1. Persia nacionmanta reywan parlayta munaj runa, ¿imatataj ruwaj?

UNAY tiempopi Persia nacionmanta parlarina. Chay nacionpi pillapis reywan parlayta munaj chayqa, Susa llajtaman rinan karqa. Imaraykuchus reyqa, chay llajtamantapacha tukuy nacionta kamachej. Jinapis reywan parlayta munaj runaqa, permisotaraj ñaupajta mañakunan karqa. Imajtinchus pipis mana wajyachisqalla reypajman yaykoj chayqa, wañuchisqa kaj (Est. 4:11).

2. ¿Imaynatá Jehová Dios paywan parlarinanchejta munan?

² Jehová Diosqa mana Persiamanta reyes jinachu. Chayrayku payman mayta agradecekunchej. Tukuy gobiernosmanta aswan atiyniyoj kajtinpis, ima ratollapis payman chimpayta atinchej. Jehová Diosninchejqa, paywan mana manchachikuspa parlarinanchejta munan. Jehová Diostaqa ninchej: Tukuy Atiyniyoj Dios, tukuy imata Ruwaj, Tukuyta Kamachej Señor nispa. Jinapis payqa, “Tatáy” ninanchejta munan (Mat. 6:9). Arí, Jehová Diosqa Papasunchejta jina qhawananchejta munan. Chaytaj mayta kusichiwanchej.

3. 1) ¿Imaraykutaj Jehová Diosta “Tatáy” nisunman? 2) ¿Ima tapuykunamantaj kay yachaqanapi kutichisun?

³ Jehová Diosqa tukuyman kausayta qowarqanchej. Chayrayku payta “Tatáy” nispaqa, mana pantanchejchu (Sal. 36:9). Tatanchej kasqanraykutaj payta kasukunanchej tiyan. Kamachiwasqanchejta kasukuspaqa, ashkha bendicionesta japʼisun (Heb. 12:9). Chay bendicionesmanta ujqa, cielopi chayri kay jallpʼapi wiñay kausay. Jehová Diosqa kay tiempopipis bendecishawanchejña. Jinapis, ¿imaynatá Jehová Dios munakuyniyoj Tatanchej kasqanta rikuchin? Chanta, ¿imaynatá yachanchej ni jaykʼaj saqerparinawanchejta? Kay yachaqanapi chay tapuykunaman  kutichisun. Jinapis ñaupajtaqa yachakusun, imaraykuchus ninchej Tatanchej Jehová mayta munakuwasqanchejta, yanapaytataj munawasqanchejta.

4. ¿Imaraykutaj wakin runas Jehová Diosta mana Tatankuta jina qhawayta atillankuchu?

⁴ Wakin runasqa, Jehová Diosta mana Tatankuta jina qhawayta atillankuchu. ¿Imaraykú? Wakenqa ninku: “Noqa juchasapaqa imatá Tukuy Atiyniyoj Diosman qayllaykuyta atiymanri. Ni creenichu pay noqanchejmanta llakikunanta”, nispa. Jinapis munakuyniyoj Tatanchej Jehovaqa, mana ajinata yuyananchejta munanchu. Payqa kausayta qowasqanchejrayku, payta maskʼananchejta, tarinanchejtataj munan. Apóstol Pabloqa chay imasmanta parlaytawan, Atenas llajtapi nerqa: Jehová Diosqa “mana karupichu kashan sapa ujninchejmanta”, nispa (Hech. 17:24-29). Jehová Diosqa imaynatachus uj wawita papasunwan parlarin, ajinallatataj paywan parlarinanchejta munan.

5. ¿Imatataj uj hermanamanta yachakusunman?

⁵ Wakenqa ninku: “Tatayqa pisillata munakuwaj”, nispa. Wakintajrí ninku: “Papasoyqa mana munakuwajchu”, nispa. Ajina tatasniyoj runasqa, mana Jehová Diosta Tatankuta jina qhawayta atillankuchu. Uj hermana nin: “Papasoyqa anchata ultrajawaj. Chayrayku Bibliata estudiayta qallarishaspa, mana Diosta Tatayta jina qhawayta atillarqanichu. Jinapis payta astawan rejsispaqa, niña jinatachu yuyarqani”, nispa. Ichá noqanchejpis chay hermana jinallataj yuyanchej. Jina kajtin, ama anchata llakikunachu. Jehová Diosta rejsisqanchejman jina, noqanchejpis Tatanchejta jina qhawayta atisun.

6. Mateo 11:27 nisqanman jina, ¿imaynatá Jehová Dios yanapawanchej Papasunchejta jina qhawanapaj?

⁶ Jehová Diosninchejqa, payta munakuyniyoj Papasunchejta jina qhawananchejta munan. Chayrayku Jesuspa nisqasninta, ruwasqasnintawan Bibliapi churacherqa (Mateo 11:27 leey). Jesusqa tukuy imapi Tatanman rijchʼakorqa. Chayrayku niyta aterqa: “Noqata rikuwajqa Tataytapis rikullantaj”, nispa (Juan 14:9). Jesusqa ashkha kutista parlarqa, imayna Tatachus Jehová Dios kasqanmanta. Payqa Jehová Diosmanta parlananpaj, Mateomanta Juan librokama casi 200 kutista “Tatáy” palabrata oqharerqa. ¿Imaraykutaj Jesús chay chhika kutista Jehová Diosta “Tatáy” nerqa? Imaraykuchus payqa munarqa, runas Jehová Dios may munakuyniyoj Tatapuni kasqanta yachanankuta (Juan 17:25, 26).

7. ¿Imatá yachakunchej Jehová Dios imaynatachus Wawanta cuidasqanmanta?

⁷ Jehová Dios imaynatachus Wawan Jesusta cuidasqanmanta yachakuna. Jehová Diosqa Jesuspa mañakusqanta uyarejpuni. Manataj uyarillajchu, manachayqa mañakusqanman jina ruwaj (Juan 11:41, 42). Jesusqa ima llakiypi chayri ima pruebapi kaspapis, Tatan munakusqanta, yanapasqantataj sutʼita repararqa (Luc. 22:42, 43).

8. ¿Imastataj Jehová Dios Jesusman qorqa?

⁸ Jesusqa yacharqa, Tatan kausayta, tukuy ima necesitasqantawan qosqanta. Chayrayku nerqa: “Tataynejtataj kausani”, nispa (Juan 6:57). Jesusqa yachallarqataj Tatan ni imata faltachinanta. Jehová Diostaj Jesusman necesitasqanta qorqapuni. Jinapis astawanqa, sinchʼita sayananpaj yanaparqa (Mat. 4:4).

9. ¿Imaynatá Jehová Dios Wawan Jesusta mayta munakusqanta rikucherqa?

⁹ Jehová Diosqa munakuyniyoj Tata kasqanrayku, Jesusman payta yanapananta nerqa (Mat. 26:53; Juan 8:16). Payqa mana tukuy llakiykunamantachu Jesusta jarkʼarqa. Jinapis chay llakiykunata aguantananpaj yanaparqa. Jesusqa yacharqa ima llakiyninpis  uj tiempollapaj kananta (Heb. 12:2). Jehová Diosqa Wawan Jesusta uyarerqa, necesitasqanta qorqa, yachacherqa, yanaparqataj. Ajinamanta payta mayta munakusqanta rikucherqa (Juan 5:20; 8:28). Jehová Diosqa noqanchejtapis Jesusta jinallataj cuidawanchej. Qhepan parrafospi chayta yachakusun.

10. Salmo 66:19, 20 nisqanman jina, ¿imaynatá Jehová Dios munakuwasqanchejta rikuchiwanchej?

¹⁰ Jehová Diosninchejqa mañakusqanchejta uyariwanchej (Salmo 66:19, 20 leey). Payqa niwanchej mana saykʼuspa paymanta mañakunanchejta (1 Tes. 5:17). Tatanchej Jehovawanqa tukuy imamanta parlariyta atinchej, mashkha unaytapis, mashkha kutistapis. Chantapis ima ratollapis chayri mayllapipis paymanta mañakuyta atinchej. Jehová Diosqa may chhika ruwanasniyoj kaspapis, mañakusqanchejta uyariwanchejpuni. Mañakusqanchejta uyarisqanta yachaspaqa, payta astawan munakunchej. Uj salmista nerqa: “Tata Diosta munakuni, mañarikusqayta uyariwasqanrayku”, nispa (Sal. 116:1).

11. ¿Jehová Dios munasqanchejman jinapunichu mañakusqanchejman kutichiwasun?

¹¹ Tatanchej Jehovaqa, paymanta mañakojtinchej mana uyarillawanchejchu, manachayqa kutichiwanchej. Apóstol Juan nin: “Imatapis munayninman jina mañakojtinchejqa, pay uyariwanchej”, nispa (1 Juan 5:14, 15). Jehová Diosqa mañakusqanchejman, ichapis mana munasqanchejman jinachu kutichiwasun. Payqa sumajta yachan imatachus necesitasqanchejta. Chayrayku wakin kutisqa, mana munasqanchejta qowasunchu chayri uj tiempota suyachiwasun (2 Cor. 12:7-9).

12, 13. ¿Imastá Tatanchej Jehová qowanchej, chanta imaynatá yanapawanchej?

¹² Jehová Diosninchejqa necesitasqanchejta qowanchej. Payqa imatachus tatas ruwanankuta munan, chayllatataj ruwan (1 Tim. 5:8). Jehová Diosqa wawasninman imatachus necesitasqankuta qon. Payqa mana munanchu mikhunamanta, ropamanta, chayri maypichus tiyakunanchejmanta llakikunanchejta (Mat. 6:32, 33; 7:11). Jehová Diosqa munakuwasqanchejrayku, kunanmantaña wakichipuwanchej aswan qhepaman imatachus necesitasun, chayta qonawanchejpaj.

¹³ Jehová Diosqa, payman kʼaskaykunanchejpajpis yanapallawanchejtaj. Payqa Palabranpi willawanchej: imaynachus pay kasqanta, imachus munaynin kasqanta, imapajchus ruwawasqanchejta, imachus qhepaman kanantapis. Jehovaqa sapa ujninchejta yanapawarqanchej. Chaypajtaj tatanchejnejta, mamanchejnejta chayri wajkunanejta paymanta yachachiwarqanchej. Payqa munakuywan yanapashallawanchejpuni ancianosnejta, wiñay tukusqa hermanosnejta chayri hermanasnejta. Jehová Diosninchejqa reunionespipis yachachillawanchejtaj. Chaypitaj uj familia jina, hermanosninchejwan khuska paymanta yachakunchej. Tatanchej Jehovaqa munakuwasqanchejrayku, chay tukuy imasta, waj imastawan ruwan (Sal. 32:8).

14. ¿Imaraykutaj Jehová Dios cheqanchawanchej, chanta imaynasmantá chayta ruwan?

¹⁴ Jehová Diosninchejqa yachachiwanchej. Jesusmanta nisqaqa juchasapas kanchej. Chayrayku munakuyniyoj Tatanchej Jehovaqa, yachachinawanchejpaj pantajtinchej cheqanchawanchej. Palabranpi nin: “Jehová Diosqa, pikunatachus munakun, chaykunata jasutʼin”, nispa (Heb. 12:6, 7). Chaytataj tukuy imaymanamanta ruwan. Wakin kutisqa Palabranta leespa chayri reunionpi yachachikusqanta uyarispa, imallapipis pantashasqanchejta reparakunchej. Wakin kutistaj uj anciano chayta reparachiwanchej. Jehová Diosninchejqa,  munakuwasqanchejrayku ajinata yachachiwanchej, cheqanchawanchejtaj (Jer. 30:11).

15. ¿Imaynasmantataj Jehová Dios yanapawanchej?

¹⁵ Jehová Diosninchejqa llakiykunata aguantanapaj yanapawanchej. Papasunchejqa munakuwasqanchejrayku, llakiypi kajtinchej yanapawanchej. Ajinallatataj Tatanchej Jehovapis, llakiykunata aguantanapaj yanapawanchej. Payqa atiyninwan yanapawanchej, paymanta mana karunchakunanchejpaj (Luc. 11:13). Jehová Diosqa yanapallawanchejtaj, llakisqa chayri sonqo pʼakisqa kashajtinchej. Payqa aswan qhepaman sumaj kausayta qonawanchejta niwanchej. Chayta yachaytaj ima llakiyta aguantanapajpis yanapawanchej. Chantapis kaypi piensarina: Munakuyniyoj Tatanchej Jehovaqa, mosoj mundopi tukuy llakiykunasninchejta chinkachinanta niwanchej. Kay tiempopi ima llakiyninchejpis uj tiempollapaj kanqa. Jehová Diospa bendicionesnintajrí wiñaypaj kanqa (2 Cor. 4:16-18).

16. Adán Jehová Diosta mana kasukusqanrayku, ¿imataj karqa?

¹⁶ Jehová Dios munakuwasqanchejta reparallanchejtaj, Adán juchallikojtin imatachus ruwasqanpi. Adanqa Tatan Jehovata mana kasukorqachu. Chayrayku paypis, wawasninpis manaña Diospa familianmantachu karqanku (Rom. 5:12; 7:14). Jinapis Jehová Diosqa, imaynatachus Adanpa wawasninta yanapananta yuyaychakorqa.

17. Adán juchallikojtin, ¿imatataj Jehová Dios chay rato yuyaychakorqa?

¹⁷ Jehová Diosqa Adanta juchallisqanrayku castigajtinpis, wawasninta yanapananta nerqa. Payqa chay rato yuyaychakorqa, imaynatachus kasukoj runasta yanapananta familianman watejmanta yaykunankupaj (Gén. 3:15; Rom. 8:20, 21). Jehová Diosqa chayta ruwananpaj, munasqa Wawan Jesusta juchasninchejrayku wañunanpaj kachamorqa. Ajinamanta  Tatanchej Jehovaqa, anchatapuni munakuwasqanchejta rikucherqa (Juan 3:16).

18. Jehová Diosmanta karunchakojtinchejpis, ¿pay munakuwanchejchu?

¹⁸ Jehová Diosninchejqa, juchasapas kajtinchejpis familianmanta kananchejta munan. Payqa mana llasa qʼepita jinachu qhawawanchej. Jehová Diosqa sonqonta nanachejtinchejpis chayri paymanta karunchakojtinchejpis, payman kutirinanchejta suyan. Jesusqa Tatanchej Jehová imaynatapunichus munakuwasqanchejta, uj kikinchaywan sutʼincharqa. Chaytaj kashan chinkasqa qhari wawamanta kikinchay (Luc. 15:11-32). Chay kikinchaypi tataqa, wawan kutinpunanta suyakullarqapuni. Wawan wasinman kutinpojtintaj, tatanqa tukuy sonqo japʼikaporqa. Tatanchej Jehovaqa chay tata jinallataj. Paymanta karunchakunchej chayqa, arrepientekojtinchej tukuy sonqo japʼikapuwasun.

19. ¿Imaynatá Tatanchej Jehová, Adán rikhurichisqan llakiykunata chinkachenqa?

¹⁹ Tatanchej Jehovaqa, Adán rikhurichisqan llakiykunata chinkachenqa. Adán juchallikusqantawan, Jehová Diosqa 144 mil runasta wawasninpaj rejsikapunanta yuyaychakorqa. Paykunataj Wawanwan khuska, reyestaj sacerdotestaj cielopi kananku karqa. Mosoj mundopeqa, Jesuswan paywan gobernamojkunawan, kasukoj runasta yanapanqanku mana juchayojman tukunankupaj. Chantá chay runasqa, uj kutitawan pruebaman churasqa kanqanku. Chay pasaytataj, Diosqa kasukoj runasman wiñay kausayta qonqa. Kay jallpʼapitaj Jehová Diospa mana juchayoj wawasnillanña kanqanku. Jehová Diosqa chayta rikuspa mayta kusikonqa. ¡Chaytaj may sumajpuni kanqa!

20. 1) ¿Imaynasmantataj Jehová Dios maytapuni munakuwasqanchejta rikuchiwanchej? 2) ¿Imatá qhepan yachaqanapi yachakusun?

²⁰ Jehová Diosninchejqa maytapuni munakuwanchej. Payqa manchay sumaj Tata. Chayrayku mañakusqanchejta uyariwanchej, yachachiwanchej, yanapawanchejtaj. Chantapis kausananchejpaj, payta sirvinapajpis, imatachus necesitasqanchejta qowanchej. Jehová Diosqa jamoj tiempopipis may chhika bendicionesta qowasunchej. Tatanchej Jehová chay jinatapuni munakuwasqanchejta yachaspaqa, ¡mayta kusikunchej! Chayrayku noqanchejpis payta munakunallanchejtaj tiyan. Qhepan yachaqanapeqa, imaynatachus payta munakunata yachakusun.