Espíritu santoqa, Diospa atiynin chayri kallpan (Miqueas 3:8; Lucas 1:35). Diosqa chay atiyninta apaykachan munayninta mayllapipis juntʼananpaj (Salmo 104:30; 139:7).

 Bibliapi “espíritu” palabraqa, hebreo parlaypi rúaj palabramanta jamun, griego parlaypitaj pnéuma palabramanta. Chay palabrasqa casi tukuynin lugarespi, Diospa atiyninmanta chayri espíritu santomanta parlashan (Génesis 1:2). Jinapis chay palabrasqa, kaykunamanta parlanapaj oqharikullantaj:

•   Samaymanta (Habacuc 2:19; Apocalipsis 13:15).

•   Wayramanta (Génesis 8:1; Juan 3:8).

•   Runaspata animalespatawan kausay samayninkumanta (Job 34:14, 15).

•   Uj runa imayna sonqoyojchus kasqanmanta (1 Samuel 16:16).

•   Mana rikukoj cuerpoyoj kajkunamanta, nisunman Diosmanta, angelesmanta ima (1 Reyes 22:21; Juan 4:24).

 Tukuy chay imastaqa mana rikunchejchu. Jinapis kasqantapuni yachanchej. Kikillantaj Diospa espíritu santonwanpis. Uj diccionario nin: “Espíritu santoqa wayra jina, mana rikuyta atinchejchu, nitaj llankhayta atinchejchu. Jinapis may atiyniyoj”, nispa (Diccionario expositivo de palabras del Antiguo y del Nuevo Testamento exhaustivo, de William E. Vine).

 Bibliapeqa espíritu santota Diospa “makisninwan” chayri “dedosninwan” kikinchan (Salmo 8:3; Lucas 11:20, sutʼinchaynin; Mateo 12:28 kikinchay). Imaynatachus mankata llutʼaj runa, makisninwan dedosninwan ima tʼuru mankitasta ruwan, ajinallatataj Diospis espíritu santonwan kay imasta ruwan:

•   Cielotawan jallpʼatawan (Salmo 33:6; Isaías 66:1, 2).

•   Bibliata (2 Pedro 1:20, 21).

•   Ñaupa tiempo kamachisninta yanaparqa milagrosta ruwanankupaj, tukuy sonqo predicanankupaj ima (Lucas 4:18; Hechos 1:8; 1 Corintios 12:4-11).

•   Payta kasukojkunata yanapan allin runas kanankupaj (Gálatas 5:22, 23).

Espíritu santoqa mana uj runachu, nitaj Diosllatajchu

 Bibliaqa niwanchej, espíritu santoqa Diospa “makisnin”, “dedosnin”, chayri “samaynin” kasqanta. Chaytaj rikuchiwanchej, espíritu santoqa mana runachu kasqanta (Éxodo 15:8, 10). Manka llutʼaj runapi watejmanta piensarina. Makisnenqa mana imatapis sapallankumanta ruwankuchu, nitaj cuerponmanta tʼaqasqachu kashan. Ajinallataj espíritu santowanpis. Espíritu santoqa mana sapallanmanta imatapis ruwayta atinmanchu, nitaj Diosmanta tʼaqasqachu kashan (Lucas 11:13). Bibliaqa wakin cheqaspi, espíritu santomanta yakupis kanman jinata parlan. Chantapis creeywan yachaywan ima kikinchan. Chaytaj rikuchiwanchej, espíritu santoqa mana uj runachu kasqanta, nitaj Diosllatajchu kasqanta (Isaías 44:3; Hechos 6:5; 2 Corintios 6:6).

 Bibliaqa willawanchej, Diospa sutin “Jehová” kasqanta, Wawanpa sutintaj “Jesucristo” kasqanta. Jinapis ni maypi ninchu, espíritu santoqa sutiyoj kasqanta (Isaías 42:8; Lucas 1:31). Uj pacha, discípulo Estebanqa mosqoypi jina cielota rikorqa. Chaypitaj iskay runasllata rikorqa, mana kinsatachu. Biblia nin: “Estebantajrí espíritu santowan juntʼa kaspa cielota qhawarerqa, rikorqataj Diospa jatun kayninta, Jesustapis Diospa pañanpi sayashajta”, nispa (Hechos 7:55). Arí, Estebanqa espíritu santowan juntʼa kaspa cielota rikorqa.

 Wakin runas ninku: “Espíritu santoqa Dios kikinpuni. Chayrayku ninchej: ‘Dios tata, Dios churi, Dios espíritu santo’, nispa. Qheshwa Bibliapi, waj Bibliaspipis, 1 Juan 5:7, 8 versiculospi kinsantinku ujllapuni kasqankuta nin”, nispa.

 ¿Jinapunichu? Mana. ¿Imaraykutaj chayta ninchej? Imaraykuchus ashkha yachayniyoj runas ninku, 1 Juan 5:7, 8 versiculospi Dioswan, Jesuswan, espíritu santowan ujlla kasqankuta nisqanqa, yapasqaña kasqanta. Paykunamanta ujqa, Bruce M. Metzger sutikun. Paytaj nerqa: “Wakin Bibliaspi 1 Juan 5:7, 8 nin: ‘Kinsa kanku willajkunaqa: Janaj pachapi Dios Tata, paypa Churin, Santo Espirituwan. Paykunataj ujlla kanku’, nispa. Chay palabrasqa yapasqaña kashan, manataj Mosoj Testamentopi rikhurinanchu kanman”, nispa (Un comentario textual al nuevo testamento griego).

 Wakin runas ninku: “Bibliaqa espíritu santomanta uj runamanta jina parlan. Chayrayku Dios jinapunichá”, nispa.

 ¿Jinapunichu? Mana. Ashkhas chayta ninku, Jesús espíritu santomanta uj runamanta jina parlasqanrayku. Payqa nerqa, espíritu santoqa jamuspa yanapananta, sutʼinchananta, willananta, uyarinanta, jatunchananta, ruwananta ima. Jinapis chayqa mana niyta munanchu, espíritu santoqa runapuni kasqanta, nitaj Dios jinachu kasqanta (Juan 16:7-15). Bibliaqa wakin kutis, “yachaymanta”, “wañuymanta”, “juchamantapis” runamanta jinallataj parlan. Chayrayku Bibliaqa uj cheqapi nin, “yachayqa” callepi qhaparikushasqanta. “Juchamantataj” nin, munapayta rijchʼarichisqanta, chʼaukiyasqanta, runata wañuchisqanta, rey jinataj kasqanta (Proverbios 1:20; Romanos 5:17, 21; 7:8, 11).

 Wakin runas ninku: “Espíritu santoj sutinpi bautizakunchej chayqa, espíritu santoqa Diosllataj ari”, nispa.

 ¿Jinapunichu? Mana. Bibliaqa wakin kutis “sutinpi” nispaqa, mana uj runamantapunichu parlashan, manaqa imata ruwanapajpis kamachisqa kaymanta (Deuteronomio 18:5, 19-22; Ester 8:10). Qhechuapipis wakin kutis ninchej, “uj llajtaj sutinpi” chayri “alcaldiaj sutinpi” imatapis ruwasqanchejta. Jinapis chayta nispaqa, mana runasmantachu parlashanchej. Ajinallataj espíritu santoj sutinpi bautizakuywanpis. Espíritu santoj sutinpi bautizakoj runaqa, entienden espíritu santo Diospa atiynin kasqanta, chay atiywantaj munayninta juntʼasqanta (Mateo 28:19).

 Wakin runas ninku: “Jesuspa apostolesninpis, ñaupa cristianospis, espíritu santo Dios jina kasqanta creerqanku”, nispa.

 ¿Jinapunichu? Mana. Ni Bibliapis, ni chay tiempomanta yachaj runaspis chayta ninkuchu. Encyclopædia Britannica nisqa libro nin: “Espíritu santo Dios jinallataj kasqanta yachachiytaqa, iglesia católica rikhuricherqa. Chay yachachiytaqa, 381 watapi Constantinopla llajtapi tantakuspa rikhuricherqanku”, nispa. Chay tantakuytaj, tukuynin apóstoles wañupusqankumanta 250 watasninman jinaraj karqa.