Paul, ohl pwopwoud men me naineki seri riemen koasoia: “Pweinen kepwe kan nan sapwato wiahkintehieu laudla oh mwurin mwo, pweinen mwenge uhdahn laudla oh pil sohla itar. Se kin kesihnen ni lain erein awa tohto ahpw mwohn at leldahla wasa me laino tepida, mwenge ko kin kalapw nekla. Aramas akan tihtihkihla arail duhpek oh ekei kin lipwongmasala pohn ahl akan. Pweinen kepwe kan kin laudla lella rar rar kei oh mwuri lik lik kei. Mwuhr, mwohni en at wasao sohla kak kadoadoahk. Sohla nei mwohni nan pangk, oh mwohni en insurance oh retirement me I kin pwapwain ong koperment sounpwong koaros pil sohla mie.”

Paul wehwehki me e anahne doadoahngki “erpit” pwe eh peneineio en kak momour. (Lepin Padahk 3:21) E nda: “Ngehi emen sounwia lioal, ahpw I kin ale sohte lipilipil soangen doadoahk me I kak diar, me pweineo tikitiksang uhdahn pweinen doadoahko. Ekei kin pwainkin ie mwenge de kepwehn nan ihmw. Ma irail kihong ie sohpw en duhdu pahieu, I kin doadoahngki meh riau oh netikihla meh riau teiko. Mwuhr, I alehda kisin pwurok 40. Ahnsou me irail laudla, I netikihla oh uhd pwainda me 300. Mwurin mwo, I ale malek 50 oh welialihki ehd en pilawa korn riau me toutouki paun 110 ni ehu. Sang ehd en korn riau pwukat, I kamwenge ei peneineio oh ekei peneinei teikan erein ahnsou reirei.”

Paul pil ese me dahme keieu mwahu me emen kak wia iei en likih Koht. Ni atail kin kapwaiada sapwellimen Koht kehkehlik kan, e kin ketin sewese kitail. Me pid atail anahn en mour, Sises mahsanih: “Dehr kin ngoangki de raparapahki ahnsou koaros dahme kumwail pahn tungoale de nim” pwehki “Samamwail me ketiket nanleng mwahngih duwen amwail kin anahne mepwukat.”​—Luk 12:29-31.

Sapwellimen Koht imwintihti laud Sehdan pitihdier pali laud en tohnsampah pwe ren kin mwohneki mahs arail anahn en war kan. Aramas akan uhdahn pwunodki arail anahn kan, mehnda ma anahn pwukat mehlel de re pein medewehda. Re pil kin pwunodki laud ren alehda soahng kan me re sohte uhdahn anahne. Me tohto kin mihla nan pweipwand oh sukuhlkihdi ni ahl me apwal me en “pekihsang emen mwohni, ke ahpw  pahn wiahla lidun aramas me ke pekihsang mwohnio.”​—Lepin Padahk 22:7.

Ekei wiahda pilipil kan me imwila suwed. Paul nda: “Mehn mpei tohto mweselsang arail peneinei oh kompoakparail kan pwehn rapahki nan sapw teikan dahme mwahu ong irail. Ekei sohte wiahda ni pwung neirail doaropwehn seiloak kan ni arail kohkohla kahrehda irail sohte kak alehdi doadoahk. Re kalapw diarada me re anahne ruksang pilismen kan oh re pil kin memeirseli nanial kan. Re sohte mweidohng Koht en ketin sewese irail. Ahpw pwehki sapwellimen Koht sawas, se koasoanehdi teng en kin ehupene nin duwen peneinei ehu ni at lelohng kahpwal kan en mwohni.”

Paul doula koasoia: “Sises mahsanih: ‘Kumwail dehr kin pwunodki dahme pahn wiawi lakapw; pwe lakapw pahn pwukoahki pein eh pwunod. E sohte konehng kumwail en kin katohtowehla kahpwal akan me rahn akan kin wadohng kumwail.’ Eri kapakap me I kin wia rahn koaros iei en peki me Koht pahn ‘ketikihdo rahnwet at tungoal me itarohng kiht’ pwe sen kak wie momour. Oh Koht kin ketin sewesei kiht, duwehte dahme Sises inoukihda. Se sohte kin ahnsou koaros alehdi dahme se men ale. Ehu pak, I kohla ni lain en pwainda mwenge ahpw I sehse dahme irail netiki. Ni ei lella ni wasahn pweipweio, I kilang me re netiki yogurt. I sohte iouki yogurt. Ahpw mwenge ieu met, eri ih me se kang pwohngo. I uhdahn kalahngankihong Koht me erein ahnsou apwalo pwon, sohte pak ehu me ei peneineio kohla meir ahpw duhpek.” *

“Met at kahpwal en mwohnio ekis marahrahda. Ahpw pwehki dahme se lelohngo, se sukuhlkihdi me sawas me keieu kesempwal me kak powehdi pwunod iei en likih Koht. Siohwa * pahn ahnsou koaros ketin sewese kitail ihte ma kitail kin doulahte raparapahki en wia kupwure. Kitail kilangehr mehlelpen mahsen en Melkahka 34:8: ‘Kumwail pein rapahki ia uwen kalahngan en KAUN-O. Meid pai irail kan me kin diar sileparail pahn kupwure.’ Imwilahn met, se sohla perki ma se pwurehng lelohng kahpwal laud en mwohni.

“Met se wehwehkihla laud me dahme aramas akan anahne pwehn wie momour iei, kaidehn doadoahk oh mwohni, ahpw mwenge. Se kasikasik ahnsowo me sapwellimen Koht inou pahn pweida: ‘Reken wahn pilawa en kin wiewiawihte nan wehiet [“sampah,” NW].’ Ahpw ahnsou wet, at ‘tungoalenki kisin tungoal akan oh likou, met e itarohng kiht.’ Mahsen en Paipel wet kin kakehlailih kiht: ‘Kumwail dehr noahroke mwohni, ahpw kumwail nsenamwahukihte dahme kumwail ahneki. Pwe Koht mahsanih: “I sohte pahn mweisang uhk; I sohte pahn keseiukala.” Eri, kitail eimah oh patohwan, “Kaun-o, iei sawasepei, I sohte pahn masak!”’” *

Kitail anahne pwoson mehlel pwehn “poadidiong Koht” duwehte me Paul oh eh peneineio kin wia. (Senesis 6:9) Sohte lipilipil ma ahnsou wet de pil ahnsou kohkohdo kitail kin lelohng kahpwal laud en mwohni, en Paul eh mehn kahlemeng en pwoson oh erpit kin padahkihong kitail mehn kasukuhl kesempwal kan.

Ahpw ia duwen ma kahpwal en peneinei iei me kin kahrehiong kitail en pwunod?