Munakuyta paykunapuni rikorqanku
YOMARAWAN, Marcelowan, Hiverwanqa Guatemalamanta uj juchʼuy llajtitapi tiyakunku. Kinsantinku hermanitos kanku, cieguitostaj. Ñaupajtaqa Yomara Jehovaj testigosninwan Bibliata estudiayta qallarerqa, chaymantataj hermanosninpis estudiayta qallarillarqankutaj. Jinapis mana braillepi qhelqasqata leeyta yacharqankuchu. Chayrayku parrafostawan Bibliamanta textostawanqa, Bibliamanta yachachisharqa chay hermano leenan karqa.
Reunionesman riypis paykunapajqa mana facilchu karqa. Wasinkumanta aswan qaylla Tantakuna Waseqa 40 minutospi jina kasharqa. Paykunataj sapallankumantaqa mana chaykama viajayta atejchu kanku. Chayrayku congregacionmanta hermanosqa turnakoj kanku reunionesman pusanankupaj. Kinsantin hermanitos chaupi semanapi reunionespaj asignacionesniyojña kayta qallarejtinkutaj, hermanosqa paykunata yanapaj kanku imatachus ninankuta de memoria yachakunankupaj.
Jehovaj testigosnenqa, mayo de 2019 watapi chay llajtitankupi reunionesta ruwayta qallarerqanku. Chaypachapuni uj qhariwarmi precursores regulares chayman tiyakoj ripusqanku. Chay qhariwarmeqa chay kinsa hermanitosta braillepi leeyta, escribiyta ima yachachiyta munarqanku. Jinapis mana yacharqankuchu imaynatachus chayta ruwanankuta. Chayrayku uj bibliotecaman rispa braillemanta librosta maskʼarqanku, imaynatachus wajkunaman chayta yachachiyta yachanankupaj.
Marcelo reunionpi comentashan.
Chay kinsa hermanitosqa uj mashkha killasnillanman brailleta sumajtaña leeyta yacharqanku. Chayrayku Jehovaman astawan qayllaykuyta aterqanku. a Kunantaj Yomarawan, Marcelowan, Hiverwanqa precursores regulares kanku, Marcelotaj siervo ministerial kashan. Paykunaqa sapa semana Jehovapaj ashkhata llankʼanku. Chay jina sonqo kʼajaywan Jehovata sirvisqankurayku, wajkunapis paykunata rikuspa kikillantataj ruwashanku.
Chay kinsa hermanitosqa may agradecesqapuni kashanku congregacionmanta hermanos paykunata tukuy imaymanamanta yanaparisqankumanta, munakuyninkutataj rikuchisqankumanta. Yomara nin: “Hermanosqa rejsisqayku diamantapacha cheqamantapuni munakuwasqaykuta rikuchiwarqayku”, nispa. Marcelotaj nin: “Congregacionniykupeqa may sumaj amigosniyoj kayku, chantapis mundontinpi munakuywan ujchasqa familiamanta kayku”, nispa. Yomarawan hermanosninwanqa maytapuni rikuyta munashanku kay jallpʼanchej uj paraisoman tukuchisqa kanan pʼunchay chayamunallantaña (Sal. 37:10, 11; Isa. 35:5).
a Aprenda a leer braille nisqa folletoqa sumaj yanapa cieguitospaj chayri ñawisninkumanta malcitos kajkunapaj, brailleta leeyta, escribiytawan yachakunankupaj.
Kaykunatapis qhawaykurillawajtaj
PUBLICACIONESTA WAKICHIYKU
“Imachus noqamanta kanman karqa”
Kay videopi rikusunchej imaynatachus uj cieguitota Biblia yanapasqanta. Paypata Biblia kaporqa, braillepi qhelqasqa.
