Medewehla me met wiawi: Heather oh Mike kin pehsehpene erein sounpwongte riau, ahpw Heather pehm me e ese Mike sangete mahs. Ira kin kalapw textpene, koasoipene erein awa kei nan delepwohn, oh ira koaros kin kak kanekehla dahme emen pahn nda mwohn eh pahn ndahla! Ahpw met Mike men wia laudsang koasoakoasoipenete.

Erein sounpwong riau nekiero, Mike oh Heather sohte kin wia mehkot laud ihte ira kin kolpe oh ekis kiss. Heather sohte men ira en nohn daulihala. Ahpw e pil sohte men luhssang Mike. Sohte emen duwehte Mike me kin kahrehiong ih en pehm me e uhdahn kaselel oh uhdahn kesempwal. E ndaiong pein ih, ‘Ni mehlel, ngehi oh Mike mwahuki emenemen . . . ’

Ma ke leme me ke koahiek oh kakehr kapehse (date) rehn emen, oh ma ke lelohng soangen irair me Heather lelohng, dahme ke pahn wia?

Ma ke pahn lus sang pohn tuhke pwoat oh song en pihr duwehte menpihr, ke pahn lokolongki imwila suwed en met. Met pil mehlel duwen kauwehla kosonned en tiahk mwakelekel, me duwehte: “Mweisang douluhl tiahk samin kan.”—1 Deselonika 4:3.

Ia imwilahn sapeikiong kehkehlik wet? Paipel mahsanih: “Me kin nenek, [kin] wiahda dihp ong pein paliwere.” (1 Korint 6:18) Ia duwen met eh mehlel?

 Sounroporop kan diarada me tohto me pwulopwul kan me wia nsenen pwopwoud ni ar saikinte pwopwoudida kin kalapw lelohng ehu de tohtohsang soangen irair pwukat pah.

• PWUNOD. Pali laud en me pwulopwul kan me kin wia nsenen pwopwoud ni ar saikinte pwopwoudida nda me re koluhkihla dahme re wia mwurin mwo.

• SOHLA LIKIH EMENEMEN. Mwurin ara wia nsenen pwopwoud, ira kin medemedewe, ‘Pil ihs likin ngehi me e wiahier nsenen pwopwoud reh?’

• DIARADA ME DAHME KE KASIK SOHTE PWEIDA. Ni mehlel, serepein tohto kin pwungki emen me pahn pere irail, kaidehn isanekin irail. Oh pwutak tohto kin diarada me re sohte kin nohn mwahuki serepein men me kin mweidohng ren kapwaiada nsenarail reh.

• Ire kesempwal: Ma ke wia nsenen pwopwoud rehn emen me ke saikinte pwoudikihda, ke pein kasaminehla paliweromw pwehki ke pilada en kesehla mehkot kesempwal. (Rom 1:24) Paliweromw nohn kesempwal ken wiakauwe!

Kasalehda me ke ahneki kehl pwehn “mweisang douluhl tiahk samin kan.” (1 Deselonika 4:3) Eri ma ke pwopwoudida ehu rahn ke kak wia nsenen pwopwoud. Oh ke pahn uhdahn nsenamwahuki wia met oh sohte pahn ahneki pepehm en pwunod, koluhla, oh nsensuwed me kin kohsang wia nsenen pwopwoud mwohn kapwopwoud.—Lepin Padahk 7:22, 23; 1 Korint 7:3.

• Ia duwe, mehmen me uhdahn poakohng uhk pahn kahrehiong kahpwal ong paliweromw de ahmw pepehm kan?

• Ia duwe, emen me uhdahn nsenohkin uhk pahn kasonge iuk en kauwehla ahmw nanpwungmwahu rehn Koht?—Ipru 13:4.