep oh ntahn Kaun-o.” Eri, ma me keidi men wiahda tiahk sapwung ehu oh iang tungoale pilawao  oh waino, e kin “tungoalehla oh nimala kadeik ong pein ih.” Ni mwehin Pohl, Kristian en Korint tohto wiahda tiahk sapwung. Ekei irail kakete tungoale oh nim nohn daulihala mwohn de erein Katamano oh ele kahrehiong ren men meir. Irail kasalehda laud arail sohte wauneki mwekid kesempwalo, eri ni arail iang tungoale pilawao oh waino, Koht sohte ketin kupwurkin irail.

12. (a) Dahme Pohl kin karasahiong Katamano? Dahme e katamankihong irail kan me iang tungoale pilawao oh waino? (b) Dahme emen me kin iang tungoale pilawao oh waino anahne wia ma e wiahda dihp laud ehu?

¹² Ni Pohl eh karasahiong Katamano duwehte ahnsoun sakpene ehu, e katamankihong irail kan me kin iang tungoal: “Kumwail sohte kak nimpil sang nan sapwellimen Kaun-o dahl oh pil nimpil sang nan nein tepil kan dahl; kumwail sohte kak mwohdehng sapwellimen Kaun-o tehpel oh pil ni tehpel en tepil kan.” (1 Kor. 10:16-21) Ma emen me kin iang tungoale pilawao oh waino wiahda dihp laud ehu, e anahne kohla rehn elder kan pwehn ale sawas. (Wadek Seims 5:14-16.) Ma eh wiewia kan kasalehda me e uhdahn koluhla, eri e sohte kasalehda me e mwamwahliki sapwellimen Sises meirongo ni eh iang tungoale pilawao oh waino ni Katamano.​—Luk 3:8.

13. Dahme kahrehda kitail en kapakapki koapworopwor me Koht ketikihong kitail?

¹³ Kitail pil kak kaunopada ong Katamano sang ni atail kin kapakapki oh doudouloale koapworopwor me Koht ketikihong emenemen kitail. Kitail sohte men kasalehda atail sohte wauneki sapwellimen Sises meirongo. Ma kitail sohte ahneki mehn kadehde mwahu me kitail iang keikihdi sapwellimen Koht manaman, kitail en dehr iang tungoale pilawao oh waino. Eri, ihs me pahn iang tungoale pilawao oh waino?

14. Pwehki me keidi kan iang kisehn inou kapwo, dahme re kin wia ni Katamano?

¹⁴ Irail kan me iang tungoale pilawao oh waino ni Katamano kin uhdahn kamehlele me re iang kisehn inou kapwo. Sises mahsanihki waino: “Dahl en wain wet, ih sapwellimen Koht inou kapw me wiawihkidahr ntahi.” (1 Kor. 11:25) Siohwa ketin wiahda inou en Kosonnedo rehn mehn Israel ko ahpw mwuhr ketin mahsanih me e pahn ketin wiliankihdi inou kapw ehu. (Wadek Seremaia 31:31-34.) Koht ketin wiahda inou kapw wet rehn me keidi kan, de “Israel en Koht.” (Kal. 6:15, 16, NW) Pwoulahn Sises kahrehda inou wet en kak wiawi. (Luk 22:20) Sises iei Sounkadokepene inou kapwo. Irail me keidi lelepek kan me iang kisehn inou kapwo pahn iang Sises ket nanleng.​—Ipru 8:6; 9:15.

15. Ihs me iang kisehn inou en Wehio? Ma re lelepek, pwais kaselel dahieu me re pahn ahneki?

¹⁵ Me keidi kan ese me re pil iang kisehn inou en Wehio. (Wadek Luk 12:32.) Inou wet wiawihda nanpwungen Sises oh sapwellime me keidi lelepek kan me iang ih “nan sapwellime lokolok.” (Pil. 3:10) Me keidi lelepek kan rahnpwukat pil iang kisehn inou wet. Re pahn iang Krais ketin kaunda nin duwen nanmwarki kei nanleng kohkohlahte. (Kaud. 22:5) Re warohng iang tungoale pilawao oh waino ni Saken Soutik en Kauno.

16. Menlau kawehwehda ni mwotomwot ia wehwehn Rom 8:15-17.

¹⁶ Me keidi kan uhdahn kamehlele me irail iei sapwellimen Koht oh re kak iang tungoale pilawao oh waino. (Wadek Rom 8:15-17.) Pohl koasoia me re kin likweriong Koht: “Semei, Semei.” Wasaht Pohl doadoahngki lepin lokaiahn Aramaik me kin kasalehda limpoak, duwehte “ipa,” oh wahu, duwehte “semei.” E kin kasalehda nanpwungmwahu tohrohr  me me keidi kan ahneki rehn Siohwa ni sapwellime manaman eh wiahkinirailla sapwellime. Sapwellimen Koht manaman “kadehdehda” met, kahrehda re uhdahn ese me re wia sapwellimen Koht me keidi kan. Met sohte wehwehki me re sohte men kousoan nin sampah. Irail ese me ma re lelepek lao lel mehla, re pahn iang Sises wia nanmwarki kei nanleng. Oh re ese me Siohwa me ketin katohreirailla, de keiehdi irail. Me malaulaute sang meh 144,000 en sapwellimen Koht me keidi kan me luhwehdi nin sampah rahnwet. (2 Kor. 1:21; Kaud. 14:1) Re pehm me re uhdahn karanih Siohwa ni arail kin likwerikin ih “Semei!”

17. Koapworopwor dahieu me me keidi kan ahneki? Ia duwen arail ese me re wia me keidi kei?

¹⁷ Ma kowe Kristian keidi men, ke pahn kin kalapw kapakapki omw koapworopwor en iang mi nanleng. Oh mie iren Paipel kan me wehwehparail kin kesempwal ong uhk. Karasepe, ni Paipel eh mahsanih duwen kapwopwoud me wiawi nanleng nanpwungen Sises oh sapwellime “lih kamwohdo,” ke ese me met kin dokedoke iuk oh ke kin kasikasik. (2 Kor. 11:2; Sohn 3:27-29; Kaud. 21:2, 9-14) De ni Paipel eh kin kawehwehda duwen sapwellimen Koht limpoak ong me keidi kan, ke ese me Koht kin ketin mahmahsaniong uhk. Oh ni omw kin wadek kaweid kan nan Paipel me kin pidadahte me keidi kan, sapwellimen Koht manaman kin kamwakid uhk en peikiong. Sapwellimen Koht manaman kin kadehdehda ong uhk me omw koapworopwor iei en kohla nanleng.

18. Koapworopwor dahieu me “sihpw teikan” ahneki? Ia omw pepehm duwen koapworopwor wet?

¹⁸ Ma ke iang “pokon kalaimwun” en “sihpw teikan,” Koht ketikihonguhkehr koapworopwor en kousoan nan Paradais nin sampah kohkohlahte. (Kaud. 7:9, NW; Sohn 10:16, NW) Ia omw pepehm ong ahnsou kohkohdo? Ke kin perenda ni omw doudouloale dahme Paipel mahsanihki duwen Paradais ni ahnsou kohkohdo. Ke kin kasikasik en kousoan nan sampah meleilei ehu rehn omw peneinei oh kompoakepahmw kan. Ke kin men kilang duhpek, semwehmwe, lokolok, soumwahu oh mehla ar sohla pahn wiawi. (Mel. 37:10, 11, 29; 67:6; 72:7, 16; Ais. 33:24) Ke pwandiki omw pahn kilang irail kan me ke poakohng ar pahn iasada. (Sohn 5:28, 29) Ke kin uhdahn kalahngankihong Siohwa koapworopwor kaselel wet! Mendahki ke sohte iang tungoale pilawao oh waino, ke kin iang Katamano pwehki ke kalahnganki sapwellimen Sises meirongo.

19, 20. (a) Ia duwen omw kak mour kohkohlahte? (b) Dahme kahrehda ke pahn iang towehda Katamano?

¹⁹ Ke kak mour kohkohlahte, nin sampah de nanleng, ihte ma ke kasalehda pwoson Siohwa Koht, Sises Krais oh meirongo. Ma ke kohla iang towehda Katamano, doudouloale omw koapworopworo oh pil kesempwalpen pwoulahn Sises. Mwurin kihrlahn ketipin en Nialem, April 3, 2015, aramas rar rar kei nan sampah pwon pahn iang towehda Katamano nan Wasahn Kaudok kan en Sounkadehdehn Siohwa kan oh pil wasa teikan.

²⁰ Ni atail kin kaunopadahng Katamano ni madamadau pwung, kitail pahn uhdahn kalahnganki sapwellimen Sises meirongo. Sang ni atail rongorong kanahieng padahk en Katamano, kitail pahn mwekidki en kasalehda limpoak ong meteikan oh padahkihong irail duwen sapwellimen Siohwa limpoak oh dahme e ketin kupwurki ong kitail koaros. (Mad. 22:34-40) Koasoanehdi teng ken iang towehda Katamano.