Elisabetpa familiarnin Mariaqa Nazaretpi tiyakorqa. Payqa José sutiyoj carpinterowan casarakunan karqa. Elisabet 6 killa onqoj kashajtintaj, ángel Gabriel payman rikhurerqa, napaykorqataj: “Imaynalla María, Jehová Diosqa sonqo juntʼasqa qanwan kashan”, nispa. María chayta mana entiendesqanraykutaj ángel nerqa: “Onqoj rikhurinki uj qhari wawitayojtaj kanki, paymantaj Jesús sutita churanki. Payqa rey kanqa, gobiernontaj mana tukukonqachu”, nispa.

María nerqa: “¿Imaynataj chay kanmanri? Ni pi qhariwanpis puñuykunichu”, nispa. Angeltaj nerqa: “Jehová Diospajqa tukuy imapis atikun. Diospa atiynin qanman jamusonqa, wawitayojtaj kanki. Familiayki Elisabetpis onqoj kashan”, nispa. Mariataj nerqa: “Jehová Diospa kamachin kani, nisqaykiman jina noqapi ruwakuchun”, nispa.

 Chantá Mariaqa Elisabetta waturikoj rerqa. Pay Elisabetta saludajtintaj, Elisabetpa wawitanqa wijsanpi kuyurerqa. Elisabettaj Diospa atiyninwan juntʼa kaspa nerqa: “María, Jehová Diosqa bendecisunki. May sumajpuni Señorniypa maman watukunawanqa”, nispa. Mariataj nerqa: “Noqaqa Jehová Diosta tukuy sonqo jatunchani”, nispa. Chantá Mariaqa kinsa killata Elisabetwan qhepakuytawan kutiporqa.

Joseqa María onqoj kashasqanta yachaspa manaña casarakuyta munarqachu. Jinapis uj ángel mosqoypi nerqa: “José, ama manchachikuychu paywan casarakuyta. Payqa mana ima sajratapis ruwanchu”, nispa. Chayrayku Joseqa Mariawan casarakorqa, wasinmantaj pusakaporqa.