RENEÉ sutiyoj hermanaqa 35 watasniyoj jina kashan, payqa Australiapi cristiano familiapi wiñakorqa. Pay nin: “Ashkha kutispi familiaywan pisi willajkuna kanku chay lugaresman rerqayku. Tatasniytaj kusisqas kanaykupaj tukuy imata ruwarqanku. Iskay wawasniyoj kaspataj wawasniy noqa jinallataj kusisqa kausakunankuta munarqani”, nispa.

 Chay hermanaj qosan Shane, 40 watasniyoj jina kashan, paypis Diospaj astawan llankʼayta munan. Pay nin: “Iskay kaj wawayku nacekojtin Torremanta Qhawaj revistapi leerqayku, uj familia Pacificoj inti yaykuynej ura ladon Tongapi kaj churusman barcopi willaj risqankumanta. * Chantá Australia, Nueva Zelanda sucursalesman cartata qhelqanaykuta ninakorqayku, ima lugarespichus pisi willajkuna kanku chayta tapurinaykupaj. * Sucursalqa Tonga nisqaman rinaykuta niwarqayku, chay lugarmantapunitaj leerqayku”, nispa.

Shane, Reneé, wawasninku Jacob, Skye ima uj watata jina Tongapi karqanku. Chay lugarpi chʼajwas kasqanraykutaj Australiaman kutiporqanku, chaywanpis Diospaj astawan llankʼayta munallarqankupuni. Kay 2011 watapitaj Pacificoj Norfolk churituman riporqanku, chaytaj Australiamanta inti llojsimuyninpi 1500 kilometrosninpi jina kashan. ¿Imaynataj paykunata rerqa? Kunanqa Jacob 14 watasniyojña kashan, nintaj: “Jehová qhawawarqayku, runasman willaspa kusiyta tarinaykupajpis yanapawarqayku”, nispa.

Kay familia jinallataj waj familiaspis pisi willajkuna kanku chayman Diosmanta willaj ripunku. ¿Imaraykú?

Burnett, warmin Simone ima 35 watasniyoj jinaña kashanku, wawasninwan Burketown nisqa llajtitaman riporqanku, chaytaj uj karu llajtita Queensland (Australia) nisqapi, wawanku Eston sutiyoj 12 watasniyoj kashan, Calebtaj 9 watasniyoj. Burnett nin: “Chay llajtitapeqa sapa kinsa chayri tawa watalla Diosmanta willakoj. Ashkha runas Bibliamanta yachakuyta munarqanku, noqaykutaj mana saqespa Bibliamanta yachachiyta munarqayku”, nispa.

Markwan, Karenwanqa, 50 kuraj watasniyoj jinaña kanku, niraj (Jessica, Jim, Jack) wawasninwan Territorio del Norte nisqaj Nhulunbuy karu llajtitanman ripushaspa, Sydney (Australia) nisqaj qayllanpi ashkha qotuchakuykunapi Jehovata sirverqanku. Mark nin: “Runa masiyta munakusqayrayku yanapata necesitaj qotuchakuypi, willaypi ima yanapakuyta munarqani”, nispa. Chaywanpis warmin pisi willajkuna kanku chayman riyta mana ajllayta atillarqachu, qosan, waj hermanos ima kallpacharisqankuraykutaj riyta ajllarqa. Kunantaj Karenqa may kusisqa kashan.

Kay 2011 watapi, Benjamin, Carolyn ima, wawitasninku Jadewan, Briawan Queensland (Australia) nisqamanta Timor Oriental llajtakama riporqanku, wawasninkutaj niraj escuelapichu karqanku. Benjamin nin: “Carolynwan Timor Oriental nisqapi precursores especiales karqayku. Runasman willayqa may sumaj karqa, hermanospis llojsejpuni kanku. Chay lugarmanta ripuspa mayta llakikuspapis, kutiyta munarqayku. Wawasniyojña kaspataj aswan qhepaman pisi willajkuna kanku chayman rinaykuta nerqayku”, nispa. Carolyn nin: “Munarqayku wawasniyku misioneroswan, betelitaswan, precursores especialeswan ima masichakunankuta, Diospaj llankʼay kusiyta apamusqanta yachakunankupaj”, nispa.

Pisi willajkuna kanku chayman ripuyta munaj familiaqa sumajta wakichikunan tiyan. Jesús yachachisqasninman nerqa: “Mayqennillaykichejpis uj torreta ruwayta munanman chayqa, manachu tiyaykukuspa ñawpajta qhawarinman, qolqen kapunchus manachus, chayta[?]”, nispa (Luc. 14:28). ¿Imaspitaj familias tʼukurinanku tiyan?

DIOSPA QAYLLANPI KANKU. Benjamin nin: “Wajkunata yanapaj riyta munarqayku, nitaj yanapachikojchu. Chayrayku niraj ripushaspa, Diosman astawan qayllaykunaykupaj mayta kallpachakorqayku. Willaymanpis astawan llojserqayku, qotuchakuypipis astawan yanapakorqayku”, nispa.

Jacob nin: “Niraj Norfolk churuman rishaspa, Torremanta Qhawaj, ¡Despertad! revistata ima, pisi  willajkuna kanku chaypi Diospaj llankʼaj familiaspa kausayninkumanta leerqayku. Chantá ima chʼampaykunapichus rikukusqankumanta, imaynatachus Jehová yanapasqanmanta ima parlarerqayku”, nispa. Hermanitan Skye, 11 watasniyoj nin: “Sapitay Jehovamanta mayta mañakoj kani, tatasniywanpis mañakullajtaj kani”, nispa.

IMATACHUS YUYASQANKU. Reneé nin: “Familiaykoj, amigosniykoj qayllanpi tiyakusqayku lugarqa mayta gustawarqa. Chay lugarllapi qhepakuyta munaspapis, manaña imastachus saqenaypi yuyarqanichu, manaqa pisi willajkuna kanku chayman ripusqayku imaynatachus familiayta yanapananpi tʼukurerqani”, nispa.

COSTUMBRESNINKU: Ashkha familiasqa ima lugarmanchus yanapakoj riyta munanku, chay lugarta astawan rejsiyta munanku. Marco nin: “Nhulunbuymanta mayta leerqayku. Chay lugarmanta hermanospis periodicosta apachimuwarqayku, chaytaj chay lugarpi ima costumbreschus kasqanta yachanaykupaj yanapawarqayku”, nispa.

Shaneqa Norfolk churuman riporqa, pay nin: “Mayta kallpachakorqani kʼacha kaykunata rikuchinaypaj. Yacharqanitaj llampʼu sonqo kajtinchej, cheqanta parlajtinchej, sumajta llankʼajtinchej, mana suwakojtinchej, maypipis kausakuyta atinallanchejta”, nispa.

Pisi willajkuna kanku chayman yanapakoj rej hermanosqa, chʼampaykunapi kaspa mana anchata llakikunata, allin imaspi tʼukurinata ima ninku. Chaykunamanta wakinta qhawarina:

Reneé nin: “Imatapis waj jinasmanta ruwayta yachakorqani. Norfolk churupi yaku mayta qhollchoqeyajtin, cargasniyoj barcos mana sayayta atisqankurayku mikhuna pisiyaj, ashkhataj valej. Chayrayku mikhunatapis waj jinasmanta wakichiyta yachakorqani”, nispa. Qosan Shane nin: “Sumajta parlarerqayku semanapi mashkhatachus gastanaykuta”, nispa.

Wawanku Jacob nin: “Mosoj qotuchakuyniykupi 7 machitu hermanoslla karqanku. Chayrayku mana edadniymanta amigosniy kapuwarqachu. Jinapis  chay machitu hermanoswan willayman llojsispa, amigosta ruwakorqani”, nispa.

Jimqa 21 watasniyojña, paypis kikin chʼampayllapitaj rikukorqa. Pay nin: “Nhulunbuy nisqaman qaylla qotuchakoyqa 725 kilometrosninpi jina kashan, jatun tantakuykuna kajtintaj niraj qallarishajtin chayaj kayku hermanoswan parlarikuspa kusirikunaykupaj. Chay tantakuykunaqa may sumajpuni karqa”, nispa.

Biblia nin: “Tata Diospa bendicionnenqa qhapajyachin”, nispa (Pro. 10:22). Pisi willajkuna kanku chaypi yanapakoj hermanosqa, kay versiculoj nisqan cheqapuni kasqanta kausayninkupi rikunku.

Mark nin: “Pisi willajkuna kanku chayman ripusqaykoqa wawasniykuta astawan yanaparqa. Kuraj wawasneyqa Diospa Reinonta ñaupajman churajkunata Jehová yanapananpi tukuy sonqo atienekunku. Chaytaj ni imawan kikinchakunchu”, nispa.

Shane nin: “Warmiyman, wawasniyman ima astawan qayllaykusqayta reparani. Imatachus Jehová paykunarayku ruwasqanmanta parlajta uyarispataj, mayta kusikuni”, nispa. Wawan Jacob nin: “May sumajpuni kaypi riwarqa. Mayta kusikuni kayman familiaywan jamusqaykumanta”, nispa.