Proverbios 12:1-28
12 Yuyaychasqata tukuy sonqo japʼikojqa, yachayta munakun.+
Kʼamisqata mana japʼikojtaj mana yuyayniyojchu.+
2 Jehová Diosqa kʼacha runaj ruwasqanwan mayta kusikun,sajra imasta wakichej runatarí chejnikun.+
3 Ni pi runapis allinta kausakunmanchu sajra imasta ruwaspaqa.+
Cheqan runataj ni jaykʼaj tʼirasqachu kanqa.
4 Sumaj warmeqa qosanpaj uj corona.+
Pʼenqay imasta ruwaj warmitaj qosanpa tullusninta ismuchej onqoy jina.+
5 Cheqan runaspa yuyasqankoqa cheqan.
Sajra runaspa yuyaychasqankutaj qhasi manakaj.
6 Sajra runaj parlasqanqa wañuchinapaj pakasqa trampa jina.*+
Cheqan runaj parlasqantaj salvación.+
7 Sajra runas tukuchisqa kajtinku, chinkasqata chinkapunku.
Cheqan runaj wasintaj sayallanqapuni.+
8 Uj runataqa allinpaj qhawanku allinta piensarispa parlajtin.+
Sajra sonqoyoj* runatataj chejninku.+
9 Mana kasuy runalla kaspapis kamachiyoj kayqa aswan allin,runaykachaspa mana mikhunayoj* kananmanta nisqaqa.+
10 Cheqan runaqa animalesninta sumajta cuidan.+
Sajra runataj khuyakusqanta yuyan, pero sajrallata ruwashan.
11 Jallpʼanpi tarpojqa sajsanata mikhonqa.+
Qhasi manakaj imasta maskʼajtaj mana yuyayniyojchu.
12 Sajra runaqa sajra runaspa japʼisqankuta envidiakun.
Cheqan runataj rijchʼakun ashkha poqoyniyoj sumaj saphichasqa sachʼaman.
13 Sajra runaj trampanqa parlaspa juchallikusqallantaj kashan.+
Cheqan runataj ñakʼariymanta ayqen.
14 Runaqa parlasqanwan allin imasta tarinman,+ruwasqanman jinataj imatapis japʼenqa.
15 Mana yuyayniyoj runaj ñannenqa, paymantaqa cheqan.+
Yuyayniyoj runarí yuyaychayta japʼikun.+
16 Mana yuyayniyoj runaqa chay rato phiñarpakun.+
Allin yuyayniyoj runataj insultasqankutapis mana kasunchu.
17 Allin testigoqa cheqanta parlan,mana allin testigotaj llullakuspa parlan.
18 Mana allinta yuyaychakuspa parlarpareyqa espadaj tʼojsisqan jina.
Yachayniyoj runaj parlasqantaj sanoyachin.+
19 Cheqan parlayqa wiñaypaj sayallanqapuni.+
Llulla parlaytaj uj ratollapaj kanqa.+
20 Sajra imasta wakichikoj runaspa sonqonkupeqa llullerioslla juntʼa kashan.
Runas ukhupi allin kausay kananpaj yanapakojkunataj kusisqa kanku.+
21 Cheqan runastaqa ni ima desgraciapis qhatirenqachu.+
Sajra runaspa kausayninkutaj ñakʼariywan juntʼa kanqa.+
22 Jehová Diosqa llulla runasta chejnikun.+
Cheqan kajta ruwajkunataj paypa sonqonta kusichinku.
23 Allin yuyayniyoj runaqa imatachus yachasqanta mana parlarpallanchu.
Mana yuyayniyoj runataj mana yuyayniyoj kasqanta sonqonmanta llojsichimun.+
24 Kʼuchi runasqa kamachenqanku.+
Qhella runastaj sinchʼi trabajosman churasqa kanqanku.+
25 Llakeyqa runaj sonqonta ñitʼiykun,+allin palabrataj sonqota oqharin.+
26 Cheqan runaqa uywasninpaj sumaj pastosta maskʼamun.
Sajra runastaj mana allinta purisqankupi cheqan ñanmanta wistʼuykapunku.
27 Qhellaqa mikhunanpaj mana ima animaltapis japʼimunchu.+
Runapajtaj kʼuchi kaymin aswan valorniyojqa.
28 Cheqan runaspa ñanninkoqa kausayman pusan.+
Chay ñanpeqa mana wañuy kanchu.
Sutʼinchaykunasnin
^ Chayri “wajkunata wañuchinanpaj pakaykukoj runa jina”.
^ Chayri “Wistʼu sonqoyoj”.
^ Hebreo parlaypeqa nin, “mana tʼantayoj”.
