Diosqa profeta Abrahanman nerqa mirayninnejta ‘tukuy naciones bendecisqa kanankuta’ (Génesis 22:18). ¿Pimantataj parlashanman karqa?

Diosqa, casi 2.000 watasña, Jesusman atiyta qorqa ashkha milagrosta ruwananpaj. Chay milagrosqa rikucherqa, Dios tukuy nacionesta bendecinanta Abrahanman nisqanqa, Jesusnejta juntʼakunanta. Jesusqa Abrahanpa mirayninmanta karqa (Gálatas 3:14).

Jesuspa milagrosninta rikojkunaqa, repararqanku Dios payta ajllasqanta tukuy runasta bendecinanpaj. Chay milagrosqa rikuchillarqataj, Jesusnejta aswan qhepaman Dios wiñaypaj runasta bendecinanta. Milagrosqa rikucherqa, imaynachus Jesús kasqanta.

Munakuyniyoj karqa, onqosqastataj sanoyacherqa.

Uj kuti lepra onqoyniyoj runa, qonqoriykukuspa Jesusmanta mañakorqa: “Munankichus chayqa, atinki sanoyachiwayta”, nispa. Jesustaj payta khuyakuspa makinwan llankharerqa, nerqataj: “Arí, munani”, nispa. Chay ratopachataj chay runaqa sanoyaporqa (Marcos 1:40-42).

Kʼacha karqa, ashkha runastataj mikhucherqa.

Jesusqa mana munarqachu runas yarqhasqa kanankuta, nitaj uj kutillapichu runasman mikhunata qorqa. Payqa uj mashkha tʼantallawan, uj mashkha pescaditosllawantaj, uj milagrota ruwaspa ashkha runasman mikhucherqa (Mateo 14:17-21; 15:32-38). Tukuyninku sajsakunankukama mikhojtinkupis, ashkha tʼanta puchorqaraj.

Khuyakorqa, wañusqastataj kausaricherqa.

Jesusqa uj viudata “mayta khuyakuspa” kʼata qhari wawanta wañusqamanta kausaricherqa (Lucas 7:12-15).