E soaloalokong en medewe me me melahr akan pahn mourda? Wahnpoaron Pohl sohte ahneki soangen madamadau wet. Koht ketin doadoahngki ih en ntingihdi: “Ma atail koapworopworki Krais e doakedoakehte atail mouren sampah wet, eri, kitail paisuwedsang aramas koaros nin sampah. Ahpw, iet me mehlelen: Krais ketin iasadasangehr me melahr akan; kahrehda, e ketin wialahr tepin kilel en irail kan me melahr.” (1 Korint 15:19, 20) Pohl kilangwohng kaiasada nin duwen mehkot me uhdahn pahn wiawi. Sapwellimen Sises iasadao wia mehn kadehdehpen met. * (Wiewia 17:31) Ihme kahrehda Pohl kamwarenki Sises “tepin kilel”​—ih me tepin iasada ong mour kohkohlahte. Ma Sises iei me tepin, eri met wehwehki me e pahn pil mie meteikan.

Iet ehu kahrepe me ke kak kamehlelehki koapworopwor en kaiasada. Siohwa iei Koht en mehlel. “Koht . . . sohte kin ketin likamw.” (Taitus 1:2) Siohwa sohte kin oh sohte pahn pil ketin likamw. Ia duwe, e pahn kak ketin inoukihda koapworopwor en kaiasada, kasalehda me e kak ketin kaiasada aramas, ahpw sohte kapwaiada dahme e ketin inoukihda? Met sohte douluhl kak wiawi!

Dahme kahrehda Siohwa ketin koasoanehdi koasoandi en kaiasada ong ahnsou kohkohdo? Pwehki sapwellime limpoak. Sohp kalelapek: “Ma aramas emen pahn mehla, e kak pwurehng mourda? Komw pahn ketin malipe ie, I ahpw pahn patohwan sapeng, komw ahpw pahn kupwurperenkiniehda, wiepen nin limomwie.” (Sohp 14:14, 15) Sohp uhdahn kamehlele me Semeo nanleng me ketin limpoak pahn ketin kupwurki kaiasada ih. Ia duwe, Koht ketin wekila? “Ngehi KAUN-O, oh I sohte pahn wekila.” (Malakai 3:6) Koht ketin kupwurkihte en kilang me melahr akan iasada, ahneki roson mwahu oh nsenamwahu. Met kin duwehte dahme pahpa nohno limpoak koaros pahn men en  wiawi mwurin neirail seri men mehla. Ahpw weksang irail, Koht sapwellimaniki manaman en ketin kapwaiada dahme e kupwurki.​—Melkahka 135:6.

Siohwa pahn ketikihong sapwellime Ohlo manaman en kihong peren laud irail kan me pahtoukihla mehlahn irail kan me re poakohng. Ia sapwellimen Sises pepehm ong kaiasada? Mwohn e ketin kaiasada Lasarus, Sises mwahngih duwen pahtou laud en rien Lasarus lih ako oh kompoakparail ko, ih eri “ketin tentenihr.” (Sohn 11:35) Pil ehu pak, Sises ketin tuhwongada liohdi en Nain men me nah iehroso mehla. Sises “ketin kupwurehla, mahsanihong, ‘Lih ke dehr seng!’” Ahnsowohte e ketin kaiasada nein liho pwutako. (Luk 7:13) Eri Sises kin uhdahn ketin wehwehki duwen pahtou oh mehla. Sises pahn uhdahn kupwurperenki ketikihong aramas akan kahrepen arail en pereperen a kaidehn en pahtou.

Mie pak me ke pahtoula? Ke kakete medewe me mehla wia kahpwal ehu me sohte kak mwahula. Ahpw mie mehkot me kak kamwahwihala, iei kaiasada me Koht pahn ketin wia ni eh ketin doadoahngki sapwellime Ohlo. Tamataman me Koht ketin kupwurki ken kilang met. E ketin kupwurki ken iang mi mwo oh kasamwohdo irail kan me ke poakohng me mehla. Medewehla amwail pahn pilahnehda amwail mour ong ahnsou kohkohlahte, solahr emen pahn mehla!

Lionel, me kitail koasoiapenehr mwoweo, nda: “Mwuhr, I sukuhlkihdi duwen kaiasada. Ni tapio, e apwal en kamehlele oh I sohte likih aramaso me padahkihong ie duwen met. Ahpw I tehkada duwen met nan Paipel oh diarada me e mehlel! I pwandiki pwurehng kilang ei pahpa kahlapo.”

Ke men kalaudehla omw ese met? Sounkadehdehn Siohwa kan pahn perenki kasalehiong uhk sang pein noumw Paipel dahme kahrehda re uhdahn kamehlele me mie kaiasada ong ahnsou kohkohdo. *