Diospa Gobiernonqa, kay jallpʼapi gobiernospa cuentankumanta tukuy jallpʼata kamachenqa (Daniel 2:44; Apocalipsis 16:14). Diospa Gobiernon kamachimonqa chaypacha:

•   Sajra runas chinkachisqa kanqanku. “Juchasapasrí kay pachamanta wijchʼusqa kanqanku” (Proverbios 2:22).

•   Manaña guerras kanqachu. Diosqa “tukuy kay pachapi chʼajwasta” chʼinyachenqa (Salmo 46:9).

•   Ni imamanta manchachikuspa kusisqas kausakusun. “Tukuy kawsakonqanku ni imata manchachikuspa; sapa uj samarikuyta atenqa uvasninkoj llanthumpi, jinataj higo sachʼankoj llanthumpi” (Miqueas 4:4).

•   Kay jallpʼa uj kʼacha paraisoman tukonqa. “Chʼin pampapis, tʼojra pampapis kusikonqanku. Qʼara pampapi kusikuspa, qhallallarishaj rosas jina tʼikanqa” (Isaías 35:1).

•   Tukuypis kusisqa trabajanapaj jina llankʼayta japʼisunchej. “Jinamanta ajllasqasniypis makisninkoj tarpusqanta mikhurikonqanku. Paykunaqa mana qhasipajchu llankʼanqanku” (Isaías 65:21-23).

•   Manaña kanqachu onqoykuna. “Mana pipis nenqachu: Onqosqa kani, nispaqa” (Isaías 33:24).

•   Ni pi viejoyapusunñachu. “Cuerponqa llampʼuman tukonqa wawaj aychanmantapis aswan llampʼuman, imaynachus wayna kashaspa karqa, chay kikinman” (Job 33:25).

•   Wañupojkunapis kausarimonqanku. “Sepulturaspi tukuy kajkunaqa wajyasqayta uyarenqanku, kausarimonqankutaj” (Juan 5:28, 29).