Uj aviontaqa iskay ukhupuni phawachinku. Casado kausaypipis iskay ukhu kanku. Jinapis uj runa jinalla kananku tiyan. Ajinamanta ima problematapis iskayninkupuni allinchanqanku, manataj sapallankuchu.

BIBLIA NIWANCHEJ: “Manaña iskaychu kanku, manachayqa ujllaña” (Mateo 19:6).

Cristofer nin: “Casados allinta kausakuyta munanchej chayqa, purajmanta yanapanakunanchej tiyan”, nispa.

Qhariwarmis mana ujllachu kanku chayqa, ima problema kajtinpis tumpanakullanku, nitaj allinchankuchu. Imitallatapis jatun problemaman tukuchinku.

Alexandra nin: “Qhariwarmisqa uj runa jinalla kananchej tiyan. Mana yanapanakunchej chayqa, kikin cuartopi tiyakoj runas jinalla kanchej. Sapa ujninchej ladonchejta purikusunman. Jinapitaj niña imatapis qhariwarmi jina ruwasunmanchu”, nispa.

PIENSARIY

• “Ganakusqay, ¿noqajllata kasqantachu nini?”

• “Allinta samarikuyta munaspa, ¿sapallaychu kayta munani?”

• “Qosaypa chayri warmiypa familianta, ¿allintachu parlapayani?”.

PARLARIKUYCHEJ

• ¿Imaspitaj sumajta yanapanakunchej?

• ¿Imaspitaj aswan sumajta yanapanakusunman?

• ¿Imastá ruwasunman sumajta yanapanakunanchejpaj?

YUYAYCHAYKUNA

• Qhariwarmisqa uj yunta jina khuska llankʼananku tiyan.

• Sapa ujninku waj wajta purikunankumantaqa, yanapanakunanku tiyan.

Ethan nin: “‘Qanpuni juchayoj kanki’ ninakunanchejmantaqa, aswan allin qhariwarmi jina kusisqa, allintataj kausakunanchej”, nispa.

BIBLIA NIWANCHEJ: “Ama allinnillaykichejtaqa maskʼaychejchu. Manachayqa wajkunaj allinninkutapis maskʼaychej” (Filipenses 2:3, 4).