Isaías 2:1-22
2 Amozpa wawan Isaiasqa kayta rikorqa Judamanta, Jerusalenmantawan:+
2 Qhepa pʼunchaykunapi,Jehová Diospa wasinpa orqonqatukuynin orqo puntasmanta aswan patapi sumaj sayachisqa kanqa.+
Tukuynin lomasmanta aswan patapi kanqa.
Chay orqomantaj tukuy naciones wicharenqanku.+
3 Ashkha runasqa rispa nenqanku:
“Jaku, Jehová Diospa orqonman wicharinachej,Jacobpa Diosninpa wasinman.+
Payqa ñankunasninta rejsichiwasun,noqanchejtaj ñankunasninpi purisun”,+ nispa.
Leyqa Sionmanta llojsimonqa,Jehová Diospa palabrantaj Jerusalenmanta.+
4 Payqa naciones ukhupi juez kanqa,ashkha llajtaspa demandasninkuta chʼuwachanqa.
Espadasninkumanta arado rejasta ruwakonqanku,tʼojsina lanzasninkumantapis josesta ruwakonqanku.+
Nacionesqa manaña espadaswan maqanakonqankuchu,manañataj guerrapi maqanakunankupaj yachakonqankuchu.+
5 Jaku Jacobpa mirayninmanta kajkuna,Jehová Diospa kʼanchayninpi purinachej.+
6 Diosníy, qanqa nacionniykita saqerparinki, Jacobpa mirayninta.+
Paykunamanqa inti llojsimuy ladomanta costumbres juntʼaykun.
Filisteos jina layqeriosta ruwanku.+
Paykuna chaupipeqa waj llajtayoj runaspa wawasnin ashkha tiyan.
7 Nacionninkoqa qolqe metalwan qoriwan juntʼa kashan.
Valorniyoj imasninkoqa may chhika.
Nacionninkupeqa caballos juntʼa kashan,carretasninkupis mana yupay atina.+
8 Nacionninkoqa qhasi manakaj dioseswan juntʼa kashan.+
Makisninkuwan ruwasqa santosllaman kʼumuykukunku,dedosninkuwan ruwasqa santosllaman.
9 Chaywan paykunaqa manakajman chayanku, pʼenqaytaj kanku.
Chayrayku qanqa mana paykunata perdonallawajchu.
10 Chhankaman satʼikuychej, jallpʼa ukhuman pakakuychej,Jehová Dios chay jina mancharinata jamusqanrayku,jatun kaynin lliphipirisqanrayku.+
11 Jatunchakojkunaqa kʼumuykachachisqas kanqanku,runaykachajkunaqa qonqor chaki purenqanku.
Chay pʼunchayqa Jehová Dioslla jatunchasqa kanqa.
12 Chay pʼunchayqa angelesta kamachej Jehová Diospa pʼunchaynin.+
Chay pʼunchayqa jamonqa jatunchakojkunaj contrankupi, runaykachajkunaj contrankupi.
Tukuypa contrankupi jamonqa, qhapajpis wajchapis kachunku.+
13 Jamullanqataj Libanomanta chay tukuynin jatuchaj cedro sachʼaspa contrankupi,Basanmanta tukuynin roble sachʼaspa contrankupi,
14 tukuynin jatuchaj orqospa contrankupi,tukuynin jatuchaj lomaspa contrankupi,
15 tukuynin jatuchaj torrespa contrankupi, tukuynin sumaj perqaspa contrankupi,
16 tukuynin Tarsis barcospa+ contrankupi,tukuynin sumachaj barcospa contrankupiwan.
17 Jatunchakojkunaqa kʼumuykachachisqas kanqanku,runaykachajkunapis qonqor chaki purenqanku.
Chay pʼunchayqa Jehová Dioslla jatunchasqa kanqa.
18 Qhasi manakaj dioskunaqa chinkasqata chinkanqanku.+
19 Runasqa pakakonqanku chhanka cuevaspi,pampa juskʼuspipis,+Jehová Dios chay jina mancharinata jamusqanrayku,jatun kaynin lliphipirisqanrayku.+
Chayqa kanqa Dios sayarejtin, jallpʼata mancharichispa kharkatichinanpaj.
20 Chay pʼunchay runasqa qolqemanta qorimanta ruwasqa qhasi manakaj diosesninkuta oqharenqanku,kʼumuykukunankupaj ruwakorqanku chay diosesninkuta oqharenqanku,choqanqankutaj musaraña jukʼuchasman, chiñismanpis.+
21 Ajinata choqanqanku chhanka juskʼuspi pakakunankupaj,chhanka kʼajlluspi* pakakunankupaj,Jehová Dios chay jina mancharinata jamusqanrayku,jatun kaynin lliphipirisqanrayku.
Chayqa kanqa Dios sayarejtin, jallpʼata mancharichispa kharkatichinanpaj.
22 Allinniykichejpaj nisqaykichej: Amaña runallapeqa atienekuychejchu,runaqa senqanpa samaynillanwan kausan.
¿Ima nispataj runata valechikuna kanmanri?
Sutʼinchaykunasnin
^ Kʼajllu: waj lugarespi ninku kʼallka.
