SAJRA runaspa chaupinpi tiyakusqanchejrayku mana atillanchejchu sonqo tiyasqa kausakuyta. Sonqo tiyasqa kaspapis, wakin kutisqa llakisqalla kanchej. Chayrayku kunanqa, qhawarisun imaynatachus Bibliaj yuyaychaykunasninwan yanapachikunata sonqo tiyasqallapuni kausakunapaj. Yachakullasuntaj, imaynatachus runasta yanapanata sonqo tiyasqa kausakunankupaj.

Allinta, sonqo tiyasqallapunitaj kausakunapajqa, Jehová Diosman qayllaykunanchej tiyan. Chantapis kʼacha amigosniyoj kananchej tiyan. Mana imatapis manchikunanchejchu tiyan, nillataj llakikunanchejchu tiyan. Kunantaj qhawarina imaynatachus Dioswan allinpi kayta atisqanchejta.

Jehová Diospi atienekunapaj, paywantaj allinpi kanapajqa, kamachisqasninta kasukuna tiyan (Jer. 17:7, 8; Sant. 2:22, 23). Kamachisqasninta kasukojtinchejqa, Jehová Dios qayllaykamuwasun. Jinamantataj Diosqa allinta kausakunapaj yanapawasun. Chayrayku Isaías 32:17 nin: ‘Cheqan kajta ruwaypa poqoynenqa allin kausay kanqa, apamullanqataj ni imamanta manchachikuyta, kusiy kausayta ima wiñaypajʼ, nispa. Tukuy sonqo Jehová Diosta kasukuspaqa, allinta kausakusun (Isa. 48:18, 19).

Sonqo tiyasqallapuni kanapajqa, Jehová Dios atiyninwan yanapawanchej (Hech. 9:31).

Pabloqa nerqa: “Diospa atiyninpa poqoynenqa: munakuyniyoj kay, kusikuyniyoj kay, sonqo tiyaykusqa kay”, nispa (Gál. 5:22, 23). Chayrayku sonqo tiyasqallapuni kanapajqa, Diospa atiyninwan yanapachikuna tiyan. Kunantaj qhawarina imastachus ruwananchej kasqanta Diospa atiyninwan yanapachikunapaj.

Ñaupaj kaj, Bibliata tuta pʼunchay leena tiyan (Sal. 1:2, 3). Diospa Palabranpi tʼukurisun chayqa, Jehová Diosta astawan rejsisun.  Reparasuntaj imatachus pay ruwasqanta sonqo tiyasqallapuni kananpaj, imaraykuchus sonqo tiyasqa kasqantapis. Biblia nisqanman jina kausakuspaqa, sonqo tiyasqallapuni kasun (Pro. 3:1, 2).

Iskay kaj, Jehová Diospa atiyninta mañakuna (Luc. 11:13). Chaymanta parlaspa, Biblia nin: “Diostaj sonqo tiyaykuyta qosonqachej, mayqentachus runas mana entiendeyta atinkuchu, chayta. Ajinamanta payqa sonqoykichejta, yuyayniykichejtawan, Cristo Jesusnejta waqaychanqa”, nispa (Fili. 4:6, 7). Jehová Diospa atiyninta mañakullasunpuni chayqa, pay sonqo tiyaykuywan juntʼachiwasun amigosnin kasqanchejrayku (Rom. 15:13).

Ashkha runasqa Bibliamanta yachakuspa kausayninkuta cambiarqanku. Yachakorqankutaj Jehová Dioswan allinpi kayta, sonqo tiyasqa kayta, wajkunawan allinpi kausakuytapis.

Wakin hermanosqa, niraj Bibliamanta yachakushaspa, imitallamantapis usqhayllata phiñarpakoj kanku. Chaywanpis Bibliamanta yachakuspañaqa aswan kʼachas kanku, wajkunaj allinninkuta maskʼanku, pacienciakunku, nitaj ima chʼajwatapis rikhurichinkuchu (Pro. 29:22). * Kunantaj iskay hermanosmanta parlarina. Paykunaqa Bibliawan yanapachikorqanku caracterninkuta cambianankupaj. Yachakorqankutaj wajkunawan allinpi kausakuyta.

Davidmanta parlarina. Payqa niraj Bibliamanta yachakushaspa runaspa contranpi sajrata parlaj, familiantapis qhaparqachaj. Uj pachataj reparakorqa caracterninta cambianan kasqanta. David nin: “Bibliaj nisqanman jina kausakuyta qallarerqani. Ajinamantataj familiaypi manaña chʼajwas karqachu”, nispa.

Hermananchej Rachelmanta parlarina. Pay nin: “Familiaypeqa wawitamantapacha siminakuspa chʼisiyaj kayku. Chayrayku kallpachakunay tiyan imitallamantapis mana usqhayta phiñarpakunaypaj. Tukuywan allinpi kausakunaypajtaj, Jehová Diospa yanapayninta mañakunipuni”, nispa.

David, Rachel imaqa, caracterninkuta cambiarqanku Bibliaj yuyaychaykunasninman jina  kausakuspa, Diospa atiyninwan yanapachikuspataj. Chayqa reparachiwanchej, sajra runaspa chaupinpi tiyakuspapis sonqo tiyasqa kayta atisqanchejta. Familiaresninchejwan, hermanosninchejwanpis allinpi kausakuyta atisqanchejta. Jehová Diostaj munan kallpachakunanchejta “tukuywan allinpi” kausakunanchejpaj (Rom. 12:18). Kunantaj qhawarina imaynatachus tukuywan allinpi kausakuyta atisqanchejta. Qhawarinallataj ima bendicionestachus japʼiyta atisqanchejta wajkunawan kʼachas kajtinchej.

Predicashaspaqa, runasta yanapanchej Diospa Gobiernonmanta uyarinankupaj (Isa. 9:6, 7; Mat. 24:14). Chay sumaj willaykunata runas uyariwajtinchejtaj mayta kusikunchej. Imajtinchus paykunaqa, sajra ruwaykunata rikuspa niña anchata llakikunkuchu, niñataj rabiakunkuchu. Astawanqa tumpamantawan sumaj kausay kananta suyakunku, ‘tukuywan allinpi kausakuytataj maskʼanku’ (Sal. 34:14).

Wakin runastaj predicasqanchejta mana uyariyta munallankuchu (Juan 3:19). Jinapis Diospa atiynin yanapawanchej chay runaswan kʼachallamanta, respetowantaj parlarinanchejpaj. Ajinamantaqa, Jesuspa nisqanta juntʼasunchej. Pay nerqa: “Uj wasiman yaykuspaqa, chaypi tiyakojkunata napaykuychej. Paykunachus uyariyta munasunkichej chayqa, ‘allin kausay kachun’ nisqaykichejqa paykunata yanapachun. Mana uyariyta munasunkichej chayqa, ‘allin kausay kachun’ nisqaykichejqa qankunaman kutinpuchun”, nispa (Mat. 10:11-13). Reparanchej jina, pillapis mana uyariwajtinchejqa, mana phiñakuspa ripunanchej tiyan. Ajinamanta chay runaqa qhepanpi kutejtinchej ichá uyariwasunman.

Autoridadeswanpis respetowan parlarejtinchejqa, paykunaqa allinpaj qhawawasunman. Jehovaj testigosninta chejnikoj autoridadespis sonqonkuta tiyaykuchinkuman. Chaymanta parlaspa uj suyoj gobiernonmanta parlarina. Africamanta uj gobiernoqa mana munarqachu Jehovaj testigosnin Tantakuna Wasista ruwanankuta. Chayrayku Inglaterra suyupeqa, uj hermano kachasqa karqa Africamanta atiyniyoj autoridadwan parlarimunanpaj. Chay hermanoqa aswan ñaupajta Africapi misionero jina sirvisqa. Payqa Africamanta atiyniyoj autoridadman sutʼinchasqa, predicaspaqa mana chʼajwastachu maskʼashasqanchejta.

Chay hermano nin: “Chayaspaqa, atiyniyoj autoridadpa secretarian imayna vestisqachus kasqanta rikuspa, repararqani Africamanta kasqanta, ima parlaytachus parlasqantataj. Chayrayku parlayninpi saludarqani. Imajtinchus Africapi kashaspaqa, chay parlayta yachakorqani. Chay secretariataj kʼachallamanta niwarqa: ‘¿Imapitaj yanapariykiman?’, nispa. Noqapis kʼachallamanta nerqani Africamanta atiyniyoj autoridadwan parlariyta munasqayta. Secretariataj chay autoridadta telefononejta wajyarqa. Chay autoridadtaj llojsimuytawan parlayninpi saludariwarqa. Chantataj chay autoridadman sutʼincharqani imastachus Jehovaj testigosnin ruwasqanchejmanta. Paytaj sumajta uyariwarqa”, nispa.

Chay hermano Africamanta autoridadman respetowan sutʼinchasqanrayku, chay autoridadqa manaña Jehovaj testigosninwan japʼinakorqachu. Pisi tiemponmantaj Africamanta chay gobiernoqa Jehovaj testigosnin Tantakuna Wasista ruwanankuta saqellarqaña. Chay suyumanta hermanostaj kusiymanta waqarikorqanku. Reparanchej jina, wajkunata respetowan parlarejtinchejqa yanapawanchej paykunawan allinpi kausakunapaj, sonqo tiyasqa kanapajtaj.

Noqanchejqa, Diospa llajtanpi kasqanchejrayku hermanoswan allinpi kausakunchej. Tukuywan allinpi kausakunapaj kallpachakojtinchejqa, wajkunata yanapasun allinpi kausakunankupaj. Jehová Diostaj allin ñawiwan qhawawasun. Paraisopitaj tukuywan wiñay wiñaypaj allinpi kausakusun (2 Ped. 3:13, 14).