Siriamanta soldadosqa Israelmanta uj imillitata Siriaman apakaporqanku. Chay imillitaqa familianmanta may karupi kasharqa. Payqa Siriapi Naamanpa warminpa sirvientan karqa. Naamantaj reypa soldadosninpa kurajninku karqa. Chay imillitaqa Jehová Diosta yupaychaj, chaypi tiyakoj runastaj mana.

Naamanqa lepra onqoyniyoj karqa, chaytaj maytachá nanaj. Chay imillitaqa Naamanta yanapayta munarqa. Chayrayku patronanman nerqa: “Israel llajtapi Jehová Diospa profetan tiyan. Paypa sutenqa Eliseo. Pay qosaykita sanoyachiyta atinman”, nispa.

Patronantaj imillitaj nisqanta qosan Naamanman willarqa. Naamantajrí sanoyapunanpaj tukuy imata ruwayta munarqa. Chayrayku Israelman rerqa Eliseoj wasinman. Payqa yuyarqa Eliseo uj may rejsisqa runata jina wasinman yaykuchinanta. Eliseotajrí mana chaytachu ruwarqa. Astawanpis kamachinwan willacherqa: “Jordán  mayuman rispa, qanchis kutita pʼultikamuy, sanoyapunkitaj”, nispa.

Naamantaj mayta phiñakuspa nerqa: “Yuyarqani chay profeta Diosninpa sutinta qhaparikunanta, makintataj nanasqayman churaspa sanoyachinawanta. Astawanpis Israelpi kaj Jordán mayuman rinallayta niwan. Siriapi aswan sumaj mayus kapuwayku. ¿Nichu chaykunallaman riyman?”, nispa. Mayta phiñakuspataj Eliseoj wasinmanta riporqa.

Naamantaqa sirvientesnin sumajta piensaricherqanku, jinata nispa: “Tatáy, ¿tukuy imatacharí ruwawaj sanoyakunaykipaj? Chay profetaj nisusqanqa ruwayta atinaykipaj jinalla. Payta kasullay”, nispa. Naamanqa sirvientesninta uyarispa Jordán mayupi qanchis kutita pʼultikamorqa. Qanchis kutita yakumanta llojsimusqantawantaj sanoyaporqa. Naamanqa manchay kusisqa kasharqa, Eliseoman agradecekojtaj kuterqa. Nerqataj: “Kunanqa yachani ari, kay mundontinpi mana waj Dios kasqanta”, nispa. Naamanqa wasinman sano kutiporqa. Israelmanta imillitataj chayta rikuspa maytachá kusikorqa.