¿Imaraykutaj Jehovaj testigosnin Navidadta mana ruwankuchu?

RIKUCHIY

Runaspa nisqanku, cheqa kaj ima

Runaspa nisqanku: Jehovaj testigosnenqa Jesuspi mana creesqankurayku Navidadta mana ruwankuchu.

Cheqa kaj: Noqaykoqa cristianos kayku. Yachaykutaj Jesucristonejllata salvacionta tariyta atisqaykuta (Hechos 4:12).

Runaspa nisqanku: Navidadta mana ruwanata yachachispa, familiasta tʼaqanachinku.

Cheqa kaj: Familias ujchasqa kanankoqa may sumaj noqaykupaj. Chayrayku familias ujchasqallapuni kanankupaj Bibliaj yuyaychaykunasninwan yanapariyku.

Runaspa nisqanku: Navidad tiempopi mana kusirikunkuchu waj runas jina. Chay tiempopeqa runas kusikunku, sonqo tiyasqa kanku, regalostapis jaywanarikunku.

Cheqa kaj: Jehovaj testigosnenqa watantinpi tukuywan allinta kausakunaykupaj, wajkunamanpis regalosta jaywarinaykupaj kallpachakuyku (Proverbios 11:25; Romanos 12:18). Sutʼincharinapaj, tantakuyniykupi mana qolqeta mañaykuchu, nitaj runasman willamusqaykumanta cobraykuchu, imaraykuchus Jesuspa nisqanta kasukuyku. Pay nerqa: “Mana pagaspalla japʼerqankichej, amallataj pagachikuychejchu”, nispa (Mateo 10:8). Chantapis Diospa Reinollan sonqo tiyaykuyta apamunanta runasman willayku (Mateo 10:7).

Jehovaj testigosnin, ¿imaraykutaj Navidadta mana ruwankuchu?

Imaraykuchus Jesusqa, wañupusqan pʼunchayta yuyarinanchejta kamacherqa, manataj nacekusqan pʼunchaytachu (Lucas 22:19, 20).
Imaraykuchus ni Jesuspa apostolesninpis, ni ñaupa tiempomanta cristianospis Navidadta ruwarqankuchu. Diccionario del cristianismo nisqa libro nisqanman jinaqa, “Roma suyupi 330 wata chaynejpi” Navidad fiesta rikhurerqa. Chaytaj Jesuspa qhepa kaj apostolnin wañupusqanmanta 200 watasninmanraj karqa.
Imaraykuchus mana imapis rikuchinchu Jesús 25 de diciembrepi nacekusqanta. Bibliataj mana ninchu ima fechapichus nacekusqanta.
Imaraykuchus yachayku, Dios Navidadta ruwayta mana allinpajchu qhawasqanta, imaraykuchus chaytaqa runaslla costumbresninkuman jina rikhuricherqanku (2 Corintios 6:17).

¿Imaraykú Jehovaj testigosnin mana waj runas jinachu ruwanku?

Runasqa Navidad mana Bibliaj nisqanman jinachu kasqanta, runaslla rikhurichisqankuta yachaspapis, Navidadta ruwallanku. Yuyankutaj waj runas jina ruway allillan kasqanta.

Bibliaqa sapa uj imatapis allin yuyaywan ajllanapaj kallpachawanchej (Romanos 12:1, 2). Chantapis cheqa kajta jatunpaj qhawanapaj yanapawanchej (Juan 4:23, 24). Runaswan pisipaj qhawachikuyta mana munaspapis, Diospa kamachiykunasninta kasukuyta munayku.

Noqaykoqa Navidadta mana ruwaykuchu. Chaywanpis sapa uj ajllanan tiyan Navidadta ruwaytachus manachus. Chayrayku mana pitapis niykuchu: “Navidadta ama ruwaychu” nispaqa.