Wajkuna uj jinitas kasqallankupi anchata yuyasun chayqa, pantasqasnillankuta qhawasun. Mana noqanchej jina kajkunatataj, pisipaj qhawayta qallarisun. Ajinata yuyaspaqa mana atisunmanchu wajkunata entiendeyta. Wajkunatataj sajra ñawiwan qhawayta qallarisunman.

“Kusikojkunawan kusikuychej, waqajkunawantaj waqaychej” (ROMANOS 12:15).

¿Ima niyta munan? Kay yuyaychayqa yachachiwanchej wajkunata entiendenanchej kasqanta.

Wajkunata entiendespaqa, reparanchej noqanchej jinallataj kasqankuta. Reparallanchejtaj wajkunaqa noqanchej jinallataj sientekusqankuta, kikillantataj imatapis ruwasqankuta. Wajkunata entiendespaqa yachanchej maymanta kajtinchejpis uj jatun familia jina kasqanchejta. Ashkha imaspi kikin kasqanchejta reparakunapaj kallpachakusun chayqa, mana wajkunata qhawarallasunchu.

Wajkunata entiendespaqa respetasunchej. Senegalmanta Anne-Marie sutiyoj warmimanta parlarina. Payqa ashkha runas pisipaj qhawaj kanku, chay runasta chejnikoj. Pay willariwanchej imaynatachus wajkunata entiendey yanapasqanta. Pay nin: “Chay runasta mayta sufrejta rikuspaqa, piensarerqani paykuna kayman karqa chayqa, imaynachus sientekunaypi. Reparakorqanitaj mana wajkunamanta aswan kuraj kasqayta, nitaj ni imata ruwasqayta aswan jatunpaj qhawasqa kanaypaj”, nispa. Chayrayku runaspa problemasninkuta entiendenapaj kallpachakusun chayqa, mana paykunata qhawarasunchu.

Waj runasta mana allinpajchu qhawanchej chayqa, piensarina imaspichus paykunaman rijchʼakusqanchejpi. Piensarinataj imaynachus sientekusqankupi kay imasta ruwaspa:

• Familiankuwan mikhurispa.

• Trabajayta tukuchaspa.

• Amigosninkuwan karispa.

• Gustasqan takiyta uyarispa.

Paykunata entiendenanchejpaj kallpachakuna. Kay imaspi piensarina:

• ‘¿Imatá ruwasunman pillapis ni imapaj valesqanchejta yuyachiwajtinchej?’

• ‘¿Imaynataj sientekusunman wajkuna mana allinta rejsispa imatapis niwajtinchej?’

• ‘Paykuna partemanta kasunman chay, ¿imaynatataj wajkuna qhawanawanchejta munasunman?’