1, 2. 1) ¿Atisunmanchu Jehovaj munayninman jina kausakuyta? 2) ¿Imasmantataj Colosenses 3:10-14 versículos parlan?

KAY Mosoj jallpʼapi kausajkunapaj Diospa Palabran Bibliapeqa, “mosoj runa” kaymanta, ‘mosoj kausaymantawan’ parlan (Efe. 4:24; Col. 3:10). Chay mosoj kausaytaj, Diospa munayninman jina kashan. Jehovaj rijchʼayninman jina ruwasqa kasqanchejrayku, tukuypis chay mosoj kausaywan pʼachawan jina pʼachallikusunman. Ajinamanta imallatapis Jehová jina ruwanapaj (Gén. 1:26, 27; Efe. 5:1).

² Adanpa mirayninmanta kasqanchejrayku, tukuypis juchasapas kanchej. Chayraykutaj sajra kajllata ruwayta munanchej. Kay sajra mundopis sajra ruwaykunaman tanqawanchej. Jinapis Diospa yanapayninwan, paypa munayninman jina kausakuyta atinchej. Chayta ruwanapajtaj, kay yachaqanapi parlarisunchej: tukuyta uj rejllata qhawaymanta, khuyakuyniyoj kaymanta, llampʼu sonqo kaymanta, waj imasmantawan. Chaykunamantataj apóstol Pablo Bibliapi qhelqarqa (Colosenses 3:10-14 leey). Chantapis parlallasuntaj imaynatachus Pabloj qhelqasqan, predicacionpi yanapanawanchejta.

3. Apóstol Pablo nisqanman jina, ¿imaynatá tukuy runasta qhawana?

³ Apóstol Pablo mosoj kausaywan pʼachallikuymanta parlaytawan, tukuyta uj rejllata qhawanata nerqa. Pay nerqa: “Manaña imananchu: griego kay chayri judío kaypis, circuncidasqa kay chayri mana circuncidasqa kaypis. Manallataj imananchu: forastero kay, monte runa kay, esclavo kay chayri mana esclavo kaypis”, nispa. * Chayrayku Diospa llajtanpi mana pitapis pisipaj qhawasunmanchu wajcha kasqanrayku, waj laya runa kasqanrayku chayri waj suyumanta kasqanrayku. Imaraykuchus mundontinpi tukuy cristianosqa, ‘ujlla kanchej’ (Col. 3:11; Gál. 3:28).

4. 1) ¿Imaynatá tukuy runasta qhawananchej tiyan? 2) ¿Imaraykú wakin lugarespi mana atikullanmanchu ujchasqa kay?

⁴ Chantapis mosoj kausaywan pʼachallikuspaqa, tukuy runasta respetowan qhawanchej, ima lugarmanta kajtinkupis, qhapaj chayri wajcha kajtinkupis (Rom. 2:11). Chaytaj wakin lugarespeqa mana atikullanchu. Pasaj wataspi Sudáfrica suyumanta gobiernoqa, kamacherqa tukuy runas layankuman jina tʼaqasqa kanankuta. Chayrayku chay suyumanta wakin lugarespi qhapaj runaslla tiyakoj kanku. Waj lugarpitaj yana runitaslla, wajnejpitaj waj laya runaslla. Kunankamapis runasqa, ajina tʼaqasqas tiyakushallankupuni. Jinallataj casi tukuy Jehovaj testigosninpis. Chayrayku Diospa Llajtanta Kamachejkunaqa, chay lugarespi tiyakoj hermanosta yuyaycharqanku, 2 Corintios 6:13 nisqanman jina ‘sonqonkuta jatunta kicharinankuta’. Chaypajtaj octubre de 2013 watapi, hermanos aswan ujchasqa kanankupaj uj campaña ruwakunanta kamacherqanku. Imaynachus chay campaña kasqanmanta parlarina.

5, 6. 1) ¿Ima campañataj Sudáfrica suyupi ruwakorqa? (22 paginapi dibujota qhawariy). 2) ¿Imaynatá chay campaña hermanosta yanaparqa?

⁵ Chay campañapeqa iskay congregacionesmanta hermanos mana kikin parlayniyoj kajtinkupis, wakin sabadosta, domingostawan khuska predicananku karqa, tantakunankutaj karqa. Wasisninkumanpis wajyarinakunanku karqa. Chaytaqa ashkha congregaciones ruwarqanku. Ashkha hermanos, jinallataj mana Jehovaj testigosnin kajkunapis, chay campaña may sumaj kasqanmanta sucursalman qhelqarqanku. Uj pastorpis jinata nisqa: “Mana Jehovaj testigonchu kani. Jinapis llankʼayniykichejqa may sumaj wakichisqa kashan, maymanta kajtiykichejpis mana chejninakunkichejchu”, nispa. Kay campañaqa hermanosta mayta yanaparqa.

⁶ Noma sutiyoj hermanamanta parlarina. Payqa xhosa nisqata parlan. Nomaqa gringuito hermanosta wasinman wajyariyta manchachikoj. Chay hermanosqa, inglés congregacionpi kasharqanku. Jinapis Nomaqa chay hermanoswan predicaytawan, wasinkumantaj riytawan, “noqanchej jinallataj kasqanku” nispa nerqa. Chantá Nomaj congregacionninñataj inglés congregacionmanta hermanosta wajyarinanku karqa. Chay kutipi Nomaqa wakin hermanosta wasinman wajyarerqa, waykʼuporqataj. Chaykunamanta ujnintaj, uj gringuito anciano karqa. Nomataj nerqa: “Chay hermanoqa mana pʼenqakorqachu nailon patapi tiyakuyta”, nispa. Sudafricamanta hermanosqa, astawan rejsinakunankupaj kallpachakushallankupuni. Chayta ruwasqankurayku ashkha amigosta ruwakorqanku, waj llajtayoj chayri waj parlayniyoj hermanostapis rejsiyta munashallankupuni.

7. ¿Imaraykutaj khuyakoj runas kananchej tiyan?

⁷ Kay sajra mundopeqa imaymana llakiykunapi rikukunchej, trabajorayku, onqoyrayku,  suwas kasqanrayku, qhatiykachasqa kasqanchejrayku, waj imasrayku ima. Chayrayku purajmanta khuyakuspa yanapanakunanchej tiyan. Khuyakuyniyoj kasunchej chayqa, tukuywan kʼachas kasunchej. Chantapis Jehová jina wajkunata sonqochayta atisunchej (2 Cor. 1:3, 4; Efe. 4:32).

8. ¿Imataj Dannykarlta yanaparqa Diosman qayllaykunanpaj?

⁸ Ichapis congregacionninchejpi wakin hermanos wajchas kanku, wakintaj waj suyumanta kanku. ¿Imaynatá paykunawan kʼachas kasunman? Paykunawan amigos kaspa. Congregacionpitaj sumajta yanapakushasqankuta nispa (1 Cor. 12:22, 25). Dannykarl sutiyoj hermanomanta parlarina. Payqa niraj Jehovaj testigon kashajtin, Filipinasmanta Japonman riporqa. Trabajonpeqa payta pisipaj qhawaj kanku. Uj kutitaj Jehovaj testigosninpa tantakuyninkuman risqa. Chay kutimanta parlaspa, Dannykarl nin: “Tukuypis Japoneses karqanku. Jinapis kʼachata parlapayawarqanku, unaytañapis rejsiwankuman jina”, nispa. Hermanosqa paywan kʼachallapuni karqanku. Chaytaj Dannykarlta yanaparqa Jehovaman qayllaykunanpaj. Chantá bautizakorqa, kunantaj congregacionpi anciano jina sirvishan. Congregacionninmanta waj ancianostaj, paymanta señoran Jennifermantawan jinata ninku: “Paykunaqa congregacionpi sumaj yanapa kanku. Pisi imasllawan kausakunku, Diospa Gobiernontataj ñaupajman churanku”, nispa (Luc. 12:31).

9, 10. ¿Ima bendicionestataj wakin hermanos japʼerqanku waj llajtayojkunamanta khuyakusqankurayku?

⁹ Diosmanta runasman willaspaqa, “tukuypaj allin kajta” ruwanchej (Gál. 6:10). Ashkha Jehovaj testigosnenqa, forasterosmanta khuyakusqankurayku, paykunaman Bibliamanta yachachinankupaj parlayninkuta yachakorqanku (1 Cor. 9:23). Chayta ruwaspataj ashkha bendicionesta japʼerqanku. Tiffany sutiyoj precursoramanta parlarina. Payqa Australia suyumanta. Brisbane nisqa llajtapitaj suajili parlajkunaman Bibliamanta yachachiyta munarqa. Chaypajtaj parlayninkuta yachakorqa. Suajilita ñakʼayta yachakojtinpis, may kusisqa karqa. Pay nin: “Pichus predicacionpi astawan kusiyta tariyta munajqa, allin kanman waj parlaypi kaj congregacionman ripunan. Chayta ruwajtintaj waj suyupipis predicashanman jina kanqa. Chantapis mundontinpi uj familia jina kasqanchejta reparanqa”, nispa.

¹⁰ Kunanqa uj familiamantañataj parlarina. Paykunaqa Japonpi tiyakunku. Ujnin warmi wawankutaj Sakiko sutiyoj nin: “Kay 1990 wata chaynejpi, Diosmanta willashajtiyku, ashkha brasilerosta tarej kayku. Paykunaman portugués parlaypi Apocalipsis 21:3, 4 chayri Salmo 37:10, 11, 29 versiculosta leeripojtiyku, sumajta uyariwaj kayku, wakintaj waqarikoj kanku”,  nispa. Chay familiataj brasilerosmanta khuyakusqankurayku, paykunata astawan yanapayta munarqanku. Sakiko nillanpuni: “Brasileros Jehovamanta yachakuytapuni munasqankuta reparajtiyku, tukuy familiay portuguesta yachakorqayku”, nispa. Paykunaqa, portugués parlaypi uj congregación kananpaj yanapakorqanku. Watas pasasqanman jinataj, ashkha brasilerosta yanaparqanku Jehovaj testigonman tukunankupaj. Sakiko nin: “Portuguesta yachakunaykupaj uma pʼakikuyta estudiarqayku. Jinapis may chhika bendicionesta japʼerqayku. Chaykunamantataj Jehovaman mayta agradecekuyku”, nispa (Hechos 10:34, 35 leey).

11, 12. 1) ¿Imaraykutaj mosoj kausaywan pʼachallikunchej? 2) ¿Imataj yanapawasunchej kʼumuykukoj sonqoyoj kanapaj?

¹¹ Mosoj kausaywan pʼachallikunchej, Jehovata jatunchayta munasqanchejrayku, manataj runaswan jatunchachikuyta munasqanchejraykuchu. Uj angelqa jatunchachikuyta munasqanrayku Diospa contranta oqharikorqa (Ezequiel 28:17 kikinchay). Uj angelchus jatunchakuypi urmarqa chayqa, noqanchejqa astawanraj jatunchakuypi urmasunman, pantaj runas kasqanchejrayku. Jinapis kʼumuykukoj sonqo kayta atisunman.

¹² Chaypajtaj sapa día Bibliata leena, leesqanchejpitaj tʼukurina (Deu. 17:18-20). Chantapis Jesusmanta yachakuna. Yachachisqantapis sonqonchejman churana (Mat. 20:28). Jesús may jina kʼumuykukoj sonqoyoj kasqanrayku, yachachisqasninpa chakisninkutapis mayllarqa (Juan 13:12-17). Chantapis kʼumuykukoj sonqoyoj kanapaj, Jehová atiyninwan yanapanawanchejta mañakuna. Ajinamanta wajkunata noqanchejmanta aswan kurajta jina qhawasunchej (Gál. 6:3, 4; Fili. 2:3).

13. ¿Imaynatá kʼumuykukoj sonqoyoj kay yanapawanchej?

¹³ (Proverbios 22:4 leey). Jehovaqa munan tukuy kamachisnin kʼumuykukoj sonqoyoj kananchejta. Kʼumuykukoj sonqoyoj kasunchej chayqa, congregacionpi tukuywan allinta apanakusunchej, ujchasqataj kasunchej. Astawanpis Jehovaqa khuyakuwasunchej. Apóstol Pedro nerqa: “Tukuyniykichej ujkuna ujkunawan kʼumuykukoj sonqoyoj kaychej. Imaraykuchus Diosqa jatunchakojkunaj contranpi sayaykun. Kʼumuykukoj sonqoyojkunamanrí, jatun khuyakuyninta qon”, nispa (1 Ped. 5:5).

14. ¿Pitaj ni pi jina llampʼu sonqo, pacienciayojtaj?

¹⁴ Kay tiempopi wakin runasqa ninku, llampʼu sonqo runas, pacienciayoj runaspis, pisi kallpas kasqankuta. Chaytaj mana jinachu. Imaraykuchus Jehovaqa llampʼu sonqo, pacienciayojtaj kajtinpis, ni pi jina may atiyniyoj. Jehová jina llampʼu sonqo, pacienciayojtaj ni pi kanchu (2 Ped. 3:9). Chaytataj reparanchej imaynatachus angelesnejta Abrahanman, Lotmanwan parlasqanpi (Gén. 18:22-33; 19:18-21). Chantapis Jehovaqa Israel llajtawan pacienciakullarqataj. Imaraykuchus israelitasta 1500 watasmanta astawan suyarqa Payman kutirikunankuta (Eze. 33:11).

15. ¿Imatataj Jesusmanta yachakusunman?

¹⁵ Jesusqa “llampʼu sonqo” karqa (Mat. 11:29). Payqa mayta pacienciakorqa yachachisqasnin pantaykojtinkupis. Kay jallpʼapi kashaspaqa, enemigosnin paypaj rimasqankuta, qhasimanta tumpasqankutapis aguantakorqa. Chantapis jatun kʼaspipi warkhusqa kashajtin, wañuchisharqanku chay soldadospaj mañaporqa: “Tatáy, paykunata perdonay. Mana yachankuchu imatachus ruwashasqankuta”, nispa (Luc. 23:34). Arí, Jesusqa mayta ñakʼarejtinpis wañupunankama llampʼu sonqo, pacienciayojtaj karqa. Paymantaqa mayta yachakusunman (1 Pedro 2:21-23 leey).

16. ¿Imaynatá rikuchisunman llampʼu sonqo, pacienciayojtaj kasqanchejta?

 ¹⁶ Noqanchejpis wajkunata perdonaspa llampʼu sonqo, pacienciayojtaj kasqanchejta rikuchisunman. Apóstol Pabloqa cristianosman nerqa: “Wajkuna contraykichejpi imata ruwajtinkupis, ujkuna ujkunawan aguantanakullaychejpuni, tukuy sonqotaj perdonanakuychej. Imaynatachus Jehová Dios qankunata tukuy sonqo perdonasorqachej, ajinallatataj qankunapis perdonanakuychej”, nispa (Col. 3:13). Pabloj nisqanta kasukunapaj llampʼu sonqo, pacienciayojtaj kananchej tiyan. Congregacionpi tukuypis chayta ruwasun chayqa ujchasqallapuni kasunchej.

17. ¿Imaraykú llampʼu sonqo, pacienciayojtaj kana?

¹⁷ Jehovaqa munan llampʼu sonqo, pacienciayojtaj kananchejta. Paraisopi kausakuyta munanchej chayqa, chaykunata rikuchinanchejpuni tiyan (Mat. 5:5; Sant. 1:21). Astawanpis llampʼu sonqo, pacienciayojtaj kasunchej chayqa, Jehovata jatunchasunchej. Chantapis runamasinchejta yanapasunchej Bibliaj nisqanta kasukunankupaj (Gál. 6:1; 2 Tim. 2:24, 25).

18. Munakuyniyoj kasunchej chay, ¿imaynatá wajkunata qhawasunchej?

¹⁸ Tukuyta uj rejllata qhawanapaj, chantá khuyakuyniyoj, kʼachas, kʼumuykukoj sonqo, llampʼu sonqo, pacienciayojtaj kanapaj, munakuyniyoj runas kananchej tiyan. Uj kuti Santiagoqa hermanosta kʼamerqa, qhapaj hermanosllata allinpaj qhawasqankumanta. Sutʼincharqataj chay ruwasqanku mana Diospa kamachisqanman jinachu kasqanta. Imaraykuchus Diosqa kamacherqa: “Runa masiykita munakunayki tiyan, qan kikiykita jina”, nispa. Chantá Santiago nerqa: “Sichus wakillantapuni allinpaj qhawankichej chayqa, juchallikushankichej”, nispa (Sant. 2:8, 9). Runamasinchejta munakusun chayqa, tukuyta allinpaj qhawasunchej mana leeyta yachajtinkupis, wajcha kajtinkupis chayri waj laya runas kajtinkupis. Arí, sonqomantapacha tukuyta uj rejllata qhawananchej tiyan, nitaj simillamantachu.

19. ¿Imaraykutaj may allin munakuyniyoj runas kananchej?

¹⁹ “Munakuyniyoj runaqa pacienciayoj, kʼachataj”, “nillataj jatunchakunchu” (1 Cor. 13:4). Pacienciayoj, kʼacha, llampʼu sonqotaj kasunchej chayqa, Diospa Gobiernonmanta willamullasunpuni (Mat. 28:19). Chantapis congregacionpi tukuy hermanoswan allinta apanakusunchej. Tukuyninchej munanakusunchej chayqa, congregacionpi ujchasqallapuni kasunchej, Jehovatataj jatunchasunchej. Runas chayta reparajtinkutaj, Diospa llajtanman yaykunpuyta munanqanku. Apóstol Pabloqa, mosoj kausaywan pʼachallikunamanta parlashajtin, kaytapis nillarqataj: “Munakuywan pʼachawan jina pʼachallikuychej. Imaraykuchus munakoyqa, runasta sumajta ujchan”, nispa (Col. 3:14).

20. 1) ¿Imastataj allin kanman tapurikunanchej? 2) ¿Imatataj mayta suyakushanchej?

²⁰ Tukuypis allin kanman kayta tapurikunanchej: “¿Imatawantaj ruwayman ñaupa kausayniyta qʼalata saqepunaypaj?”, nispa. Jehovamanta yanapata mañakunanchej tiyan, noqanchejmanta tukuy sajra yuyayta, tukuy sajra ruwaytapis chinkachinapaj. Imaraykuchus chay sajra ruwaykunaqa, mana saqewasunchu Diospa Gobiernonta herenciata jina japʼinanchejpaj (Gál. 5:19-21). Chantá allin kanman tapurikunallanchejtaj: “¿Yuyayniyta mosojyachishallanipunichu Jehovata kusichinaypaj?”, nispa (Efe. 4:23, 24). Juchasapa kasqanchejrayku mosoj kausaywan pʼachallikunapaj, sapa día kallpachakunallapuni kanqa. Chayrayku may sumajpuni kanqa, paraisopi tukuypis manaña juchasapa kajtinchej, mosoj kausaywan pʼachawan jina pʼachallisqaña kajtinchej. Chaytataj mayta suyakushanchej.