Huldaqa imatachus mayta munasqanta consiguerqa
PASAJ wataspi Sangir Besar islaman (Indonesia) riwaj karqa chayqa, ichapis mar qocha kantupi kinsa hermanasninchejta rikuwaj karqa. Paykunaqa chay lugarpi rejsisqa kanku runasta Bibliata entiendenankupaj yanapasqankumanta. Jinapis chay kutipeqa mana predicasharqankuchu.
Sangir Besar isla (Indonesiaj norte ladonpi).
Paykunaqa yakuman yaykuspa rumista maskʼaj kanku, pelota chhikachejta jina, chaykunatataj mar kantuman apaj kanku. Chaymantataj asientosman tiyaykuspa martillowan chay rumista tʼunaj kanku, runtu chhikitanta jina. Chaymantataj baldesman churaykuspa wasinkuman apaj kanku, gradasninta wicharispa. Chaypitaj jatuchej sacospi tantaj kanku. Chaymantataj camiones jamoj kanku chay sacosta recogej, chaykunawan carreterasta ruwanankupaj.
Hulda mar kantupi rumista tantashan.
Chay hermanasninchejmanta ujnenqa Hulda sutikun. Payqa chay ujkunamanta nisqa aswan horasta trabajaj. Chay rumismanta pagasqankuwanqa familianta yanapaj. Jinapis chay kutipeqa uj tabletata rantikunanpaj qolqeta necesitasharqa, chaywan JW Library® aplicacionman yaykunanpaj. Huldaqa yacharqa chay aplicacionninchejpi videos, waj publicacionespis kasqanta. Chaykunataj aswan sumajta predicananpaj, Bibliatapis aswan sumajta entiendenanpaj yanapananta.
Huldaqa uj killa khuskanniyojta sapa paqarin iskay horasta trabajarqa. Tʼunasqan rumisqa uj juchʼuy camionmanpuni juntʼarqa. Ajinamanta uj tabletata rantikunanpaj qolqen kaporqaña.
Hulda tabletanwan kashan.
Hulda nerqa: “Rumista tʼunaspa maytapuni saykʼorqani, tukuy imaytaj nanawarqa. Jinapis tabletayojña kaspa, chaywantaj aswan sumajta predicayta atisqayta reparaspa, reunionespajpis aswan usqhayta wakichikuyta atisqayta reparaspa, nanayniyta qonqaporqanipacha”, nispa. Payqa nillarqataj tabletanqa pandemia qallarishajtin mayta yanapasqanta. Chay kutipi congregacionqa Internetnejllata tukuy imata ruwaj. Mayta kusikunchej hermananchej Hulda imatachus mayta munasqanta conseguisqanmanta.
