2 Reyes 9:1-37
9 Profeta Eliseoqa profetaspa wawasninmanta ujninta wajyaspa nerqa: “Ropaykita qʼempikuspa cinturaykiman wataykukuy, usqhayllata rispataj kay aceiteyoj yurituta Ramot-Galaadman+ apay.
2 Chayaspataj Jehosafatpa wawan Jehuta+ maskʼanki, Nimsij allchhinta. Yaykuspataj, hermanosninpa chaupinkumanta wajyaspa aswan ukhu cuartoman pusaykunki.
3 Chantá chay yuritumanta aceiteta umanman jichʼaykunki, ninkitaj: ‘Jehová Diosqa nin: “Noqa churashayki Israel nacionpa reynin kanaykipaj”,+ nispa’. Chantá punkuta kichaytawan usqhayllata ayqemunki”, nispa.
4 Ajinamanta profetaj kamachenqa Ramot-Galaadman rerqa.
5 Chayajtintaj soldadospa capitanesninku chaypi tiyasqa kashasqanku. Profetaj kamachintaj nerqa: “Capitanníy, qanpaj willayta apamuni”, nispa. Jehutaj taporqa: “Mayqenniykupaj”, nispa. Paytaj kuticherqa: “Qanpaj capitanníy”, nispa.
6 Jehutaj sayarispa wasi ukhuman yaykorqa, chaypitaj profetaj kamachenqa aceiteta Jehuj umanman jichʼarqa, nerqataj: “Israelpa Diosnin Jehovaqa nin: ‘Noqa churashayki Israelpa reynin kanaykipaj, Jehová Diospa nacionninpa reynin kanaykipaj.+
7 Tukuchinayki tiyan señorniyki Achabpa* familianta. Ajinamanta vengakusaj Jezabelmanta, payqa profetasniypa yawarninta jichʼan, Jehová Diospa kamachisnintapis wañuchin.+
8 Achabpa tukuynin familianpuni wañunan tiyan. Israel ukhumantaqa Achabpa familianmanta tukuynin qharista* tukuchisaj, mana kallpayojpis kachunku, llauchhispis kachunku.+
9 Ajinata chinkarparichisaj Achabpa familiantaqa, imaynatachus Nebatpa wawan Jeroboanpa familianta chinkarparicherqani kikinta,+ imaynatachus Ahiyaj wawan Baasajpa familiantapis chinkarparicherqani kikinta.+
10 Jezabeltataj alqos mikhukaponqanku Jezreel jallpʼapi,+ nitaj pipis paytaqa pʼampanqachu’, nispa”. Chayta niytawan profetaj kamachenqa punkuta kichaytawan ayqekorqa.+
11 Señorninpa kamachisnin kasharqanku chayman Jehú llojsimojtintaj, paykunaqa taporqanku: “¿Allillanchu? ¿Imamantaj chay loco jamusqa?”, nispa. Jehutaj kuticherqa: “Qankuna yachankichejña imayna runachus kasqanta, imaynatachus parlasqantapis”, nispa.
12 Paykunataj nerqanku: “Mana jinachu. Ama jina kaspa willarillawayku, ¿ima nisunkitaj?”, nispa. Jehutaj kuticherqa: “Chayta chayta niwan, chantá nillawantaj: ‘Jehová Diosqa nin: “Noqa churashayki Israelpa reynin kanaykipaj”,+ nispa’”.
13 Chay ratopacha sapa ujninku ropasninkuta gradasman mastʼarqanku paypa chakin uraman.+ Chantá putututa waqachispa qhaparerqanku: “Jehuqa rey”,+ nispa.
14 Chantá Jehuqa+ Jehorampa contranta oqharikorqa.
Aswan ñaupajllata Jehoramqa Israelpa ejercitonwan khuska Ramot-Galaadpi maqanakuspa kasharqa+ Siriaj reynin Hazaelwan,+ ama Israelman yaykumunanpaj.
15 Siriamanta rey Hazaelwan maqanakushajtintaj, Jehoramtaqa Siriamanta soldados flechawan japʼirparicherqanku.+ Chayrayku rey Jehoramqa Jezreelman+ kutiporqa nanasqasninmanta sanoyapunanpaj.
Jehutaj paywan kasharqanku chay runasta nerqa: “Noqaman kutisqa kashankichej chayqa, ama saqenkichejchu ni pi kay llajtamanta ayqespa Jezreelpi kayta willaramunanta”, nispa.
16 Chantá Jehuqa carretanman wicharispa Jezreelman kachaykukorqa. Jehoramqa Jezreelpi onqosqa kasharqa, Judamanta rey Ocoziastaj Jehoramta waturikoj uraykamusqa.
17 Jezreel llajtata qhawaj guardiataj torrepi sayasharqa, rikorqataj Jehujpa ashkha soldadosnin qayllamushasqankuta. Chay ratopachataj nerqa: “Ashkha runas jamushanku”, nispa. Jehoramtaj nerqa: “Caballospi purej soldadosmanta ujninta kachay, chay runasta tapurimuchun: ‘¿Tukuy imapis allillanchu?’, nispa”.
18 Caballopi purej soldadotaj taripamuspa nerqa: “Reyqa nin: ‘¿Tukuy imapis allillanchu?’, nispa”. Jehutaj kuticherqa: “¿Imaynatataj chayta tapuwankiri? Jaku kutina, qhepayta jamuy”, nispa.
Qhawaj guardiataj reyman willacherqa: “Kachasqanchej runaqa paykunata taripan, pero mana kutimunchu”, nispa.
19 Chantá caballopi purej waj soldadotañataj kacharqa, chay kachasqa soldadotaj paykunata taripaspa nerqa: “Reyqa nin: ‘¿Tukuy imapis allillanchu?’, nispa”. Jehutaj kuticherqa: “¿Imaynatataj chayta tapuwankiri? Jaku kutina, qhepayta jamuy”, nispa.
20 Qhawaj guardiataj reyman willacherqa: “Chay kachasqanchej soldadoqa rispa paykunata taripamullantaj, pero nillataj kutimunchu. Carretata apamojqa locotapuni aparimushan. Nimsij allchhin* Jehujpa apamusqanman rijchʼakun”, nispa.
21 Jehoramtaj nerqa: “Carretata wakichipuwaychej”, nispa. Wakichiporqankutaj. Chantá Israelmanta rey Jehoramwan Judamanta rey Ocoziaswan+ sapa ujninku carretasninkuman wicharispa Jehuwan tinkoj rerqanku. Jehuwantaj tinkorqanku jezreelita Nabotpa jallpʼanpi.+
22 Jehoramtaj Jehuta rikuytawan nerqa: “Jehú, ¿allillanchu?”, nispa. Jehutaj kuticherqa: “¿Imaynatá imapis allillan kanmanri mamaykej qhencheriosnin kashajtinri,+ chay jinata layqeriostapis ruwajtinri?”,+ nispa.
23 Chay ratopacha Jehoramqa carretanta kutirichispa ayqekusharqa, Ocoziastapis nerqa: “Ocozías, trampaman urmanchej”, nispa.
24 Jehutaj flechana arconta* japʼiytawan flechaspa Jehoramta wasanpi japʼirparicherqa, flechaqa corazonnintapuni pasarparqa. Jehoramtaj carretanpi wañusqa wijchʼukorqa.
25 Chantá Jehuqa kamachin Bidcarta nerqa: “Jehoramta oqharispa jezreelita Nabotpa jallpʼanman wijchʼumuy.+ Yuyarikuy qanwan noqawanqa, iskayninchej tatan Achabpa qhepanta carretaspi risharqanchej, chaypachataj Jehová Diosqa paypa contranta nerqa:+
26 ‘Jehová Diosqa nin: “Qayna rikuni Nabotpa yawarninta, wawasninpa yawarnintapis”,+ nispa. Jehová Diosqa nillantaj: “Kay kikin jallpʼapi chay ruwasqaykimanta pagachisqayki”,+ nispa’. Chayrayku kunanqa Jehová Dios nisqanman jina Jehoramta oqharispa Nabotpa jallpʼanman wijchʼuykuy”,+ nispa.
27 Rey Ocoziastaj+ chay imasta rikuspa wasi huerta ladonta ayqekorqa. (Chaymantataj Jehuqa Ocoziasta qhatiykorqa, nerqataj: “Paytapis wañuchiychej”, nispa. Carretanpi Gurman ayqeshajtintaj Ocoziasta parti wañusqata saqerqanku. Gurqa Ibleam+ qayllapi kashan. Ocoziastaj ayqekullarqapuni Meguidoman chayanankama, chaypitaj wañuporqa.
28 Kamachisnintaj carretanpi Ocoziasta Jerusalenman aparqanku. Sepulturanpitaj pʼamparqanku ñaupa tatasnintawan khuskata Davidpa Llajtanpi.+
29 Ocoziasqa Judapi rey jina kamachiyta qallarisqa, Achabpa wawan Jehoram 11 watastaña Israelta kamachishajtin).+
30 Jezreelman+ Jehú chayamojtintaj, Jezabelqa+ chayta yachaytawan ñawisninta yanata pintakorqa, umantapis kʼachanchakorqa, chantá pata wasi ventanamanta qhawamusharqa.
31 Jehú punkunta yaykumushajtintaj Jezabelqa nerqa: “¿Zimritaqa allinchu risqa señorninta wañuchejtin?”,+ nispa.
32 Jehutaj chay pata ventanata qhawarispa nerqa: “¿Pitaj noqaman sayasqa kashan? ¿Pitaj?”,+ nispa. Chay ratopachataj kuraj kamachis iskaychus kinsachus chay patamanta Jehuta qhawarimorqanku.
33 Jehutaj nerqa: “Wijchʼuykamuychej chay warmita”, nispa. Paykunataj wijchʼuykamorqanku. Yawarnintaj perqasman chʼallpararqa, caballosmanpis. Jehutaj caballosninwan sarurpacherqa.
34 Chantá Jehuqa yaykuspa mikhorqa ujyarqataj. Chaymantataj nerqa: “Ama jina kaspa chay maldita warmita pʼampamuychej. Imaynapis payqa reypa wawan”,+ nispa.
35 Pʼampamunankupaj llojsimuspataj paykunaqa Jezabelpa tʼojlullantaña tarerqanku, chakisninta, makisnintawan.+
36 Kutimuspataj Jehuman willarqanku, Jehutaj nerqa: “Chaywanqa Jehová Diospa nisqan juntʼakun.+ Payqa kamachin tisbita Eliasnejta nerqa: ‘Jezreel tarpuna jallpʼapi Jezabelpa aychasninta alqos mikhukaponqanku.+
37 Jezabelpa cuerponqa wanu kanqa Jezreel tarpuna jallpʼapi, runastaj mana nenqankuchu: “Kayqa Jezabel karqa”, nispa’”.
Sutʼinchaykunasnin
^ Hebreo parlaypeqa nin, “perqaman jispʼajkunata”. Ajinata parlaj kanku qharista chejnikuspa.
^ Hebreo parlaypeqa nin, “wawan”.
^ Flechana arco: waj lugarespi ninku camba flecha.
