Kaypi tʼukuriy: Toniqa amiguitosninwan pujllashaspa pelotawan vecinonpa autonpa parabrisasninta pʼakirparin.

Toni kawaj chay, ¿imatá ruwawaj?

KINSA IMASTA RUWAYTA ATINKI:

1. Ayqeyta.

2. Wajman tumpayta.

3. Vecinoykiman sutʼita willayta. Chantapis pagapuyta.

Ichapis uj kajta ajllayta yuyasharqanki. Chaywanpis pantasqaykita chayri imatachus mana allinta ruwasqaykita sutʼita willasqaykeqa may sumaj.

1. Kayta ruway may allin.

   Biblia nin: “Munallaykutaj tukuy imapi allinta puriyta”, nispa (Hebreos 13:18).

2. Pantasqaykita mana pakajtiykeqa, ichapis wajkunaqa perdonallasonqanku.

   Biblia nin: “Pichus juchanta pakaykojtaqa mana allinchu renqa; pitajchus juchanta rimarispa, chaymanta tʼaqakun, chay runaqa khuyakuyta tarenqa”, nispa (Proverbios 28:13).

3. Pantasqaykita sutʼita willakuspaqa Diosta kusichinki.

   Biblia nin: “Tata Diosqa chay sajra ruwajkunata chejnikun, cheqanta ruwajkunawantajrí allinta kawsakun”, nispa (Proverbios 3:32).

Karinaqa 20 watayoj, paytaj ancha usqhayta autota apasqanrayku multata pagasqanmanta mana tatanman willarqachu. Jinapis mana wiñaypajchu chayta pakarqa. Karina nin: “Tatayqa uj watanman jina multata orqhowasqankumanta yacharqa. Chayrayku astawan chʼampaykuna karqa”, nispa.

¿Imatá chaymanta yachakunchej? Karina nin: “Pantasqasninchejta pakaykoyqa mana allinchu, imaraykuchus yachakunpuni”, nispa.

Biblia nin: “Tukuyninchej ashkha kutita pantanchej”, nispa (Santiago 3:2). Rikunchej jina pantasqanchejta sutʼita willayqa llampʼu sonqo, wiñay tukusqa runa kasqanchejta rikuchin.

Pantasqaykimanta yachakuy: Vera sutiyoj sipas nin: “Pantasqasniypi tʼukurini chaykunamanta yachakunaypaj, chaytaj aswan allin runa kanaypaj, qhepanpi manaña kikillantataj ruwanaypaj yanapawan”, nispa. Kay jinapi rikukuspa imatachus ruwayta atisqaykita qhawarina.

Tataykimanta bicicletanta mañakunki, fregarparinkitaj. Jina kajtin, ¿imatá ruwawaj?

• Chʼinlla kakuyman, tatayqa ni cuentata qokonqachu.

• Sutʼita tatayman willayman.

• Sutʼita willaspapis, wajman tumpayman.

Mana estudiasqaykirayku examenniykipi mana allinchu risunki. Jina kajtin, ¿imatá ruwawaj?

• Examenniy mana ruwayta atinaypaj jina kasqanta niyman.

• Mana estudiasqayrayku noqa juchayoj kasqayta niyman.

• Profesorniy noqawan japʼinakushasqanta niyman.

 Kunanqa ñaupajpi imasmantachus parlasqanchejta qhawariy, tʼukuriytaj 1) tatayki kasqaykipi 2) profesorniyki kasqaykipi ima. Tatayki, profesorniyki ima, ¿imatá yuyankuman kʼachallamanta imapichus pantasqaykita sutʼita willajtiyki? ¿Imatá yuyankuman juchaykita pakaykojtiyki?

Kunan tʼukuriy ñaupaj wataspi imapichus pantasqaykipi, kay tapuykunamantaj kutichiy.

¿Imatataj mana allintachu ruwarqanki? ¿Imaynatá chay chʼampayta allincharqanki?

• Pakayta yuyarqani.

• Wajman tumparqani.

• Chay ratopacha imapichus pantasqayta willarqani.

Pantasqaykita mana willaspa, ¿imaynataj sientekorqanki?

• May sumaj sientekorqani.

• Mana allinchu kasharqani, pantasqayta willanay karqa.

¿Imaynamantá astawan allinta ruwawaj karqa?

¿Imatá pantasqaykimanta yachakunki?

¿Imaraykutaj wakin kuti pantasqanchejta mana willayta atillanchejchu?

¿Imatá wajkuna yuyankuman pantasqaykita pakajtiyki? Chantá, ¿imatá yuyankuman pantasqaykita willajtiyki? (Lucas 16:10).