¿Imaraykutaj Biblia kunankama tiyan?

Biblia qhelqakuyta tukukusqanmanta, 1900 watasmanta astawanña pasan. Bibliaqa qhelqakorqa animalespa qarasninpi, chayri papiro nisqa plantamanta ruwasqa hojaspi. Chantapis Biblia qhelqakusqan parlaykunataqa, pisillaña parlanku. Mana chayllachu, gobiernos, iglesiasta kamachejkunapis, Bibliata chinkasqata chinkachiyta munarqanku. Chayrayku Biblia kunankama kasqanqa, uj milagro.

MAY chhika watasña pasajtinpis, ¿imaraykutaj Biblia mana chinkanchu? Chantá, ¿imaraykutaj may chhika runas Bibliata leeyta atinku? Chayta qhawarina.

Bibliamanta ashkha copias ruwakorqa

Israelitasqa Bibliamanta ñaupaj librosta sumajta jallchʼarqanku. Chantapis chay librosmanta ashkha copiasta ruwarqanku. Diosqa Israelmanta reyesman kamacherqa, ‘sacerdotes levitas jallchʼasqanku libromanta uj copiata ruwakunankuta’ (Deuteronomio 17:18).

Ashkha israelitasqa, Diosmanta Qhelqasqata paypa Palabranta jina qhawaj kanku. Chayrayku chay qhelqasqasta mayta leeyta munaj kanku. Paykuna ukhumanta wakenqa, qhelqeri profesionniyoj karqanku. Paykunataj Diospa Palabranta maychus kajta copiaj kanku. Chay qhelqerismanta ujqa, Esdras karqa. Payqa Diosta manchachikoj. Bibliaqa Esdrasmanta nin: “Payqa Moisespa Leyninta sumajta copiayta yachaj, chay Leytaqa Israelpa Diosnin Jehová israelitasman qorqa”, nispa (Esdras 7:6, La Biblia. Traducción del Nuevo Mundo). Masoretas nisqa runaspis, Ñaupa Testamentomanta copiasta ruwarqanku. Paykunaqa 500 watas chaynejmanta 1000 watas chaykama copiasta ruwarqanku. Mana pantanankupajtaj, palabrasta yupaspa copiaj kanku. Ajinata copiasqankurayku, Bibliaqa kunankama kikillanpuni kashan. Runas chinkachiyta munajtinkupis, Bibliaqa mana chinkanchu.

Jesús niraj jamushajtin 168 watapi, Siriamanta rey Antíoco IV, Ñaupa Testamentomanta copiasta Palestinamanta chinkachiyta munarqa. Judiosqa jinata cuentakunku: “Leymanta kʼuyuna librostaqa llikʼirarqanku, ruphacherqanku ima”, nispa. Judiosmanta parlaj librotaj nin: ‘Gobiernoj soladosnenqa, ni pita khuyarispa chay kamachiyta juntʼarqanku. Paykunaqa kʼuyuna librosta mayta maskʼarqanku, ruphacherqankutaj. Chantapis tukuy chay libroyoj kajkunata wañuracherqanku’, nispa. Chayta ruwajtinkupis, Diospa Palabranmanta kʼuyuna librosqa mana chinkarqachu. Imaraykuchus wakin judiospata Palestina ukhupi kaporqaraj. Waj lugarespi tiyakoj judiospatapis kapullarqataj.

Mosoj Testamento qhelqakusqanmanta pisi tiemponman, wakin cheqasmanta ashkha copias karqaña. Apóstol Juanpa libronmanta parlarina. Payqa chay librota Éfeso llajtapi chayri chay qaylla llajtaspi qhelqarqa. Jinapis Egipto llajtapi Juanpa libron copiamanta uj chhikanta tarisqanku. Chay llajtataj Éfeso llajtamanta may karupi kashan. Yachayniyoj runas nisqankuman jina, chay tarisqanku copiaqa, Juan libronta qhelqayta tukusqanmanta niraj 50 watasninman ruwasqanku. Chayqa rikuchiwanchej, karumanta cristianosqa usqhayllata Diospa Palabranmanta copiasniyoj kasqankuta.

Diospa Palabranmanta ashkha copias kasqanrayku, Cristo wañupusqanmanta ashkha watasninmanpis chay copiasqa kallarqapuni. 303 watamanta 23 de febreropi, imachus Romapi kasqanmanta parlarina. Chay sutʼiyayta Romata kamachej Dioclecianoqa, soldadosninta rikusqa uj iglesiaj punkusninta phirispa apaykojta. Soldadosqa chay iglesiaman yaykuspa, Diospa Palabranmanta copiasta ruphachisqanku. Chayta rikuspa, Dioclecianoqa yuyaychakusqa Diospa Palabranmanta copiasta ruphachispa cristianosta chinkachiyta atisqanta. Chayrayku qʼayantin diaqa, uj kamachiyta orqhorqa Romaj japʼiyninpi tukuynin llajtasmanta Bibliasta chinkachinankupaj. Chay kamachiyman jina, Bibliamanta tukuynin copiasta tukuy runaj rikunanta ruphachinanku karqa. Jinapis wakin copiasqa salvakorqanku. Chay copiasmantataj waj copiasta ruwallarqankutaj. Chay griegopi copiasmanta wakin cheqasqa, kunankama kashallanpuni. Yachayniyoj runas nisqankuman jina, ichá chay copiasqa Diocleciano cristianosta qhatiykachasqanmanta pisi tiemponman ruwakorqa. Chay copiasmanta ujnenqa Romapi kashan. Ujnintaj Londres llajtapi Biblioteca Británica nisqapi kashan.

Bibliata qhelqarqanku, chay runaspa qhelqasqankupuneqa manaña kanchu. Jinapis enteron Bibliamanta chayri wakin cheqasllamanta may chhika copias tiyan. Chaykunamanta wakintaj, allin unayniyoj kanku. Bibliata ashkha kutista copiajtinkupis, imachus qallariypi qhelqakusqanqa mana cambiarqachu. W. H. Green yachayniyoj runaqa, Ñaupa Testamentomanta ajinata nin: “Qallariypi qhelqakusqantaqa maychus kajtapuni copiasqanku”, nispa. Waj yachayniyoj runataj, Sir Frederic Kenyon Mosoj Testamentomanta ajinata nerqa: ‘Mosoj Testamentomanta aswan unayniyoj copiasqa, chay libros qhelqakusqankumanta pisi tiemponman copiakusqa. Chayrayku nisunman, kunan kapuwasqanchej Bibliaqa, qallariypi qhelqakorqa jinallapuni kasqanta. Mana ajinata nisunmanchu waj ñaupa librosmanta’, nispa.

Bibliaqa waj parlaykunapi traducikorqa

Biblia ashkha parlaykunapi kasqanrayku, may chhika runas Bibliata leeyta atinku. Chaytaj rikuchiwanchej, Diospa munaynin juntʼakushasqanta. Payqa munan, tukuy llajtasmanta tukuy parlayniyoj runas rejsinankuta. Chantá munallantaj, “paypa atiyninman jina, cheqa kajman jinataj” payta yupaychanankuta (Juan 4:23, 24; Miqueas 4:2).

Ñaupa Testamentoqa hebreo parlaypi qhelqakorqa. Chaytataj Palestinamanta karupi tiyakoj judíos, griego parlayman tijracherqanku. Chaytaj Septuaginta nisqa sutikorqa, tukukorqataj Jesús jamunanpaj 200 watas faltashajtin. Biblia qhelqakusqanmanta pisi tiemponman, tukuynin Biblia, astawanpis Mosoj Testamento ashkha parlaykunapi traducikorqa. Jinapis gobiernoswan iglesiasta ñaupajman apajkunawanqa, runasta Bibliata leenankuta ninankumantaqa, tukuy imata ruwarqanku Bibliata mana leenankupaj. Paykunaqa mana munarqankuchu, runas Diosmanta cheqa kajta yachanankuta. Chayrayku mana saqerqankuchu, Biblia runaspa parlayninkupi kananta.

Jinapis wakin runasqa, gobiernosta, iglesiasta ñaupajman apajkunata mana manchachikuspa, Bibliata waj parlaykunaman traducerqanku. Chaytataj ruwarqanku kausayninkuta wañuy pataman churaspa. Chaykunamanta ujqa karqa, William Tyndale. Payqa Inglaterra llajtamanta karqa. Tyndaleqa runas churanakojtinkupis, Bibliaj ñaupaj phishqa librosninta hebreo parlaymanta inglés parlayman traducerqa. Payqa ñaupajta Jehová Diospa sutinta ruwasqan Bibliapi churarqa. Españamanta Casiodoro de Reina sutiyoj runamantañataj parlarina. Payqa Bibliata castellanoman traducerqa. Jinapis chayta ruwashajtin, Iglesia Catolicaqa wañuchinanpaj mayta qhatiykacharqa. Chayrayku payqa Bibliata traducinanpaj, ayqekorqa Inglaterraman, Franciaman, Holandaman, Suizaman ima. *

Bibliaqa kunankama kapuwanchej, sapa kutitaj astawan parlaykunapi traducikushan. Chaytaj rikuchiwanchej, apóstol Pedroj qhelqasqan juntʼakushasqantapuni. Pay qhelqarqa: “Qhoraqa chʼakipun, tʼikantaj urmapun. Jehová Diospa nisqantajrí, wiñaypaj sayan”, nispa (1 Pedro 1:24, 25).

[Sutʼinchaynin]

[Recuadro]

¿MAYQEN BIBLIATAJ LEENAPAJ SUMAJ?

Bibliaqa ashkha parlaykunapi tiyan. Wakin parlaykunapitaj, imaymana Biblias tiyan. Wakin Bibliasqa mana entiendekoj palabraswan qhelqasqa kashan. Wakin Bibliastaj runas entiendesqankuman jinalla traducisqa kashan. Leenapaj chʼuwita kajtinpis, mana qallariypi qhelqakusqanman jinachu kashan. Wakin Bibliaspitajrí, traducishaspa sapa palabrapaj kikin palabrallatataj churaykusqanku.

Jehovaj testigosninpis uj Bibliata orqhollaykutaj, sutikuntaj Mosoj jallpʼapi kausajkunapaj Diospa Palabran. Ñaupajtaqa inglés parlaypi llojserqa. Chay Bibliataqa, uj grupo hermanos ima parlaykunapichus Biblia qhelqakorqa, chaymanta inglés parlayman traducerqanku. Chay inglesmanta Bibliatajrí, ashkha parlaykunaman traducikullantaj. Chayta ruwajkunaqa, necesitakusqanman jina hebreopi chayri griegopi qhelqasqasta qhawaykurerqanku. Diospa Palabran Bibliata traducejkunaqa, qallariypi qhelqakusqan sut’i entiendekojtin, sapa palabritapaj kikin palabritallatataj churanku. Paykunaqa kay tiempomanta runas Bibliata sut’ita entiendenankuta munanku, imaynatachus ñaupa tiempo runas entienderqanku, ajinata.

Wakin yachayniyoj runasqa, kay tiempomanta Bibliasta hebreopi chayri griegopi qhelqasqaswan kikinchanku. Ajinamanta yachanankupaj, may cheqastachus Bibliata traducejkuna qʼewisqankuta chayri paykunaj yuyayninkuman jinalla ruwasqankuta. Paykunamanta ujqa kashan, Jason David BeDuhn. Payqa Estados Unidosmanta uj universidadpi profesor. Chay runaqa inglés parlaypi aswan rejsisqa jisqʼon Bibliasta kikincharqa. * Chay Biblias ukhupeqa, inglespi Diospa Palabran Biblia kashallarqataj. Chaymantataj 2003 watapi, uj librota 200 paginasniyojta orqhorqa. Profesor BeDuhnqa, mayqen versiculoschus Bibliaspi churanakuyta yachan, chayta estudiarqa. ¿Imaraykutaj chay cheqasta estudiarqa? Pay nin: “Imaraykuchus Bibliata traducejkunaqa, creenciasninkuman jinalla chay versiculosta traduciyta yachanku”, nispa. Profesor BeDuhnqa, mayqen Bibliachus pantasqa kasqanta yachananpaj, sapa Bibliata griegopi qhelqasqaswan kikincharqa. Qhawarina imatachus chaymanta nisqanta.

Profesor BeDuhnqa nin: “Yachayniyoj runas, waj runaspis ninku, Diospa Palabran Bibliaqa, testigospa creenciasninkuman jinalla traducisqa kasqanta”, nispa. Jinapis pay nin: “Diospa Palabran Bibliaqa, ima palabraswanchus Biblia qallariypi qhelqakorqa, chay palabrasllawantaj traducisqa kashan. Chayllapi waj Bibliasman mana rijchʼakunchu”, nispa. Profesor BeDuhnqa mana allinpajchu qhawan, imaynatachus Diospa Palabran Biblia wakin versiculosta traducisqanta. Jinapis pay nin: “Tukuy Bibliasmanta nisqaqa, Diospa Palabran Biblialla, qallariypi qhelqasqaswan kikisitun. Chayrayku kay Bibliaqa may sumajpuni”, nispa.

Doctor Benjamin Kedarpis, chayman rijchʼakojllatataj 1989 watapi nerqa. Payqa Israel suyumanta, hebreo parlaytataj sumajta yachan. Doctor Benjamin nin: “Diospa Palabran Bibliata traducejkunaqa, qallariypi qhelqasqasta maychus kajta traducinankupaj kallpachakusqanku. Kay Bibliapeqa, mana maysitupi qʼewisqata tarinichu”, nispa.

Qanrí, ¿imayna Bibliatataj leeyta munanki? ¿Ashkha cheqaspi qʼewisqa Bibliatachu leeyta munanki? Chayrí, ¿qallariypi qhelqakusqanta kikisitunta willaj Bibliatachu? (2 Pedro 1:20, 21). Qanmanta kashan imayna Bibliatachus leenaykeqa.

[Sutʼinchaynin]

[Dibujo/foto]

Mosoj Jallpʼapi kausajkunapaj Diospa Palabran Bibliaqa, ashkha parlaykunapi tiyan.

[Dibujo/foto]

Masoretaspa copiasqanku hojas

[Dibujo/foto]

Lucas libro copiamanta uj chhikan. Chaypeqa Lucas 12:7 rikhurin, nintaj: “Ama manchachikuychejchu, qankunaqa ashkha pʼisqetusmantapis astawanraj valenkichej”

[Maymantachus foto orqhokusqan]

Ñaupajta rikhurej fotostaqa qowayku: Biblioteca Nacional de Rusia (San Petesburgo). Iskay kaj, kinsa kaj fototawan qowayku: Bibelmuseum, Münster. Aswan ukhupi kaj fototataj qowayku: © The Trustees of the Chester Beatty Library (Dublín)