Ia duwe, Koht pahn ketin mweidohng aramas en pousehlahte kaunda emenemen oh kahrehiong aramas akan en perki dahme kak wiawi ahnsou kohkohdo? Soh, nin duwen me kitail kilangehr, e pahn ketikihsang nsensuwed oh lokolok me kin wiewiawi ahnsou reirei. Sounkapikpen sampah oh aramas ketin kupwurki ken ese me ahnsou me e pahn ketin wia met kerendohr. Ia duwen eh ketin kasalehda duwen ire kesempwal wet?

Medewehla karasepe wet: Ni omw pahn kohla wasa kis doadoahngki sidohsa, ele ke pahn rapahki mahs sawas sang Internet, map kan, oh pil doaropwehn kaweid kan. Eri, ni omw kilang kilel kan oh wasa kan me pahrekiong dahme kaweido nda, ke esehier me ke kerenlahng wasa me ke pahn kohla ie. Ni ahlohte, Koht ketikihong kitail sapwellime Mahsen me kawehwehda ni sansal irair kan me kin wiawi nin sampah pwon. Ni atail kilang irair pwukat ar wie sansalda, e kin kamehlelehiong kitail me kitail miher ni ahnsou me kohkohlahng imwio.

Paipel kawehwehda me pahn mie ahnsou kesempwal tohrohr ehu nan poadopoad en sampah me pahn wiawi ni imwio. Ahnsowo pahn mie mwekid kan oh irair kan me weksang irair koaros me wiawi nan poadopoad en aramas. Tehk ekei irair pwukat me kileldi nan Mahsen en Koht.

1. PINGIPING SAMPAH PWON Kokohp ehu me kileldi nan Madiu irelaud 24 kasalehda irair kei nin sampah me pahn wiahda kilel ehu. Kilelo pahn kasalehda kaimwiseklahn koasoandi en mehkan oh imwikihla ahnsou me “imwin sampah . . . pahn kohdo.” (Iretikitik 3, 14) Irair pwukat pidada mahwen lapalap, lehk, rerrer en sahpw me kin wiawi nan ehuehu wasa, kekeirdahn uhwong kosonned, sempoak, oh widing kan me kaunen pelien lamalam kan kin wia pwehn pitihdi aramas akan. (Iretikitik 6-26) Mehlel, irair pwukat kin wiawi erein sounpar tohto. Ahpw, ni imwio eh kerendohr, mepwukat koaros pahn wiawi erein ahnsou ehute. Pil mie irair siluh me pahn iangete irair pwukat. Iet akan:

2. WIEWIAHN ARAMAS AKAN Paipel mahsanih me “imwin rahn akan,” de ahnsowo me kohkohlahng imwio, pahn wia ahnsou ehu me wiewiahn aramas akan pahn inenen suwedla. Paipel mahsanih: “Aramas pahn roporop ong pein irail, mehwo, aksuwei oh pohnmwahso; re pahn kamwakara, re sohte pahn peikiong ar pahpa oh nohno kan, oh re sohte pahn kin kasapahlkalahnganki mehkot. Re sohte pahn poadidi ong pelien lamalam; irail pahn sempoak, soh mahk, karaun likamw oh pehmara, lemei, oh re pahn kailongki me mwahu; re pahn pangala iangarail kan, re pahn loaumwohmw oh kalahwasa, oh re pahn inengieng pein arail peren laudsang kupwur en Koht.” (2 Timoty 3:1-4) Mehlel, sohte wauneki aramas kaidehn mehkot kapw, ahpw ihte ni imwin rahn akan me tiahk wet pahn inenen laudla. Kahrehda e pwung en ndahki ahnsowo “ahnsou apwal ekei.” Ia duwe, ke kin tehk duwen irair suwed pwukat rehn aramas?

3. ARAMAS WIE KAUWE SAMPAH Paipel mahsanih me Koht pahn ketin “kauwehla irail kan me kin kauwehla sampah.” (Kaudiahl 11:18) Ia duwen aramas akan ar kauwehla sampah? Paipel mahsanih me ni mwehin Noha pil pahrekiong met: “Aramas teikan koaros suwed mwohn silangin Koht, oh kamaramas kaparaparalahr wasa koaros. Mwohn silangin Koht sampah inenen suwed mehlel.” Koht eri mahsanihki duwen ahnsowo: “I pahn kamwomwala douluhl irail koaros.” (Senesis 6:11-13) Ia duwe, ke tehk duwen mehn kadehde kan me wie tohtohla duwen sampah eh direkihla tiahk lemei? Patehng met, aramas akan mieier ni ahnsou tohrohr ehu nan poadopoad. Re ahneki koahiek en uhdahn kauwehla sampah oh kamwomwala aramas koaros. Re naineki dipwisou en mahwen koaros me kak wia met. Aramas pil kin kauwehla sampah ni ehu ahl tohrohr. Koasoandi kan me katanga mour nin sampah, duwehte ahng me kitail kin esingengki, mouren tuhke oh mahn akan oh nansed, kin ekisekis wie susuwedla pwehki aramas sohte kin apwalih mwahu.

 Pein idek rehmw, ‘Aramas ahneki manaman en uhdahn kauwehla douluhl sampah sounpar epwiki samwalahro?’ Ahnsou wet, aramas kalaudehla manaman wet sang ni arail wiahda dipwisou en mahwen kehlail kan oh sang ni arail kauwehla wasahn kousoan kan. Uwen kekeirdahn wiawihdahn dipwisou kapw kan kin mwadang sang ahn aramas koahiek en wehwehki de powehdi imwila suwed me soahng pwukat kak kahrehda. Ahpw, kaidehn aramas me pahn pilada de kaunda dahme pahn wiawihong sampah ni ahnsou kohkohdo. Mwohn aramas pahn kauwehla douluhl mour koaros nin sampah, Koht pahn ketin kamwomwala irail ko me kauwehla sampah. Iei met sapwellime inou!

4. DOADOAHK EN KALOHK NIN SAMPAH PWON Pil ehu kisehn kilel en imwio kohpada me doadoahk ehu me inenen laud pahn pil wiawi: “Rongamwahu en Wehin Koht pahn lohkseli wasa koaros nin sampah, pwe kadehde en mie ong aramas koaros—a mwuri, imwin sampah ahpw pahn kohdo.” (Madiu 24:14) Doadoahk en kalohk wet pahn weksang douluhl soahng kan me pali laud en pelien lamalam kan kin wia dauliher sounpar epwiki kei pwehn iding aramas en rong irail. Erein imwin rahn akan, mie rong ehu me pahn sansalda. Met iei “Rongamwahu en Wehin Koht.” Ia duwe, mie pwihn en pelien lamalam ehu me ke ese me kin kasalehda laud duwen rohng wet? Oh mehnda ma ekei kin mwomwen kalohki soangen rohng wet, ia duwe, irail pwihn ehu nan omw wasa, de re lohkiselier rongamwahu wet ong “wasa koaros nin sampah, pwe kadehde en mie ong aramas koaros”?

Web site www.mr1310.com kin nsenohki kasalehda “Rongamwahu en Wehin Koht.” Web site wet kin kihda pwuhk kan me kawehwehda rohng wet ni lokaia daulih 700. Ia duwe, mie ekei me ke ese me kin ngoangki kasalehda duwen rongamwahu en Wehio lella nin sampah pwon? Mwohn Internet miehla, aramas akan kin esehla Sounkadehdehn Siohwa kan pwehki arail kin nantihong kalohkiseli rongamwahu en Wehin Koht. Sangete pahr 1939, lepin lokaia pwukat “Pakpakairki Wehin Siohwa” kin sansalda ni mas liki en Kahn Iroir kan. Pwuhk ehu me koasoia duwen pelien lamalam kan nda me “kereniong sohte mehkot me pahrekiong uwen laud oh kehlail” en doadoahk en kalohk me Sounkadehdehn Siohwa kan kin wia. Doadoahk en kalohk wet kasalehda ni sansal duwen rohng mwahu me ahnsou keren “imwin sampah ahpw pahn kohdo” pwehki Wehin Koht.

Ia duwe, ke tehk me kilel en irair pahieu ko nan Paipel me oaralap wet kasalehda pwaradahr nan omw ahnsou? Dauliher sounpar epwiki me Kahn  Iroir kin kasalehiong sounwadawad kan duwen irair kan en sampah pwehn sewese irail en pein kasawih me kitail kerenlahng ni imwio. Mehlel, ekei me peikasalki met sohte kin pwungki. Re kin nda me aramas kakete pein medewehda oh wiahda ire de ripoht pwukat. Re pil nda me pwehki kekeirdahn Internet de wiepe teikan me duwehte met, irair en sampah kin ihte mwomwen susuwedla. Ahpw mendahki met, mie mehn kadehde tohto me kitail miher ni imwin ahnsou tohrohr ehu nan poadopoad.

Ekei me saman kan pehm me kitail kerenlahng wekidekla laud kan ong sampah. Karasepe, nan pahr 2014, palien ripohtki keperpen pakudang kan oh wekideklahn nan wehwe (Science and Security Board of the Bulletin of the Atomic Scientists) padahkihong palien UN (United Nations Security Council) duwen keper laud me kakete kamwomwala aramas akan. Saintis pwukat koasoia me ni ar kasawih kanahieng duwen keper pwukat, e kahrehiong irail en nda me mouren aramas miher nan keper laud. Ahn aramas tohto arail kamehlele me kitail miehier ni ahnsou kesempwal ehu nan poadopoad kin lalaudla. Irail kan me wiahda Kahn Iroir wet oh tohtohn sounwadawad akan uhdahn kamehlele me ahnsou tohrohr wet iei imwin rahn akan oh me imwio pil kerendohr. Kitail en dehr perki ahnsou kohkohdo, ahpw kitail kak perenki dahme pahn wiawi ahnsowo. Dahme kahrehda? Pwehki kitail kak pitsang imwio!