Diosqa profeta Jeremiaspa tiemponmanta judiosman parlasharqa. Paykunaqa Jehovaj a cheqan kamachiykunasninta mana kasukorqankuchu, allinninkupaj profetaspa yuyaychasqankutapis nillataj japʼikorqankuchu. Chayrayku paykunaqa manchay llakiykunapi rikukorqanku, nitaj Dios chaymanta jarkʼarqachu (Proverbios 1:24-32).

 “Chayrayku Jehová Diosqa nin”. “Chayrayku” nisqa palabrata oqharin, ñaupaj kaj versiculota qhepan kaj versiculowan ujchananpaj. Jeremías 11:1-10 versiculospi Jehovaqa llajtanman nin, ñaupa tatasninkuwan ruwasqan tratota paykuna pʼakisqankuta (Éxodo 24:7). Judiosqa Ruwajninku Diosta yupaychanankumantaqa contranpi oqharikorqanku, llulla diosestataj yupaychayta qallarerqanku. Chayrayku paykunaqa millay imasta ruwarqanku, wawasninkutapis santospaj ruphacherqanku (Jeremías 7:32).

 “Uj jatun ñakʼariyta paykunaman apachimusaj”. Ashkha kutispi Bibliaqa nin Dios imatapis ruwashasqanta, jinapis mana ruwashanpunichu, manaqa saqellan imapis pasananta. Chaypunitaj judioswan karqa, paykunaqa llulla diosesta yupaychasharqanku, Jehová Diospa kamachiykunasnintataj mana kasukusharqankuchu. Chayrayku paykunaj juchankuraykullataj millay imaspi rikukorqanku, Diostaj manaña paykunata chay imasmanta jarkʼarqachu. Chayrayku Babiloniamanta atiyniyoj reyqa Jerusalenta atiparqa, judiostataj Babiloniaman presosta apakaporqa. Atienekorqanku chay llulla diosestaj, mana paykunata chaymanta salvayta aterqankuchu (Jeremías 11:12; 25:8, 9).

 Diosqa saqerqa llajtanta chay llakiy imas pasananta, jinapis chayqa mana ninayanchu Diosqa mana cheqan Dioschu kasqanta, nitaj sajra Dioschu kasqanta. Santiago 1:13 nin: “Diostaqa mana pipis sajra imaswan pruebaman churayta atinchu, nitaj payqa pitapis pruebaman churanchu”, nispa.

 “Yanapata mañakuspa qhaparikamuwajtinkoqa mana paykunata uyarisajchu”. Jehová Diosqa, ‘makisninku yawarwan juntʼa kashan’ chaykunaj mañakuykunasninkuta mana uyarinchu. Nillataj uyarinchu llulla dioses salvananpi atienekojkunaj mañakusqankuta (Isaías 1:15; 42:17). Jinapis Jehovaqa sonqomantapacha sajra ruwasqasninkumanta arrepientekojkunaj mañakusqasninkuta uyarin, jinallataj kʼumuykukoj sonqowan payman kutirikojkunatapis (Isaías 1:16-19; 55:6, 7).

 647 watapi Jesús niraj jamushajtin, Jehovaqa Jeremiasta profeta kananpaj churarqa. Jeremiasqa 40 watasta judiosman willarqa, Jehovaj juiciosnin jamunantapuni, jinapis paykunaqa mana kasorqankuchu. Chay wataspitaj Jeremiasqa qhelqarqa Jeremías 11:11 versiculopi nishan chayta. Chay profeciaqa 607 watapi juntʼakorqa babilonios Jerusalenta thuñejtinku (Jeremías 6:6-8; 39:1, 2, 8, 9).

 Jeremías libropeqa uj sumaj willay tiyallantaj, Jehovaqa judiosman nerqa: “‘Babiloniapi 70 watas juntʼataña kashajtiykichej, [...] imatachus nisqayta juntʼasaj qankunata kay lugarman kutichimuspa’, nispa” (Jeremías 29:10). Jehovaqa chay nisqanta 537 watapi juntʼarqa. Medoswan persaswan Babiloniata atipasqankutawan, Jehovaqa saqerqa tukuynin Babiloniaj japʼiyninpi tiyakoj judíos jallpʼankuman kutipunankuta, chaypitaj payllata watejmanta yupaychanankuta (2 Crónicas 36:22, 23; Jeremías 29:14).

 Jeremías libro imasmantachus parlashasqanta yachanaykipaj kay videota qhawariy.